ఓరి మీ దుంపలు తెగ.. డీజేల ముసుగులో మీరు చేస్తున్న చెండాలం ఇదా..?

హైదరాబాద్‌ నగరంలో పబ్బులు, డీజే పార్టీల కల్చర్ భారీగా పెరిగిపోయింది. అయితే.. ఈ పబ్బులు, డీజే పార్టీల ముసుగులో వీళ్లు చేస్తున్న చెండాలపు పనులు వేరే ఉంటున్నట్టు.. ఇటీవల జరుగుతున్న ఘటనల్లో బయటపడుతున్నాయి. డ్రగ్స్ అమ్మకాలు కూడా యథేచ్చగా సాగుతున్నాయి. ఈ క్రమంలోనే.. డ్రగ్స్ అమ్మకాలు జరుపుతున్న ముగ్గురు డీజే (డిస్క్ జాకీ)లను పోలీసులు పట్టుకున్నారు. నిందితుల దగ్గరి నుంచి.. 15.13 గ్రాముల ఎండీఎంఏ డ్రగ్స్‌ను స్వాధీనం చేసుకున్నారు.

వివరాల్లోకి వెళ్తే.. పలు పబ్బుల్లో రీమిక్స్‌ డీజే నిర్వహించే వ్యక్తులు డ్రగ్స్‌ అమ్మకాలు చేపడుతున్నారనే సమాచారం మేరకు ఎన్‌ఫోర్స్‌మెంట్‌ ఈఎస్‌ నవీన్‌కుమార్‌ తన సిబ్బందితో బంజరాహిల్స్‌లో దాడులు నిర్వహించారు. అఖిల్‌ అనే డీజే నిర్వహకుడిని పట్టుకున్న పోలీసులు.. అతని దగ్గర ఉన్న 2.65 గ్రాముల ఎండీఎంఏ డ్రగ్స్‌ను స్వాధీనం చేసుకున్నారు. ఈ డ్రగ్స్‌‌ని ఎక్కడి నుంచి తీసుకొచ్చావని ప్రశ్నించగా.. ఇబహ్రీంపట్నంకు చెందిన సన్నీ అనే వ్యక్తి ఇచ్చాడని సమాచారం ఇచ్చాడు. ఈ సమాచారంతో ఇబ్రహింపట్నంలోని సన్నీ ఇంట్లో సోదాలు నిర్వహించగా.. 12.48 గ్రాముల ఎండీఎంఏ డ్రగ్స్‌ లభించాయని ఎన్‌ఫోర్స్‌మెంట్‌ పోలీసులు తెలిపారు.

ఒక్కో గ్రాము ఎండీఎంఏను 5000 వేలకు అమ్ముతున్నట్టు పోలీసుల విచారణలో నిందితులు తెలిపారు. ఈ డ్రగ్స్‌ను బెంగళూర్‌కు చెందిన అలెక్స్‌ తీసుకొని వస్తాడని.. ఇద్దరు కలిసి అమ్మకాలు జరుపుతుంటారని పోలీసులు తెలిపారు. డ్రగ్స్‌తో పాటు వీరి వద్దనే 326 గ్రాముల గంజాయి కూడ లభ్యమవటం గమనార్హం.

ఇప్పటికే.. హైదరాబాద్‌ నగరంలో మాదకద్రవ్యాల కట్టడికి పోలీసులకు ప్రభుత్వం కీలక ఆదేశాలు జారీ చేసింది. సీఎం రేవంత్ రెడ్డి ఆదేశాల మేరకు.. పోలీసులు కఠిన చర్యలు తీసుకుంటున్నారు. ఏ చిన్న సమాచారం వచ్చినా.. గుట్టు బయటకులాగుతున్నారు. మూలాల నుంచి తెలుసుకుని.. వేర్ల నుంచి డ్రగ్స్ దందాను నిర్మూలించేందుకు కృషి చేస్తున్నారు. ఈ క్రమంలోనే.. పబ్బులకు, డీజే పార్టీలపై పోలీసులు ప్రత్యేక నిఘా పెట్టారు.