ఢిల్లీ ఎయిర్‌పోర్ట్ ఘటనతో అలర్ట్.. సంచలన నిర్ణయం తీసుకున్న కేంద్రమంత్రి రామ్మోహన్ నాయుడు

ఢిల్లీలో కురిసిన ఈదురుగాలుతో కూడిన భారీ వర్షం ధాటికి ఎయిర్‌పోర్టులోని టెర్మినల్ పైకప్పు కుప్పకూలిన ఘటన దేశవ్యాప్తంగా తీవ్ర దుమారం రేపిన సంగతి తెలిసిందే. ఈ ఘటనలో ఒకరు మృతి చెందగా.. మరో 8 మంది తీవ్రంగా గాయపడ్డారు. టెర్మినల్ పైకప్పు కూలిన సమయంలో దానికి కింద ఉన్న పలు వాహనాలు ధ్వంసం అయ్యాయి. ఢిల్లీ ఇందిరాగాంధీ ఇంటర్నేషనల్ ఎయిర్‌పోర్టులోని టెర్మినల్-1 లో పైకప్పు కూలిన సంఘటనను కేంద్ర ప్రభుత్వం సీరియస్‌గా తీసుకుంది. ఇప్పటికే సంఘటనా స్థలానికి వెళ్లి పరిశీలించిన కేంద్ర పౌర విమానయాన శాఖ మంత్రి కింజరపు రామ్మోహన్ నాయుడు.. కీలక ప్రకటన చేశారు. దేశంలో ఉన్న అన్ని ఎయిర్‌పోర్టుల్లో కేంద్ర ప్రభుత్వం క్షుణ్ణంగా తనిఖీలు చేయనున్నట్లు వెల్లడించారు.

ఢిల్లీలోని ఇందిరాగాంధీ ఇంటర్నేషనల్ విమానాశ్రయంలో జరిగిన సంఘటన.. దేశంలో మరోసారి చోటు చేసుకోకుండా.. ఇలాంటి తప్పిదాలు భవిష్యత్తులో పునరావృతం కాకుండా ఉండేందుకు చర్యలు తీసుకుంటామని కేంద్రమంత్రి రామ్మోహన్ నాయుడు తెలిపారు. దీనికోసం కేంద్ర ప్రభుత్వ పరిధిలోకి వచ్చే అన్ని ఎయిర్‌పోర్టులను పూర్తిగా తనిఖీలు చేస్తామని తేల్చి చెప్పారు. అంతేకాకుండా అవసరం అయితే ఓ నివేదికను కూడా తయారు చేస్తామని ప్రకటించారు. ఈ ప్రక్రియ కోసం అవసరమైతే ప్రత్యేకంగా ఒక స్వతంత్ర సంస్థను కూడా కేంద్రం ఏర్పాటు చేస్తుందని వెల్లడించారు.

ఇప్పటికే ఢిల్లీ ఇంటర్నేషనల్ ఎయిర్‌పోర్ట్‌కు వెరిఫికేషన్, చెకింగ్ చేయాలని సూచించినట్లు తెలిపారు. ఇదే సమయంలో కేంద్ర పౌరవిమానయాన మంత్రిత్వ శాఖ తరఫున కూడా డైరెక్టర్ జనరల్ ఆఫ్ సివిల్ ఏవియేషన్-డీజీసీఏ పరిశీలిస్తుందని వెల్లడించారు. ఎయిర్‌పోర్టుల భద్రత, తనిఖీలను పర్యవేక్షించే డీజీసీఏ కూడా దీనిపై నివేదికను సిద్ధం చేస్తుందని కేంద్రమంత్రి వివరించారు. ఢిల్లీ ఎయిర్‌పోర్టు మాత్రమే కాకుండా దేశవ్యాప్తంగా ఉన్న అన్ని ఎయిర్‌పోర్టులను కూడా పరిశీలిస్తామని.. వాటిలో ఏవైనా సమస్యలు ఉంటే వాటిని తీవ్రంగా పరిగణిస్తామని హామీ ఇస్తున్నట్లు రామ్మోహన్ నాయుడు వెల్లడించారు.