స్నేహితులకు రైలు టికెట్లు బుక్ చేస్తే ఫైన్.. ఆ వార్తలు నిజంకావు

మనం రైల్వే టికెట్లను ఆన్‌లైన్‌లో బుక్ చేసుకునేటపుడు రైల్వే టికెట్ బుకింగ్, క్యాటరింగ్ సంస్థ - ఐఆర్‌సీటీసీ వెబ్‌సైట్, యాప్ ఉపయోగిస్తాం. అందులో ముందుగా మన పేరుతో అకౌంట్ క్రియేట్ చేసుకున్న తర్వాతే టికెట్ బుక్ అవుతుంది. అయితే ఆ అకౌంట్ నుంచి మన కుటుంబ సభ్యులు, ఫ్రెండ్స్, తెలిసిన వారికి రైల్వే టికెట్లు బుక్ చేస్తూ ఉంటాం. ఇక గత కొన్ని రోజులుగా ఓ వార్త బాగా వైరల్ అవుతోంది. ఐఆర్‌సీటీసీ పర్సనల్ అకౌంట్ నుంచి మనకు కాకుండా ఇతరులకు రైల్వే ఈ-టికెట్ల బుక్ చేసేవారిపై చట్టపరంగా జైలు శిక్షతోపాటు, భారీగా జరిమానా విధిస్తారు అంటూ ఆ వార్త సారాంశం. అయితే ఇదంతా ఫేక్ అని తాజాగా రైల్వే శాఖ కొట్టిపారేసింది. అలాంటి కొత్త నిబంధనలు ఏవీ తీసుకురాలేదని స్పష్టం చేసింది.

ఇక ఈ-టికెట్ల బుకింగ్ విషయంలో ఆన్‌లైన్‌లో వైరల్ అవుతున్న వార్తలు ప్రయాణికులను తప్పుదోవ పట్టించేలా ఉన్నాయని పేర్కొన్న రైల్వే శాఖ.. ఈ బుకింగ్‌కు సంబంధించి కొన్ని విషయాలు వెల్లడించింది. ఐఆర్‌సీటీసీలో పర్సనల్ అకౌంట్‌ల నుంచి కుటుంబ సభ్యులు, బంధువులు, ఫ్రెండ్స్‌ ఇలా ఎవరికైనా రైల్వే ఈ-టికెట్లు బుక్‌ చేసుకోవచ్చని తెలిపింది. ఒక పర్సనల్ అకౌంట్ నుంచి నెలకు 12 టికెట్లు బుక్ చేసుకునే సదుపాయం ఉంటుందని వెల్లడించింది. ఆధార్‌ అనుసంధానం పూర్తి చేసుకున్నవారైతే నెలలో 24 టికెట్లు వరకూ బుక్‌ చేసుకొనే సదుపాయం ఉంది.

ఈ పర్సనల్ ఐడీలతో బుక్‌ చేసిన ఈ-టికెట్లు బిజినెస్ కోసం ఉద్దేశించినవి కాదని రైల్వే మంత్రిత్వశాఖ తాజాగా స్పష్టం చేసింది. అలాంటి చర్యలకు ఎవరైనా పాల్పడితే.. రైల్వే చట్టం -1989లోని సెక్షన్‌ 143 ప్రకారం నేరంగా పరిగణించి తగిన శిక్షలు ఉంటాయని ట్విటర్ వేదికగా తెలిపింది. ఈ నేపథ్యంలోనే కేవలం రక్త సంబంధీకులు, ఒకే ఇంటిపేరు ఉన్నవారికి మాత్రమే ఐఆర్‌సీటీసీ పర్సనల్ ఐడీ నుంచి రైల్వే ఈ-టికెట్లు బుక్‌ చేసేందుకు అవకాశం ఉందని.. వేరే ఇంటిపేర్లు ఉన్నవారికి బుక్‌ చేయడంపై రైల్వేశాఖ ఆంక్షలు విధించినట్లు జరుగుతున్న ప్రచారంలో ఎలాంటి నిజం లేదని.. ఆ వార్తలు నమ్మవద్దని సూచించింది.

ఇంటి పేరుతో సంబంధం లేకుండా పర్సనల్ ఐడీ ఉన్న వ్యక్తులు కుటుంబ సభ్యులు, ఫ్రెండ్స్, బంధువులకు ఉన్న లిమిట్‌కు అనుగుణంగా ఐఆర్‌సీటీసీలో ఈ-టికెట్లు బుక్‌ చేసుకోవచ్చని స్పష్టం చేసింది. అలా కాకుండా ఆ పర్సనల్ అకౌంట్ నుంచి టికెట్లు బుక్‌ చేసి వ్యాపారం చేయాలనుకుంటే మాత్రం తప్పకుండా చట్టపరంగా చర్యలు తప్పవని హెచ్చరికలు చేసింది. కేవలం అధికారిక గుర్తింపు పొందిన ఏజెంట్లకు మాత్రమే థర్డ్‌పార్టీ బుకింగ్‌ ద్వారా ఈ-టికెట్లు బుక్ చేసే అవకాశం ఉంటుందని తేల్చి చెప్పింది. వారు మాత్రమే టికెట్లు బుక్‌ చేసి ఇతరులకు విక్రయించే అధికారాన్ని కలిగి ఉంటారని.. ఎవరైనా ఈ నిబంధనల్ని అతిక్రమిస్తే.. చట్టపరమైన చర్యలు ఉంటాయని రైల్వే శాఖ తాజాగా హెచ్చరించింది.