ట్రెండింగ్
Epaper    English    தமிழ்

నెట్ బ్యాంకింగ్ పనిచేయలేదని బ్యాంక్ కంప్యూటర్ ఎత్తుకెళ్లిన వ్యక్తి

national |  Suryaa Desk  | Published : Sun, Jun 07, 2020, 05:09 PM

ఒక్కోసారి బ్యాంకు సర్వీసులు.. కస్టమర్ల సహనానికి పరీక్ష పెడుతూ ఉంటాయి. సరిగ్గా అవసరం ఉన్న సమయానికే నెట్ బ్యాంకింగ్ మొరాయించి ఇబ్బంది పెడుతుంది. అలాంటి సమయంలో కస్టమర్ కేర్‌కు ఫోన్ చేసినా పెద్దగా స్పందన ఉండదు. దీంతో కస్టమర్లు మరింత ఆగ్రహానికి గురవుతారు. అయితే, ఈ వ్యక్తి కోపంతో ఇంట్లో కుర్చొలేదు. నెట్ బ్యాంకింగ్ పనిచేయడం లేదనే కారణంతో ఏకంగా బ్యాంకుకే వెళ్లిపోయాడు. అంతటి ఆగకుండా బ్యాంకులోని సీపీయూని పీకేసి ఇంటికి తీసుకెళ్లిపోయాడు. అహ్మదాబాద్‌లో చోటుచేసుకున్న ఈ ఘటన ఇప్పుడు సోషల్ మీడియాలో చర్చనీయంగా మారింది. ఎస్పీ జ్యువెలర్స్ యజమాని సుజయ్ షా ఇటీవల బ్యాంకు ఆఫ్ బరోడాకు ఓ ఈమెయిల్ పంపించాడు. తనకు ఇంటర్నేట్ బ్యాంకింగ్ సేవలు ఇంకా అందుబాటులోకి రాలేదని, వెంటనే సరిచేయాలని కోరాడు. అయితే, ఆ మెయిల్‌కు బ్యాంకు నుంచి ఎలాంటి సమాధానం రాలేదు. దీంతో ఆగ్రహానికి గురైన సుజయ్ బ్యాంకు వెళ్లాడు. మకర్బా బ్రాంచ్ మేనేజర్ వినీత్ గురుదత్తాను కలిసి వాగ్వాదానికి దిగాడు. తనకు వెంటనే నెట్ బ్యాంకింగ్ సేవలు అందించకపోతే బ్యాంకులో సీపీయూను తీసుకెళ్లిపోతా అని హెచ్చరించాడు. దీంతో గురుదత్తా ఐటీ టీమ్‌తో అతని సమస్యను వివరిస్తున్న సమయంలో సుజయ్ బ్యాంకులోని ఓ కంప్యూటర్ సీపీయూను పీకేశాడు. అలా చేయొద్దని సిబ్బంది వారించినా సరే వినకుండా సీపీయూను ఇంటికి తీసుకెళ్లిపోయాడు. ఆ తర్వాతి రోజు తిరిగి బ్యాంకుకు ఇచ్చేశాడు. కానీ, అప్పటికే ఆలస్యమైపోయింది. అతడు చేసిన ఘనకార్యంపై బ్యాంక్ మేనేజర్ అప్పటికే పోలీసులకు ఫిర్యాదు చేశాడు. దీంతో పోలీసులు అతడిని అదుపులోకి తీసుకున్నారు. బ్యాంకు సొత్తును చోరీ చేసిన కారణంతో సుజయ్‌పై కేసు నమోదు చేశారు.






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com