జైలులో భారీ సొరంగం.. అధికారుల కళ్లుగప్పి పారిపోయిన ఖైదీలు

సాధారణంగా ఏదైనా నేరం చేసిన వారిని జైలుకు తరలిస్తారు. కేసు విచారణలో ఉన్నపుడు విచారణ ఖైదీగా.. విచారణ పూర్తయి కోర్టు శిక్ష విధించిన తర్వాత రిమాండ్ ఖైదీలుగా శిక్ష అనుభవిస్తూ ఉంటారు. అయితే చాలామంది నేరస్థులు.. జైలు నుంచి పారిపోయేందుకు అనేక ప్రయత్నాలు చేస్తూ ఉంటారు. జైలు గోడలు బద్ధలు కొట్టి పారిపోవడం, జైలులో ఉన్న కిటికీల నుంచి పారిపోవడం చేస్తూ ఉంటారు. అందుకే సాధారణంగా జైలు అంటేనే ఎత్తైన, ధృడమైన గోడలతో పారిపోవడానికి వీలు లేకుండా నిర్మిస్తూ ఉంటారు. అయితే ఈ ఘటనలో మాత్రం జైలు అధికారులకు ఏ మాత్రం అనుమానం రాకుండా.. కొందరు ఖైదీలు రహస్య సొరంగం నుంచి.. గుట్టుచప్పుడు కాకుండా జైలు నుంచి బయటపడ్డారు. అది గుర్తించిన జైలు అధికారులు పరారీలో ఉన్న ఖైదీల జాడ కనుగొనే ప్రయత్నాలు చేపట్టారు.

రష్యాలో జరిగిన ఈ సంఘటన ప్రస్తుతం స్థానికంగా సంచలనం రేపుతోంది. రాజధాని మాస్కోకు 300 కిలోమీటర్ల దూరంలో ఉన్న లిపెట్స్క్ నగరంలో ఈ సంఘటన చోటు చేసుకుంది. అయితే ఖైదీలు పారిపోయిన విషయం కూడా జైలు అధికారులు గుర్తించకపోవడం గమనార్హం. సాధారణంగా జైలులో ఎంతమంది ఖైదీలు ఉన్నారనే లెక్కలు బయటికి తీయగా.. అందులో తేడాలు వచ్చాయి. దీంతో అధికారులు జైలులో తనిఖీలు చేపట్టగా అసలు విషయం వెలుగులోకి వచ్చింది. జైలులో ఉన్న ఒక రహస్య టన్నెల్‌ ద్వారా వారు తప్పించుకున్నట్లు గుర్తించారు.

జైలులో సాధారణ తనిఖీల్లో భాగంగా అధికారులు ఒక అండర్‌గ్రౌండ్‌ టన్నెల్‌ను గుర్తించారు. అది చూసిన జైలు అధికారులకు అనుమానం వచ్చి ఆ జైల్లో ఎంతమంది ఖైదీలు శిక్ష అనుభవిస్తున్నారో లెక్కలు తీశారు. అయితే అందులో ఆరుగురు ఖైదీల లెక్క తక్కువ రావడంతో వారంతా జైలు నుంచి ఆ సొరంగం గుండా బయటికి పారిపోయినట్లు గుర్తించినట్లు జైలు అధికారులు తెలిపారు. ఈ నేపథ్యంలో పారిపోయిన ఖైదీలను ఎట్టి పరిస్థితుల్లో అయినా పట్టుకోవాలని వారికోసం గాలింపు ముమ్మరం చేశారు.

రష్యాలో ప్రధాని మోదీకి అపూర్వ స్వాగతం.. రష్యన్ మహిళల భారత సంప్రదాయ నృత్యం

రష్యాలో వివిధ నేరాలకు పాల్పడిన వారిపై వెంటనే దర్యాప్తు జరిపి.. విచారణ పూర్తి చేసి జైళ్లకు పంపిస్తారు. అయితే 2 ఏళ్ల క్రితం రష్యా - ఉక్రెయిన్‌ యుద్ధం ప్రారంభం అయినప్పటి నుంచి కేసుల విచారణ, ఖైదీలకు శిక్ష వేయడం, జైళ్లకు తరలించే సంఖ్య తగ్గుతూ వస్తోంది. యుద్ధంలో ఉక్రెయిన్‌ సైనికులతో పోరాడేందుకు రష్యా సైన్యం వారిని నియమిస్తోంది. దీంతో విచారణ ఆలస్యం అవుతోంది. ఇదిలా ఉంటే రష్యాలో జైళ్ల నుంచి ఖైదీలు తప్పించుకోవడం చాలా అరుదుగా జరుగుతూ ఉంటుంది. ఒకవేళ ఎవరైనా ఖైదీలు జైలు నుంచి పారిపోయినా వారిని వీలైనంత త్వరగా పట్టుబడతారు.