స్కాన్ చేయండి.. సలహాలు ఇవ్వండి.. పాలనలో పవన్ కళ్యాణ్ కొత్త ట్రెండ్

డిప్యూటీ సీఎం, జనసేన అధినేత పవన్ కళ్యాణ్ పాలనలో తన మార్క్ చూపిస్తున్నారు. చంద్రబాబు మంత్రివర్గంలో పంచాయతీరాజ్, గ్రామీణాభివృద్ధి, గ్రామీణ నీటి సరఫరా, అటవీ, పర్యావరణ, సైన్స్ అండ్ టెక్నాలజీ మంత్రిగా పవన్ కళ్యాణ్ బాధ్యతలు స్వీకరించారు. అలాగే జనసేనకు చెందిన తెనాలి ఎమ్మెల్యే నాదెండ్ల మనోహర్‌కు పౌరసరఫరాశాఖ, నిడదవోలు ఎమ్మెల్యే కందుల దుర్గేష్‌లకు సినిమాటోగ్రఫీ, టూరిజం శాఖలు కేటాయించారు. అయితే డిప్యూటీ సీఎంగా బాధ్యతలు చేపట్టిన తర్వాత రివ్యూలు, సమీక్షలతో అధికారులను పరుగులు పెట్టిస్తున్న పవన్ కళ్యాణ్.. జనతా దర్బార్ నిర్వహిస్తూ ప్రజల సమస్యలు కూడా వింటున్నారు. జనసేన కార్యాలయం వద్ద జనవాణి నిర్వహిస్తూ బాధితుల సమస్యలు వింటూ.. వాటిని పరిష్కరించేందుకు కృషి చేస్తున్నారు. ఇప్పుడు పవన్ కళ్యాణ్ మరో నిర్ణయం తీసుకున్నారు.

సాంకేతికత సాయంతో తమకు కేటాయించిన శాఖలను సమర్థంగా నిర్వహించేందుకు జనసేనాని ప్రణాళికలు రచిస్తున్నారు. ఈ క్రమంలోనే జనసేన చేపట్టిన శాఖలకు సంబంధించి ఎవరైనా సూచనలు, సలహాలు ఇవ్వాలనుకుంటే స్కాన్ చేసి సలహాలు పంపండి అంటూ జనసేన పేర్కొంది. ఈ మేరకు అధికారిక సోషల్ మీడియా ఖాతాల ద్వారా ఏపీ ప్రజలకు సూచించింది. ఎవరైనా సలహాలు, సూచనలు ఇవ్వాలనుకుంటే క్యూఆర్ కోడ్ స్కా్న్ చేయడం ద్వారా లేదంటే లింక్ ద్వారా గూగుల్ ఫామ్ నింపాలని జనసేన సూచించింది. ఈ మేరకు క్యూఆర్ కోడ్, లింక్‌లను ఎక్స్‌లో ట్వీట్ చేసింది.

ఈ గూగుల్ ఫామ్‌లో మన పేరు, మొబైల్ నంబరు నింపడంతో పాటుగా ఏ శాఖకు సంబంధించిన సలహాలు లేదా సూచనలు ఇవ్వాలనుకుంటున్నామో దానిని ఎంచుకోవాల్సి ఉంటుంది. ఆ తర్వాత ఏ జిల్లా అనేది వివరాలు నింపి సబ్మిట్ కొట్టాలి. దీని ద్వారా ఆయా శాఖలను ఎలా సమర్థంగా నిర్వహించాలనే దానిపై ప్రజల నుంచి అభిప్రాయాలను జనసేన సేకరిస్తోంది. దీనిపై నెటిజనం నుంచి కూడా మంచి స్పందన వస్తోంది. మంచి ఆలోచన అని.. ఇందులో మరికొన్ని అంశాలను కూడా చేర్చాలంటూ నెటిజనం కోరుతున్నారు.

  మరోవైపు గ్రామీణ నీటి సరఫరా, పంచాయతీ రాజ్, అటవీ, పర్యావరణ, సైన్స్ అండ్ టెక్నాలజీ మంత్రిగా ఉన్న పవన్ కళ్యాణ్.. ఆయా శాఖలపై సమీక్షలు నిర్వహించి ఇప్పటికే అధికారులకు పలు సూచనలు చేశారు. అటు నాదెండ్ల మనోహర్ సైతం పౌరసరఫరాలశాఖకు సంబంధించి స్టాక్ పాయింట్లను తనిఖీ చేస్తూ అక్రమార్కులను గుర్తించే పనిలో ఉన్నారు. ఇప్పుడు తాజాగా చేపట్టిన ఈ ప్రజాభిప్రాయ సేకరణ మరిన్ని మంచి ఫలితాలు ఇస్తుందని నెటిజనం అభిప్రాయపడుతున్నారు.