కర్ణాటకలో మరో కలకలం.. యువకుడిపై ప్రజ్వల్ రేవణ్ణ సోదరుడు అత్యాచారం

మహిళలపై ప్రజ్వల్ రేవణ్ణ లైంగిక దౌర్జన్యాల వ్యవహారం కర్ణాటక రాజకీయాలను కుదిపేస్తుండగా.. తాజాగా అతడి సోదరుడు ఎమ్మెల్సీ సూరజ్ రేవణ్ణపై అత్యాచారం ఆరోపణలు కలకలం రేపుతున్నాయి. అయితే, ఈ ఆరోపణలు చేసింది యువకుడు కావడం గమనార్హం. తనపై సూరజ్ రేవణ్ణ అత్యారానికి పాల్పడినట్టు హసనకు చెందిన జేడీఎస్ కార్యకర్త పోలీసులకు ఫిర్యాదు చేశాడు. తాను అంగీకరించకపోయినా బలవంతంగా అసహజ లైంగిక ప్రక్రియలో పాల్గొన్నాడని ఆరోపించాడు. తనను వేధింపులకు గురిచేస్తోన్న ఎమ్మెల్సీ.. హత్యచేయడానికి ప్రయత్నిస్తున్నాడని ఆరోపిస్తూ డీజీపీ, హోం మంత్రి, జిల్లా ఎస్పీకి అతడు లేఖలు రాశాడు.

అరకలగూడుకు చెందిన జేడీఎస్ కార్యకర్త చేతన్ (25) తనపై జరిగిన దౌర్జన్యానికి సంబంధించి సుదీర్ఘంగా 15 పేజీల లేఖలో వివరించాడు. ఉద్యోగం ఇప్పిస్తానని, ఆర్థికసాయం చేస్తామని నమ్మించి తనపై సూరజ్ అత్యాచారం చేశాడని ఆరోపించాడు. ఫిర్యాదు ఆధారంగా కేసు నమోదుచేసిన పోలీసులు.. వైద్య పరీక్షల కోసం అతడ్ని ప్రభుత్వ ఆసుపత్రికి తరలించారు. వైద్య పరీక్షల్లో యువకుడి ఒంటిపై గాయాలు ఉన్నట్లు వైద్యులు గుర్తించారు. కాగా, అతడి ఆరోపణలపై ఆధారాలు సేకరిస్తున్నట్టు హసన ఎస్పీ మహ్మద్‌ సజీదా తెలిపారు.

అయితే, ఎమ్మెల్సీ సూరజ్‌ అనుచరుడు శివకుమార్ ఆ యువకుడిపై పోలీసులకు ఫిర్యాదు చేశాడు. తనకు రూ.5 కోట్లు ఇవ్వాలని డిమాండు చేశాడని, ఇవ్వకపోతే అత్యాచారం చేసినట్టు కేసు పెడతానని బెదిరించినట్టు శుక్రవారం రాత్రి హోళినరిసిపురం పోలీస్ స్టేషన్‌లో కేసు పెట్టాడు. జూన్ 16న గన్నికొండ ఫామ్‌హౌస్‌కు వచ్చి తనను కలిసిన చేతన్.. తనకు ఉద్యోగం ఇప్పించాలని కోరాడని శివకుమార్ తెలిపారు. దీంతో సూరజ్ ఫోన్ నెంబర్ ఇచ్చి ఆయన్ను సంప్రదించాలని చెప్పానని, ఆ తర్వాత నుంచి బ్లాక్‌మెయిల్ చేయడం మొదలుపెట్టాడని ఆరోపించారు. యువకుడు ఫామ్‌హౌస్‌కు వచ్చినప్పుడు పోలీసులతో పాటు చాలా మంది ఉన్నారని పేర్కొన్నాడు.