చంద్రబాబు అరెస్టు‌ వెనుక బీజేపీ హస్తం.. మంత్రి మల్లారెడ్డి

ఏపీ మాజీ సీఎం, టీడీపీ అధినేత చంద్రబాబు నాయుడు అరెస్టయి వారం రోజులు గడుస్తుండగా.. తెలంగాణ నేతలు ఒక్కొక్కరిగా స్పందిస్తున్నారు. మొన్న కేటీఆర్ స్పందించగా.. ఆ తర్వాత ఒక్కొక్కరిగా తమ అభిప్రాయాలను వెలిబుచ్చుకున్నారు. అయితే.. తాజాగా.. మంత్రి మల్లారెడ్డి ఈ విషయంపై నోరు విప్పారు. అయితే.. ముందుగా చంద్రబాబు అరెస్టును మల్లారెడ్డి తీవ్రంగా ఖండించారు. ఏపీ సీఎం జగన్మోహన్ రెడ్డి రాజకీయ కక్షతో చంద్రబాబును అరెస్టు చేయించారని ఆరోపించారు. అయితే.. చంద్రబాబు అరెస్టు వెనుక బీజేపీ హస్తం కూడా ఉందంటూ కీలక వ్యాఖ్యలు చేశారు మల్లారెడ్డి. ఇది వైసీపీ, బీజేపీ కలిసి చేసిన కుట్ర అని ఆక్షేపించారు.

కేంద్ర ప్రభుత్వానికి ఏమాత్రం తెలియకుండానే ఓ రాష్ట్ర మాజీ ముఖ్యమంత్రిని అరెస్టు చేస్తారా? అంటూ మంత్రి మల్లారెడ్డి ప్రశ్నించారు. ఎఫ్ఐఆర్‌లో కనీసం ఆయన పేరు కూడా లేకుండానే అరెస్ట్ చేయడం అన్యాయమన్నారు. స్కిల్ డెవలప్‌మెంట్‌ స్కీంలో చంద్రబాబు ఎలాంటి తప్పు చేయలేదంటూ చెప్పుకొచ్చారు. బాబు కోసం ఐటీ ఉద్యోగులు చేస్తున్న ఆందోళనకు తన మద్దతు తెలియజేశారు మల్లారెడ్డి. చంద్రబాబు అరెస్ట్.. అన్యాయమని, హేయమైన చర్య అంటూ మంత్రి మల్లారెడ్డి పేర్కొన్నారు.

ఇదిలా ఉంటే.. మంత్రి మల్లారెడ్డి గతంలో టీడీపీ నాయకుడిగా ఉన్నారు. మల్లారెడ్డి మాత్రమే కాదు.. బీఆర్ఎస్‌లో ఉన్న చాలా మంది నేతలు మొదట తెలుగు తమ్ముళ్లే కావటంతో.. చంద్రబాబు అరెస్టును ఖండిస్తూ తమ గళాన్ని వినిపిస్తున్నారు. ఎల్బీనగర్ ఎమ్మెల్యే సుధీర్ రెడ్డి అయితే.. ఏకంగా చంద్రబాబు అరెస్టును నిరసిస్తూ ర్యాలీ నిర్వహించారు.

ఇదిలా ఉంటే.. బీఆర్ఎస్ కార్యనిర్వహాక అధ్యక్షుడు కేటీఆర్ మాత్రం.. చంద్రబాబు అరెస్టుతో తమకు ఎలాంటి సంబంధం లేదంటూ తోసిపుచ్చారు. అది వాళ్ల తలనొప్పి అంటూ కేటీఆర్ దాటేశారు. ఇక సీఎం కేసీఆర్ మాత్రం.. ఏపీలో జరిగే పరిణామాలపై ఎప్పటికప్పుడు అప్డేట్స్ తెలుసుకుంటున్నట్టు సమాచారం.