రోడ్డుపై బాలుడు.. చేతులకు కట్లు,,,ఏమైందని ఆరా తీస్తే అసలు సంగతి తెలిసింది
Andhra Pradesh Telugu | Suryaa Desk | Published : Tue, Oct 01, 2024, 07:03 PM
ప్రకాశం జిల్లా ఒంగోలులో విచిత్రమైన సన్నివేశం కనిపించింది. ఓ బాలుడు రోడ్డుపై కనిపించాడు.. రెండు చేతులు టవల్‌తో కట్టేసి ఉన్నాయి. ఏం జరిగిందని ఆరా తీస్తే.. పెద్ద స్టోరీనే ఉంది. ఒంగోలుకు చెందిన దంపతులు బస్టాండ్‌ కూడలి సమీపంలోని మార్కెట్‌కు తమ ఐదేళ్ల కుమారుడితో కలిసి వెళ్లారు. అక్కడ వస్తువుల కొనుగోలు చేస్తుండగా.. బాలుడు షాపుల్లో వస్తువులు తీయకుండా తల్లి రెండు చేతులను టవల్‌తో కట్టేసింది. ఆమె షాపుల వెంట తిరుగుతూ బేరంలో ఉండగా.. కుమారుడిని గమనించమని భర్తకు చెప్పింది.
కొద్దిసేపటి తర్వాత భర్త మద్యం తాగేందుకు బాలుడ్ని అక్కడే వదిలేసి వెళ్లిపోయాడు. ఆ సమయంలో ఆ చిన్నారి తప్పిపోయి మార్కెట్‌లో ఏడుస్తూ అటూ, ఇటూ రోడ్డుపైకి వెళ్లాడు. ఇంతలో బాలుడు కనిపించకపోవడంతో తల్లి కంగారుపడింది.. బస్టాండ్‌ దగ్గర గాలించింది. కొద్దిసేపటి తర్వాత బాలుడ్ని గుర్తించిన స్థానికులు దగ్గరకు తీశారు.. వివరాల కోసం ఆరా తీశారు. బాలుడు చేతులకు ఉన్న కట్లు తీసేందుకు ప్రయత్నించగా.. 'మా అమ్మ చేతులు కట్టేసింది.. తీస్తే తిడుతుంది.. వద్దు' అని చెప్పాడు. ఆ తర్వాత బాలుడి కట్లు విప్పి బస్టాండ్‌కు తీసుకెళ్లగా.. తల్లిని గమనించిన బాలుడు ఏడ్చాడు. స్థానికులు బాలుడ్ని ఆమెకు అప్పగించారు.
|
|