విచారణకు చంద్రబాబు సహకరించలేదని,,,,మరో 5 రోజులు కస్టడీకి సీఐడీ పిటిషన్

స్కిల్ డెవలప్‌మెంట్ స్కాం కేసులో ఏపీ మాజీ సీఎం చంద్రబాబు నాయుడును మరో 5 రోజులు కస్టడీకి ఇవ్వాలని ఏపీ సీఐడీ అధికారులు కోరారు. ఈ క్రమంలో న్యాయస్థానానికి కస్టడీ పిటిషన్ దాఖలు చేశారు. ఈ కస్టడీ పిటిషన్‌లో చంద్రబాబు విచారణకు సంబంధించి కీలక విషయాలను సీఐడీ అధికారులు వెల్లడించారు. స్కిల్ స్కాం కేసులో చంద్రబాబును ఐదు రోజులు కస్టడీకి ఇవ్వాలని కోరగా.. రెండు రోజులే ఇచ్చారని.. మరో మూడు రోజులు ఇవ్వాలని న్యాయస్థానాన్ని కోరారు. కస్టడీలో చంద్రబాబు విచారణకు ఏమాత్రం సహకరించలేదని తెలిపారు. కస్టడీ ఆర్డర్స్ చూపే వరకు సమాధానం చెప్పనని మొండికేశారన్నారు. తొలి రోజు మధ్యాహ్నం ఒంటి గంట వరకు ఆర్డర్ కాపీ చదవడంతోనే గడిపేశారన్నారు. లంచ్ బ్రేక్ తరువాత కూడా అదే తంతు కొనసాగించినట్టు తెలిపారు.

విచారణకు రెండు రోజులు మాత్రమే సమయం ఉందని.. విచారణాధికారి ఎన్నిసార్లు చెప్పినా పట్టించుకోలేదని సీఐడీ అధికారులు తెలిపారు. విచారణాధికారిని ప్రశ్నలు అడగనివ్వలేదన్నారు. తాను చెప్పదల్చుకున్నదే చంద్రబాబు చెప్పుకుంటూ పోయారని.. ప్రశ్నల నుంచి తప్పించుకునేందుకు పొంతన లేని సమాధానాలు చెప్పినట్టు వివరించారు. కావాలనే చంద్రబాబు కాలయాపన చేశారని చెప్పుకొచ్చారు. మాజీ సీఎం హోదాను అడ్డుపెట్టుకుని అధికారులను దబాయించినట్టు పిటిషన్లో అధికారులు పేర్కొన్నారు. నిందితుల స్టేట్‌మెంట్లపై చంద్రబాబు ప్రశ్నలు అడగనివ్వలేదని చెప్పుకొచ్చారు.

ఈ కేసులో నిందితులైన ఖన్వేల్కర్‌, లక్ష్మీ నారాయణ, సుబ్బారావు స్టేట్‌మెంట్లపై చంద్రబాబు సమాధానాలు దాట వేశారని అధికారులు పేర్కొన్నారు. బాబు కాలయాపన చేసిన ప్రక్రియను వీడియో రికార్డ్ కూడా చేసినట్టు అధికారులు చెప్పుకొచ్చారు. 15 రోజుల్లోపే కస్టడీ విచారణ ఉంటుందనే నిబంధనను.. అనకు అనుకూలంగా ఉపయోగించుకునే ప్రయత్నం చేశారన్నారు. కేసు నుంచి తప్పించుకునేందుకు విచారణ అడ్డుకున్నారని ఏపీ సీఐడీ అధికారులు వెల్లడించారు.