లంచం పంచుకోవడంలో పోలీసుల మధ్య గొడవ,,,నడిరోడ్డుపైనే కొట్టుకున్నారు

లంచం వ్యవస్థకు పట్టిన చీడ పురుగు అని మనం రోజూ చర్చించుకునే విషయమే. లంచం తీసుకోవడం నేరమని.. అలా లంచం తీసుకునే ప్రభుత్వ అధికారులను పట్టుకునేందుకు ఏకంగా ఓ డిపార్ట్‌మెంట్ ఉన్నా కొందరు అధికారులు మాత్రం ఏ మాత్రం సంకోచం లేకుండా అందినకాడికి దోచుకుంటూనే ఉన్నారు. అయితే తెరవెనక గుట్టు చప్పుడు కాకుండా తీసుకునే అధికారులు ఎంతో మంది ఉంటారు. అలాంటి వారు తీసుకున్న విషయం కూడా తెలియకుండా ఉంటుంది. కానీ తాజాగా జరిగిన ఓ ఘటన గురించి వింటే మాత్రం ఆశ్చర్యపోవాల్సిందే. ఎందుకంటే లంచం తీసుకోవడమే నేరం అంటే.. తీసుకున్న ఆ లంచం సొమ్మును పంచుకునేందుకు ఇద్దరు పోలీసులు నడిరోడ్డుపై కొట్టుకోవడం మరో పెద్ద చర్చకు దారి తీసింది. బిహార్‌లో ఈ ఘటన చోటు చేసుకుంది.

బిహార్‌ నలంద జిల్లాలో ఇద్దరు పోలీసులు నడి రోడ్డుపై గొడవకు దిగారు. ఒకరి కాలర్ మరొకరు పట్టుకుని పిడి గుద్దులు కురిపించుకున్నారు. ఆ తర్వాత అందులోని ఓ పోలీసు.. పక్కనే ఉన్న పోలీస్ వాహనం డోరు తీసి అందులో ఉన్న లాఠీ తీసుకువచ్చి మరో పోలీస్‌పై దాడికి దిగారు. అయితే అది చూసి అటుగా రోడ్డుపై వెళ్తున్న వాహనదారులు తమ వాహనాలు ఆపి చూడటం ప్రారంభించారు. అందులో కొందరు వీడియోలు కూడా తీశారు. గొడవలు, దాడులు ఆపాల్సిన పోలీసులే నడి రోడ్డుపై కొట్టుకోవడంతో వారు ఏం చేయాలో అర్థం కాక అలాగే నిలబడిపోయారు.

అయితే అక్కడ ఉన్న వారు అసలు ఆ పోలీసులు ఎందుకు కొట్టుకుంటున్నారో తెలిసి నోరెళ్లబెట్టారు. లంచంగా తీసుకున్న డబ్బును పంచుకోవడంతో ఇద్దరి మధ్య మాటా మాటా పెరిగి ఒకరిపై ఒకరు నడిరోడ్డుపై కొట్టుకోవడానికి దారి తీసిందని తెలిసింది. అయితే వారు కొట్టుకోవడాన్ని వీడియోలు తీసిన స్థానికులు వాటిని సోషల్ మీడియాలో ఉంచడంతో వైరల్‌గా మారాయి. అయితే ఈ విషయం పోలీస్ ఉన్నతాధికారులకు తెలిస్తే మీ ఇద్దరి ఉద్యోగాలు ఊడిపోతాయని వాహనదారులు హెచ్చరించినా వారు వెనక్కి తగ్గకుండా ఒకరిపై ఒకరు దాడి చేసుకుంటూనే ఉన్నారు. అవన్నీ ఆ వీడియోల్లో రికార్డ్ అయ్యాయి. చివరికి వారు ఇద్దరికి సర్ది చెప్పి విడిపించారు.

నడిరోడ్డుపై ఇద్దరు పోలీసులు కొట్టుకోవడంపై నలంద జిల్లా పోలీసులు స్పందించారు. విషయం తెలిసిన వెంటనే ఇద్దరు పోలీసులను ఆఫీస్‌కు పిలిపించినట్లు ఉన్నతాధికారులు తెలిపారు. ఈ ఘటనపై దర్యాప్తు చేస్తున్నామని.. ఇద్దరు పోలీసులపై క్రమ శిక్షణ చర్యలు తీసుకుంటామని వెల్లడించారు. ఇద్దరినీ సస్పెండ్‌ చేయడం కాకుండా.. శాశ్వతంగా ఉద్యోగాల నుంచి తొలగించాలని నెటిజన్లు డిమాండ్ చేస్తున్నారు. ఇలాంటి పోలీసుల ప్రవర్తనతో మొత్తం బిహార్‌ పోలీసులకు చెడ్డపేరు వస్తోందని స్థానికులు అభిప్రాయం వ్యక్తం చేస్తున్నారు.