మద్యం షాపులకు మస్తు డిమాండ్.. విదేశాల నుంచి దరఖాస్తులు

ఏపీలోని మద్యం షాపులకు విదేశాల నుంచి దరఖాస్తు చేస్తున్నారు. అమెరికా, యూరోప్ దేశాల నుంచి కూడా ఆన్‌లైన్‌లో దరఖాస్తులు వచ్చాయి. ఈ విషయాన్ని ఎక్సైజ్ శాఖ అధికారులు వెల్లడించారు. లిక్కర్ షాపుల కోసం అమెరికా నుంచి 20 దరఖాస్తులు వచ్చాయని. ఏపీ ఎక్సైజ్ శాఖ డిప్యూటీ కమిషనర్ చైతన్య మురళి తెలిపారు. దరఖాస్తు చేసుకునేందుకు రెండు రోజులు గడువు పొడిగించిన నేపథ్యంలో.. మరిన్ని దరఖాస్తులు వచ్చే అవకాశం ఉందన్నారు. అక్టోబర్ 11వ తేదీ సాయంత్రం ఏడు గంటల వరకూ లిక్కర్ షాపుల కోసం దరఖాస్తు చేసుకునే అవకాశం ఉంది.

మరోవైపు బుధవారం రాత్రి వరకూ మద్యం దుకాణాల లైసెన్సుల కోసం రాష్ట్రవ్యాప్తంగా 57,709 దరఖాస్తులు అందినట్లు ఎక్సైజ్ శాఖ అధికారులు తెలిపారు. ఈ దరఖాస్తుల ద్వారా ఏపీ ప్రభుత్వానికి రూ. 1,154.18 కోట్ల మేర ఆదాయం వచ్చినట్లు చెప్పారు. లిక్కర్ షాపుల లైసెన్స్ కోసం దరఖాస్తు చేసుకునేందుకు రేపు సాయంత్రం వరకూ గడవుంది. ఈ నేపథ్యంలో దరఖాస్తుల సంఖ్య మరింత పెరిగే అవకాశం ఉంది. బుధవారం ఒక్కరోజే 16,361 దరఖాస్తులు రాగా.. గురువారం, శుక్రవారం అంతకు మించి వచ్చే అవకాశాలు కనిపిస్తున్నాయి. ఈ రెండు రోజుల్లో మరో 40 వేల దరఖాస్తులు వచ్చే అవకాశముందని అంచనా.

మరోవైపు బుధవారం రాత్రి వరకూ వచ్చిన దరఖాస్తుల ఆధారంగా ఎన్టీఆర్ జిల్లా వత్సవాయిలో లిక్కర్ షాపులకు భారీగా డిమాండ్ ఉంది. ఇక్కడ రెండు మద్యం దుకాణాలను ప్రభుత్వం నోటిఫై చేసింది . వీటిలో ఒకదానికి 110, మరో దానికి 107 చొప్పున దరఖాస్తులు వచ్చినట్లు ఎక్సైజ్ శాఖ అధికారులు తెలిపారు. దరఖాస్తు ఫీజు రూపంలో రూ. 4.22 కోట్ల మేర ఆదాయం సమకూరినట్లు వెల్లడించారు. ఇక తిరుపతి జిల్లా పాకాల మండలంలోని నంబరు 136వ షాపు, సూళ్లూరుపేట పరిధిలోని 175, 180, 183, 187 నంబర్ల లిక్కర్ షాపులకు ఒక్కొక్క అప్లికేషన్ మాత్రమే వచ్చింది. రాష్ట్రవ్యాప్తంగా మొత్తం 13 లిక్కర్ షాపులకు కేవలం ఒక్కొక్క దరఖాస్తు మాత్రమే వచ్చింది.

రేపు సాయంత్రం ఏడు గంటలతో దరఖాస్తు చేసుకునేందుకు గడువు ముగుస్తుంది. 12,13వ తేదీల్లో దరఖాస్తుల పరిశీలన ఉంటుంది. 14వ తేదీ ఆయా జిల్లాలలో కలెక్టర్ల పర్యవేక్షణలో లిక్కర్ షాపుల లైసెన్స్ కోసం లాటరీ తీస్తారు. అదే రోజు కేటాయింపు పూర్తిచేస్తారు.అక్టోబరు 16వ తేదీ నుంచి ఏపీ వ్యాప్తంగా నూతన మద్యం విధానం ప్రకారం ప్రైవేట్ మద్యం షాపులు అందుబాటులోకి వస్తాయి.