కోవిషీల్డ్ టీకాతో మరో ప్రాణాంతక అనారోగ్యం

బ్రిటన్ ఫార్మ సంస్థ ఆస్ట్రాజెనెకా కోవిడ్-19 వ్యాక్సిన్‌ సైడ్ ఎఫెక్ట్స్ గురించి ప్రపంచవ్యాప్తంగా ఆందోళన వ్యక్తమవుతోంది. తమ టీకాతో దుష్ప్రభావాలు కలుగుతున్నట్టు స్వయంగా ఆస్ట్రాజెనెకా అంగీకరించినట్టు నివేదికలు వెలువడిన విషయం తెలిసిందే. ఈ టీకా మరో అరుదైన అనారోగ్యానికి కారణమవుతుందని శాస్త్రవేత్తల పరిశోధనల్లో వెల్లడయ్యింది. ఆస్ట్రాజెనెకా టీకా తీసుకున్నవారిలో వ్యాక్సిన్ ఇన్‌డ్యూస్డ్ ఇమ్యూనే థ్రోంబోసైటోపెనియా అండ్ థ్రాంబోసిస్ అనే అరుదైన ప్రాణాంతక రుగ్మతకు దారితీస్తుందని పరిశోధకులు పేర్కొన్నారు. ఈ అనారోగ్యం కొత్తది కానప్పటికీ.. కోవిషీల్డ్ టీకా తీసుకున్నవారిలో కొత్తగా గుర్తించడం మాత్రం ఇదే మొదటిసారి. ఆస్ట్రాజెనెకా ఫార్మ, ఆక్స్‌ఫర్డ్ యూనివర్సిటీ సంయుక్తంగా అభివృద్ది చేసిన కోవిడ్-19 టీకాను భారత్‌లో కోవిషీల్డ్ పేరుతో పుణేలోని సీరమ్ ఇన్‌స్టిట్యూట్ ఆఫ్ ఇండియా ఉత్పత్తి చేసింది.

వీఐటీటీ కారణంగా ‘ప్లేట్‌లెట్ ఫ్యాక్టర్ 4 లేదా పీఎస్ 4 ప్రోటీన్‌కు వ్యతిరేకంగా రక్తంలోని అసాధారణ ప్రమాదకరమైన ఆటోయాండీబాడీలు’ గుర్తించామని తెలిపారు. గతేడాది జరిగిన ప్రత్యేక పరిశోధనలో కెనడా, ఉత్తర అమెరికా, జర్మనీ, ఇటలీకి చెందిన శాస్త్రవేత్తలు.. సహజమైన అడెనోవైరస్ (సాధారణ జలుబు) బారినపడిన తర్వాత కొన్ని సందర్భాల్లో ప్రాణాంతక వీఐటీటీని గుర్తించారు. ఆస్ట్రేలియాలోని ఫ్లిండర్స్ యూనివర్సిటీ, ఇతర అంతర్జాతీయ నిపుణుల బృందం తాజా పరిశోధనలో అడెనోవైరస్ ఇన్ఫెక్షన్‌, అడెనోవైరల్ టీకాలో పీఎస్ 4 యాంటీబాడీలు ఒకే విధంగా ఉన్నట్టు కనుగొన్నారు. ‘వాస్తవానికి ఈ రుగ్మతలో ప్రాణాంతక యాంటీబాడీల ఉత్పత్తి, జన్యు ప్రమాద కారకాలలో సారూప్యత కలిగి ఉంటుంది’ అని ఫ్లిండర్స్ యూనివర్సిటీ ప్రొఫెసర్ టామ్ గోర్డాన్ అన్నారు. అరుదైన కేసుల్లో అడెనోవైరస్ ఇన్ఫెక్షన్ల తర్వాత రక్తం గడ్డకడుతుందోని ఆయన వివరించారు.

కాగా, 2022లో ఇదే బృందం పీఎస్ 4 యాంటీబాడీ మాలిక్యులర్ కోడ్‌, జన్యు ప్రమాద కారకాలను గుర్తించింది. తాజా పరిశోధన ఫలితాలను న్యూ ఇంగ్లాండ్ జర్నల్ ఆఫ్ మెడిసిన్‌లో ప్రచురించాయి. టీకా భద్రతను మెరుగుపరచడంలో ముఖ్యమైన సమస్యలను కూడా గుర్తించారు. కాగా, కరోనా వైరస్‌ నియంత్రణ చర్యల్లో భాగంగా రూపొందించిన కోవిషీల్డ్ టీకాపై సుప్రీంకోర్టు సహా వివిధ దేశాల కోర్టుల్లో కేసులు, దావాలు నడుస్తున్నాయి ఈ పరిణామాల నేపథ్యంలో వ్యాక్సిన్ అమ్మకాలను ఆస్ట్రాజెనెకా ఉపసంహరించుకుంది. వాణిజ్యపరమైన కారణాలతోనే టీకాలను వెనక్కి తీసుకున్నట్టు ఆ సంస్థ పేర్కొంది. ప్రపంచవ్యాప్తంగా అందుబాటులో ఉన్న డోస్‌ల ఉపసంహరణ ప్రారంభించినట్టు ఆస్ట్రాజెనెకా.. కొత్త వేరియంట్‌లను ఎదుర్కొనేలా టీకాను సిద్ధం చేసినట్టు పేర్కొంది. కోవిషీల్డ్ తీసుకునేవారిలో అరుదైన సందర్భాల్లో థ్రాంబోసిస్‌ థ్రోంబోసైటోపెనియా సిండ్రోమ్‌ కు , రక్తంలో ప్లేట్‌లెట్‌ల సంఖ్య తగ్గడానికి కారణమవుతుందని ఇటీవల ఆ సంస్థ కోర్టుకు సమర్పించిన అఫిడ్‌విట్‌లో పేర్కొంది.