రష్యా సైనికుల అత్యాచారాలపై ప్రపంచం స్పందించాల్సిన అవసరముందని ఉక్రెయిన్ ప్రథమ మహిళ, అధ్యక్షుడు వొలొడిమిర్ జెలెన్స్కీ భార్య ఒలెనా జెలెన్స్కా కోరారు. దండయాత్రలో రష్యా సైనికులు అత్యాచారాలు, లైంగిక వేధింపులను ఓ ఆయుధంగా ఉపయోగించుకుంటున్నారని ఆమె ఆవేదన వ్యక్తం చేసినట్టు బ్రిటన్కు చెందిన టెలివిజన్ స్కై న్యూస్ వెల్లడించింది. దండయాత్రలు, అల్లర్లు సమయంలో లైంగిక హింసను అరికట్టాలన్న అంశంపై లండన్లో ఏర్పాటుచేసిన ఓ అంతర్జాతీయ సమావేశంలో ఆమె పాల్గొని ప్రసంగించారు. ఈ సందర్భంగా ఒలెనా మాట్లాడుతూ.. ఉక్రేనియన్ మహిళలపై అత్యాచారం చేసేందుకు రష్యా సైనికుల భార్యలు వారి ప్రోత్సహిస్తున్నారని సంచలన వ్యాఖ్యలు చేశారు.
ఫిబ్రవరిలో రష్యా దాడి ప్రారంభమైనప్పటి నుంచి తమ దేశంలోకి చొరబడిన ఆక్రమణదారులు క్రమబద్ధంగా, బహిరంగంగా లైంగిక హింసకు పాల్పడుతున్నారి ఆరోపించారు. ‘‘ లైంగిక హింస అనేది ఒకరిపై తమపై ఆధిపత్యం నిరూపించుకోవడానికి అత్యంత క్రూరమైన, అత్యంత జంతు సంబంధమైన మార్గం. ఈ రకమైన హింసకు గురైనవారికి యుద్ధ సమయంలో సాక్ష్యం చెప్పడం కష్టం.. ఎందుకంటే ఎవరూ సురక్షితంగా లేరని భావిస్తారు’’ అని ఆమె చెప్పారు.
‘‘ఇది వారు (రష్యన్ దళాలు) తమ ఆయుధంగా ఉపయోగిస్తున్న మరొక సాధనం.. ఈ యుద్ధం, సంఘర్షణలో వారి ఆయుధగారంలో ఇది మరొక ఆయుధం.. అందుకే వారు దీన్ని క్రమపద్ధతిలో బహిరంగంగా ఉపయోగిస్తున్నారు... రష్యా సైనికులు దీని గురించి చాలా ఓపెన్గానే ఉన్నారనడంలో సందేహం లేదు.. మేము సేకరించిన ఫోన్ సంభాషణలతో దాని గురించి బంధువులతోనే వారు ఫోన్లో మాట్లాడతారు’’ అని ఒలెనా స్పష్టం చేశారు.
‘‘వాస్తవానికి రష్యా సైనికుల భార్యలు దీనిని ప్రోత్సహిస్తారు..‘ వెళ్లండి ఆ ఉక్రేనియన్ మహిళలపై అత్యాచారం చేయండి.. దీన్ని నాతో పంచుకోవద్దు, నాకు చెప్పొద్దు’ అని వారు అంటున్నారు... అందుకే దీనిపై ప్రపంచవ్యాప్తంగా స్పందన రావాల్సి ఉంది.. దీనిని యుద్ధ నేరంగా గుర్తించడం.. నేరస్తులందరినీ జవాబుదారీగా ఉంచడం చాలా ముఖ్యం’’ అని ఒలెనా ఉద్ఘాటించారు.