రూ.12.5 కోట్ల విలువైన చికెన్ దొంగతనం.. మహిళకు 9 ఏళ్ల జైలు శిక్ష

అమెరికాలోని ఇల్లినాయిస్ రాష్ట్రంలో ఉన్న హార్వే స్కూల్ డిస్ట్రిక్ట్ ఫుడ్ సర్వీసెస్ డిపార్ట్‌మెంట్‌లో భారీ కుంభకోణం తాజాగా వెలుగు చూసింది. హార్వే స్కూల్ డిస్ట్రిక్ట్ ఫుడ్ సర్వీసెస్ డిపార్ట్‌మెంట్‌ తరఫున స్కూల్ విద్యార్థులకు అందించాల్సిన చికెన్ వింగ్స్‌ను పక్కదారి పట్టించిన ఓ మహిళా ఉద్యోగి చివరికి దొరికిపోయింది. దీంతో కోర్టు ఆమెకు 9 ఏళ్ల జైలు శిక్ష విధించింది. కొవిడ్‌ సమయంలో విద్యార్థులకు అందించాల్సిన ఆ చికెన్‌ వింగ్స్‌ను కాస్తా మహిళా ఉద్యోగి పక్కదారి పట్టించింది. స్కూల్ విద్యార్థుల కోసం ప్రవేశపెట్టిన పథకంలో భారీగా అక్రమాలు వెలుగు చూశాయి. మొత్తంగా 1.5 మిలియన్‌ డాలర్లు అంటే భారత కరెన్సీలో ఏకంగా రూ.12.5 కోట్ల విలువైన చికెన్ వింగ్స్‌ను చోరీ చేసినట్లు విచారణలో తేలింది.

కరోనా మహమ్మారి సమయంలో విద్యార్థులకు, వారి కుటుంబాలకు చికెన్ వింగ్స్ అందించాలని అక్కడి ప్రభుత్వం నిర్ణయించింది. అయితే స్కూల్‌ డిస్ట్రిక్ట్‌ ఆహార సేవల విభాగంలో వెరా లిడెల్‌ అనే మహిళ.. కరోనా సమయంలో ఆన్‌లైన్ క్లాసులు నిర్వహించిన సమయంలో.. చికెన్ వింగ్స్‌తో కూడిన ఆహారాన్ని అందించే కార్యక్రమాన్ని ప్రారంభించింది. ఇందుకోసం 11 వేల కేసుల చికెన్ వింగ్స్‌ అవసరమని అంచనా వేశారు. అయితే ఈ చికెన్ వింగ్స్ సరఫరా చేసేందుకు ఆ పథకం కోసం కేటాయించిన బడ్జెట్‌ కంటే అదనంగా ఖర్చు చేస్తున్నట్లు ప్రభుత్వం నిర్వహించిన ఆడిట్‌లో తేలింది. దీంతో అధికారులకు అనుమానం వచ్చి.. దర్యాప్తు చేసిన అధికారులు.. వీటి నిర్వహణ చూస్తున్న వెరా లిడెల్‌ పేరు బయటికి వచ్చింది.

పౌల్ట్రీ నుంచి భారీ స్థాయిలో చికెన్‌ వింగ్స్‌ను కొనుగోలు చేసి.. స్కూల్‌ వ్యాన్‌లోనే తీసుకువచ్చినప్పటికీ.. విద్యార్థుల తల్లిదండ్రులకు వాటిని అందించలేదని అధికారులు గుర్తించారు. జులై 2020 నుంచి ఫిబ్రవరి 2022 వరకు ఈ పక్కదారి పట్టించడం కొనసాగినట్లు దర్యాప్తులో వెల్లడైంది. మొత్తంగా రూ.12.5 కోట్ల విలువైన చికెన్ వింగ్స్‌ చోరీకి గురైనట్లు అధికారులు గుర్తించారు. ఈ నేపథ్యంలోనే వెరా లిడెల్‌పై గతేడాది కేసు నమోదు చేసుకున్న అధికారులు.. ఆమెను దోషిగా తేలడంతో ఆమెకు 9 ఏళ్ల శిక్ష పడింది.