సోషల్ మీడియాలో వైరల్గా మారిన పంజాగుట్ట లేడీ ఎస్సై భావన, ఏఆర్ ఎస్సై రావూరి కిషోర్ ప్రీ వెడ్డింగ్ షూట్పై హైదరాబాద్ సీపీ సీవీ ఆనంద్ స్పందించారు. ఈ వీడియో సాంగ్ కోసం ఇద్దరూ ఎస్సైలే కావటంతో.. పోలీస్ స్టేషన్ ప్రాంగణంలో ఖాకీ డ్రెస్సుల్లో, పోలీసుల వాహనాలను వాడుకుంటూ షూట్ చేయటంపై నెట్టింట.. తీవ్ర దుమారం చెలరేగింది. పోలీసు వాహనాలను తమ పర్సనల్ వీడియో షూట్ కోసం వాడుకోవటం అధికార దుర్వినియోగమే అవుతుందని.. వాళ్లపై చర్యలు తీసుకోవాలంటూ.. నెటిజన్లు తీవ్ర స్థాయిలో కామెంట్లు కుమ్మరించారు. అయితే.. ఈ వీడియోపై స్పందించిన సీపి సీవీ ఆనంద్ మాత్రం అందులో తప్పేముంది అంటూ సింపుల్గా తేల్చేస్తూ.. ఓ పెద్ద ట్వీట్ చేశారు.
ఆ పోలీస్ కపుల్స్ ప్రీ వెడ్డింగ్ వీడియోను రీ ట్వీట్ చేసిన సీపీ.. దీనిపై మిశ్రమ స్పందన వచ్చిందని.. నిజానికి పెళ్లి చేసుకోబోతున్నామన్న ఆనందంలో ఆ పోలీసు జంట కొంచెం అత్యుత్సాహం ప్రదర్శించినట్టుగా చెప్పుకొచ్చారు. ఇది గొప్ప విషయమే అయినప్పటికీ.. కొంచెం ఎబ్బెట్టుగా అనిపించిందని చెప్పుకొచ్చారు. పోలీసు ఉద్యోగమనేది చాలా కష్టతరమైన పని అని.. అందులోనూ మహిళలకు ఇంకా కష్టమైనదని వివరించారు. అయితే.. పంజాగుట్ట ఎస్సై భావన... సేమ్ డిపార్ట్ మెంట్లోనే తన భాగస్వామిని ఎంచుకోవటం కచ్చితంగా సంతోషించాల్సిన విషయమేనని చెప్పుకొచ్చారు. మరోవైపు.. ఇద్దరు పోలీసు అధికారులు మూడు ముళ్లతో ఒక్కటవుతున్న సందర్భంగా.. తీసుకున్న ప్రీ వెడ్డింగ్ షూట్లో డిపార్ట్మెంట్ చిహ్నాలను, దుస్తుల్ని, వాహనాలను ఉపయోగించటంలో నాకైతే ఎలాంటి తప్పు కనిపించట్లేదని సీపీ సీవీ ఆనంద్ అభిప్రాయపడ్డారు.
అయితే.. వాళ్లు ముందుగానే పర్మిషన్ తీసుకుంటే మాత్రం కచ్చితంగా అనుమతి ఇచ్చే వాళ్లమని చెప్పుకొచ్చారు సీవీ ఆనంద్. వాళ్లు చేసిన ఈ పని కొందరికి ఆగ్రహం తెప్పించి ఉండొచ్చని కూడా ఆయనే చెప్పారు. అయితే.. వాళ్ల పెళ్లికి తనను ఆహ్వానించలేదని తెలిపిన సీపీ ఆనంద్.. వాళ్లు పెళ్లికి పిలవక పోయినా.. వెళ్లి ఇద్దరినీ ఆశీర్వదించాలని ఉందంటూ చెప్పుకొచ్చారు. అయితే.. ఈ ఘటన దూమారం రేపుతోన్న సందర్భంగా.. భవిష్యత్తులో ఎవ్వరూ అనుమతి తీసుకోకుండా ఇలాంటి పనులు చేయొద్దని సున్నితంగానే హెచ్చరించారు సీవీ ఆనంద్.
అయితే.. ఇటీవల కాలంలో ప్రీ వెడ్డింగ్ షూట్లకు మార్కెట్లో మాంచి క్రేజ్ ఉంది. పెళ్లికి ముందు కపుల్స్తో ఓ మంచి థీమ్తో ఓ వీడియోను.. వీలైతో ఓ సాంగ్ను సినిమా రేంజ్లో షూట్ చేస్తున్నారు. కొందరు దాన్నే ఆహ్వానంగా బంధువులకు, ఫ్రెండ్స్కు పంపుతున్నారు. ఈ క్రమంలోనే.. లవ్ కం అరెంజ్ మ్యారేజ్ అయిన ఈ పోలీసు జంట.. తమ ప్రేమ ప్రయాణాన్ని సాంగ్ రూపంలో చూపించాలనుకున్నారు. దీంతో.. పోలీస్ డ్రెస్సులు, పోలీస్ వాహనాలను ఉపయోగించారు. కాగా.. ఇది కాస్త ఇప్పుడు సోషల్ మీడియాలో వైరల్గా మారి దుమారం రేపుతోంది. దీనిపై సీవీ ఆనంద్ ఇలా స్పందించటంపై కూడా నెటిజన్లు రకరకాలుగా స్పందిస్తున్నారు.