కిలో రూ.17000 కోట్లు.. పట్టుకున్న పోలీసులు.. ఏంటీ కాలిఫోర్నియం

అత్యంత విలువైన పదార్థాన్ని తరలిస్తున్న ముగ్గురు వ్యక్తులను పక్కా సమాచారంతో బీహార్ పోలీసులు పట్టుకున్నారు. కాలిఫోర్నియం అని పిలిచే అత్యంత ఖరీదైన రేడియోధార్మిక పదార్థాన్ని వారి నుంచి బీహార్ పోలీసుల స్వాధీనం చేసుకున్నారు. అయితే అంతర్జాతీయ మార్కెట్లో ఈ కాలిఫోర్నియం విలువ రూ.17 వేల కోట్లు ఉంటుందని పోలీసులు వెల్లడించారు. ఈ కాలిఫోర్నియంను తరలిస్తున్న ముగ్గురు వ్యక్తులను అరెస్ట్ చేసిన బీహార్ పోలీసులు.. దాన్ని ఎక్కడి నుంచి తీసుకువచ్చారు.. ఎక్కడికి సరఫరా చేస్తున్నారని ఆరా తీస్తున్నారు.

బీహార్‌లోని గోపాల్‌గంజ్ జిల్లా పోలీసులు.. ఓ భారీ ముఠాను పట్టుకున్నారు. వారు తరలిస్తున్న అతి విలువైన రేడియోధార్మిక పదార్థమైన కాలిఫోర్నియంను వారి వద్ద పట్టుకుని సీజ్ చేశారు. 50 గ్రాముల కాలిఫోర్నియంను బైక్‌పై తరలిస్తూ ఆ ముగ్గురు వ్యక్తులు.. చిక్కినట్లు గోపాల్‌గంజ్ జిల్లా ఎస్పీ స్వార్న్ ప్రభాత్ వెల్లడించారు. ఆ 50 గ్రాముల కాలిఫోర్నియం విలువ ఏకంగా రూ.850 కోట్లు ఉంటుందని గోపాల్‌గంజ్ జిల్లా పోలీసులు అంచనా వేస్తున్నారు. అత్యంత విలువైన రేడియో యాక్టివ్‌ పదార్థమైన కాలిఫోర్నియంను గోపాల్‌గంజ్ జిల్లా నుంచి కొందరు అక్రమంగా రవాణా చేస్తున్నారని తమకు పక్కా సమాచారం అందినట్లు ఎస్పీ స్వార్న్ ప్రభాత్ తెలిపారు.

ఈ క్రమంలోనే పోలీసులతో కొన్ని టీంలను సిద్ధం చేసి డిస్ట్రిక్ట్‌ ఇన్వెస్టిగేషన్‌ యూనిట్‌ను అలర్ట్ చేసినట్లు జిల్లా ఎస్పీ తెలిపారు. స్పెషల్‌ ఆపరేషన్‌ గ్రూప్‌, ఎస్టీఎఫ్‌ దళాలను కూడా రంగంలోకి దించి.. ఉత్తర్‌ప్రదేశ్‌ - బీహార్‌ సరిహద్దుల్లో మోహరించి తనిఖీలు చేపట్టినట్లు ఎస్పీ స్వార్న్ ప్రభాత్ వెల్లడించారు. ఈ సమయంలోనే బైక్‌పై వస్తున్న ముగ్గురు వ్యక్తులను సెర్చ్ చేయగా.. వారి వద్ద 4 సెల్‌ఫోన్లతోపాటు 50 గ్రాముల కాలిఫోర్నియం కూడా బయటపడినట్లు చెప్పారు. అయితే అంతర్జాతీయ మార్కెట్లో ఈ కాలిఫోర్నియం ధర గ్రాముకు రూ.17 కోట్లు ఉంటుందని ఎస్పీ ప్రభాత్‌ వివరించారు. ఇక ఆ ముగ్గురిలో ఇద్దరు నిందితులను చోటే లాల్‌ ప్రసాద్‌, చందన్‌ గుప్తాగా గుర్తించారు.

చోటే లాల్ ప్రసాద్, చందన్‌ గుప్తాలు ఈ కాలిఫోర్నియంను విక్రయించేందుకు గత కొన్ని నెలలుగా ప్లాన్ చేసి.. ఇప్పుడు అమలు చేస్తుండగా.. వల వేసి పట్టుకున్నట్లు పోలీసులు చెప్పారు. దీనిపై దర్యాప్తును ముందుకు తీసుకెళ్లేందుకు ఫోరెన్సిక్‌ సైన్స్‌ ల్యాబ్‌ నుంచి ప్రత్యేక బృందాన్ని రప్పించినట్లు ఎస్పీ వెల్లడించారు. ఇక ఈ కాలిఫోర్నియంను పోర్టబుల్‌ మెటల్‌ డిటెక్టర్లలో వినియోగిస్తారని నిపుణులు చెబుతున్నారు. ఈ మెటల్ డిటెక్టర్లతో బంగారం, వెండి సహా ఇతర విలువైన లోహాలను గుర్తించవచ్చని పేర్కొన్నారు. దీంతోపాటు ఇంధన బావుల్లో నీరు, చమురు పొరలు గుర్తించేందుకు వీటని వాడతారని వివరించారు. ఇక విమానాల్లో లోహాల అరుగుదలను అంచనా వేసేందుకు కూడా ఈ మెటల్ డిటెక్టర్లను వినియోగించవచ్చని తెలిపారు.