ట్రెండింగ్
కరెంట్ పోల్ ఏర్పాటు చేస్తుండగా ఘోర ప్రమాదం.... ఎనిమిదిమంది కూలీల మరణం
national | Suryaa Desk | Published : Mon, May 29, 2023, 10:19 PM
కరెంట్ పోల్ ఏర్పాటు చేస్తుండగా అది ప్రమాదవశాత్తూ హై టెన్షన్ వైర్ల మీద పడిపోయింది. విద్యుత్ సరఫరా కావడంతో కరెంట్ షాక్‌కు గురై 8 మంది కూలీలు దుర్మరణం పాలయ్యారు. ఈ విషాదకర ఘటన జార్ఖండ్‌లోని ధన్‌బాద్ జిల్లా నిశ్చిత్‌పూర్‌లో సోమవారం (మే 29) చోటు చేసుకుంది. 25 వేల వోల్టుల విద్యుత్ ప్రసారమయ్యే హైటెన్షన్ వైర్లపై పోల్ పడిపోయిందని అధికారులు తెలిపారు. ఈ ప్రమాదంలో మరి కొంత మంది కార్మికులు తీవ్రంగా గాయపడ్డారు. వారిని చికిత్స నిమిత్తం ఆస్పత్రికి తరలించారు.
హౌరా - న్యూ ఢిల్లీ రైల్వే మార్గంలో ధన్‌బాద్, గోమో మధ్య నిశ్చిత్‌పూర్ రైల్వే గేట్ సమీపంలో ఈ ప్రమాదం జరిగింది. ప్రమాదంలో 8 మంది కూలీలు మృతి చెందడం దిగ్భ్రాంతి కలిగిస్తోంది. ఈ ఘటన కారణంగా ఈ మార్గంలో నడిచే పలు రైళ్లను వివిధ స్టేషన్లలో నిలిపివేశారు. ఘటనకు సంబంధించిన పూర్తి వివరాలు తెలియాల్సి ఉంది.
|
|