పవన్ కళ్యాణ్ కోసం 1300 కిలోమీటర్ల నడక.. ఏపీ డిప్యూటీ సీఎంకు అభిమాని చిన్న రిక్వెస్ట్

ఆంధ్రప్రదేశ్ డిప్యూటీ సీఎం పవన్ కళ్యాణ్‌పై అభిమానంతో ఓ యువకుడు సుదీర్ఘమైన పాదయాత్ర చేపట్టారు. విజయవాడ నుంచి కోల్‌కతాకు వెళుతున్నారు.. మార్గ మధ్యలో అతడి గురించి ఆరా తీస్తే ఆసక్తికర విషయాలు తెలిశాయి. విజయవాడ 60వ డివిజన్ వాంబే కాలనీ ఈ బ్లా‌క్‌లో నివసిస్తున్న దుర్గా మల్లేశ్వరరావు పవన్ కళ్యాణ్ వీరాభిమాని.. కూలి పనులు చేసుకుంటూ జీవిస్తున్నాడు. అయితే ఏపీ ఎన్నికల్లో పవన్ కళ్యాణ్ గెలిస్తే విజయవాడ నుండి కోల్‌కతా కాళీమాత ఆలయానికి కాలి నడకన వస్తానని మొక్కుకున్నాడు.

ఏపీ ఎన్నికలలో పవన్ కళ్యాణ్ అత్యధిక మెజార్టీతో గెలవడంతో పాటుగా.. ఆంధ్రప్రదేశ్ డిప్యూటీ సీఎంగా ప్రమాణ స్వీకారం చేసిన సంగతి తెలిసిందే. ఈ క్రమంలో దుర్గా మల్లేశ్వరారవు అనుకున్న మొక్కుబడి తీర్చుకోవడానికి.. ఈనెల ఐదో తేదీన విజయవాడ నుంచి కోల్‌కతా కాలినడకన బయల్దేరి వెళ్లాడు. పవన్ అభిమాని ఇప్పటి వరకు 1000 కిలోమీటర్ల నడక పూర్తి చేయగా.. మరో 300 కిలోమీటర్లు నడిచి కాళీమాతను దర్శించుకోనున్నారు. అయితే ఈ క్రమంలో ఆ యువకుడిని కొందరు పలకరించారు.. అప్పుడు ఈ విషయాన్ని ఆయనే స్వయంగా చెప్పాడు.

తన కోరిన నెరవేర్చిన కోల్‌కతాలో కాళీమాతను దర్శించుకున్న తర్వాత.. తాను అభిమానించే పవన్ కళ్యాణ్‌ను ఒకసారి కలవాలనుకుంటున్నట్లు చెప్పారు. ఆయన ఆశీర్వాదం తీసుకోవాలని కోరిక ఉందని.. తాను ఏమి ఆశించి ఇలా పాదయాత్ర చేయలేదని.. పవన్ కళ్యాణ్‌పై ఉన్న అభిమానాన్ని చాటుకోవడానికి ఇలా చేశానన్నారు. తన యొక్క సందేశాన్ని సోషల్ మీడియా ద్వారా డిప్యూటీ సీఎం పవన్ కళ్యాణ్‌‌కు చేరేలా చూడాలని ఆశిస్తున్నారు.

డిప్యూటీ సీఎంతో హోంమంత్రి భేటీ

ఏపీ డిప్యూటీ సీఎం పవన్ కళ్యాణ్‌తో హోంమంత్రి అనిత సమావేశం అయ్యారు. రాష్ట్రంలో శాంతిభద్రతలు, దీపావళి కావడంతో.. ముందస్తు భద్రతా ఏర్పాట్లపై చర్చించారు. 185 అగ్నిమాపక స్టేషన్లలో సిబ్బంది ఎక్కడ ప్రమాదం జరిగినా అప్రమత్తంగా ఉండాలని ఆదేశాలిచ్చినట్లు హోం మంత్రి తెలిపారు. టపాసుల అక్రమ తయారీపై పోలీస్, ఫైర్‌ వ్యవస్థలకు 100, 101 నంబర్లకు ఫోన్లు చేసి ప్రజలు ఫిర్యాదు చేసేలా ఏర్పాట్లు చేశామన్నారు.