ఏపీలో స్విగ్గీ బహిష్కరణ ఉండదు.. వెనక్కి తగ్గిన హోటళ్లు

ఏపీలో స్వి్గ్గీ కస్టమర్లకు రిలీఫ్ అనే చెప్పొచ్చు. ఎందుకంటే స్విగ్గీని బ్యాన్ చేస్తూ తీసుకున్న నిర్ణయంపై ఆంధ్రప్రదేశ్ హోటల్స్ అసోసియేషన్ వెనక్కి తగ్గింది. నగదు చెల్లింపులు చేయకుండా ఇబ్బంది పెడుతున్నారని.. ఈ నేపథ్యంలో స్విగ్గీని బహిష్కరించాలని నిర్ణయించుకున్నట్లు ఏపీ హోటల్స్ అసోసియేషన్ ఇటీవల ప్రకటించిన సంగతి తెలిసిందే. అక్టోబర్ 14 నుంచి స్విగ్గీకి అమ్మకాలు నిలిపివేయనున్నట్లు ఏపీ హోటల్స్ అసోసియేషన్ ఇటీవల ప్రకటించింది. అయితే ఈ నిర్ణయాన్ని ఇప్పుడు వెనక్కి తీసుకున్నారు. ఏపీ హోటల్స్ అసోసియేషన్ నిర్ణయం నేపథ్యంలో స్విగ్గీ యాజమాన్యం.. ఏపీ హోటల్స్ అసోసియేషన్ ప్రతినిధులతో చర్చలు జరిపింది. విజయవాడలో జరిగిన చర్చల తర్వాత స్విగ్గీ బహిష్కరణ నిర్ణయాన్ని ఏపీ హోటల్స్ అసోసియేషన్ వెనక్కి తీసుకుంది.

మరోవైపు ఏపీ హోటల్స్‌ అసోయేషన్‌ అధ్యక్షుడు ఆర్‌.వి.స్వామి, కన్వీనర్‌ రమణరావు సహా ఇతర ప్రతినిధులు.. స్విగ్గీ యాజమాన్య బృందంతో గురువారం విజయవాడలో సుధీర్ఘ చర్చలు జరిపారు. ఈ చర్చల్లో 12 అంశాలపై చర్చించారు. చర్చల సందర్భంగా ఏపీ హోటల్స్ అసోసియేషన్ డిమాండ్లను స్విగ్గీ యాజమాన్య బృందం అంగీకరించినట్లు తెలిసింది. తమ నిర్ణయాలను తర్వాత ఈమెయిల్ ద్వారా తెలియజేస్తామని సైతం హామీ ఇచ్చినట్లు సమాచారం. దీంతో స్విగ్గీని బహిష్కరించాలంటూ ఇటీవల తీసుకున్న నిర్ణయాన్ని వెనక్కి తీసుకోవాలని ఏపీ హోటల్స్ అసోసియేషన్ నిర్ణయించింది. మరోవైపు చర్చల సందర్భంగా రెండు పక్షాల మధ్యన కుదిరిన ఒప్పందాలు వచ్చే నెల అంటే నవంబర్ ఒకటి నుంచి అమల్లోకి రానున్నాయి.

మరోవైపు హోటళ్లకు నగదు చెల్లింపులు చేయకుండా స్విగ్గీ యాజమాన్యం ఇబ్బంది పెడుతోందని ఆరోపిస్తూ స్విగ్గీని బాయ్ కాట్ చేయాలని ఇటీవల ఏపీ హోటల్స్ అసోసియేషన్ నిర్ణయించింది. ఇందులో భాగంగా అక్టోబర్ 14 నుంచి హోటళ్లు, రెస్టారెంట్లలో స్విగ్గీకి అమ్మకాలు ఆపివేయనున్నట్లు తెలిపింది. క్యాష్ పేమెంట్స్ ఆలస్యం చేస్తున్నారని.. దీనిపై ఇప్పటికే స్విగ్గీ ప్రతినిధులతో చర్చలు జరిపామని.. అయితే ఎలాంటి ఉపయోగం లేదని హోటల్స్ అసోసియేషన్ ఇటీవల తెలిపింది. జొమాటో యాజమాన్యం సానుకూలంగా స్పందించిందని.. కానీ స్విగ్గీ మాత్రం కాలయాపన చేస్తోందని తెలిపింది. ఈ నేపథ్యంలోనే అన్ని జిల్లాలకు చెందిన హోటల్స్ అసోసియేషన్ ప్రతినిధులతో చర్చించిన మీదట.. స్విగ్గీని బహిష్కరించాలని నిర్ణయించినట్లు ఏపీ హోటల్స్ అసోసియేషన్ ఇటీవల తెలిపింది. అయితే స్విగ్గీ యాజమాన్య బృందంతో జరిపిన చర్చలు ఫలించడంతో ఈ బాయ్ కాట్ నిర్ణయాన్ని వెనక్కి తీసుకున్నారు.