పిఠాపురం మహిళలకు పవన్ కళ్యాణ్ వదిన చేతుల మీదుగా స్పెషల్ గిఫ్ట్‌ల పంపిణీ

పిఠాపురం మహిళలకు డిప్యూట సీఎం పవన్ కళ్యాణ్ పంపించిన స్పెషల్ గిఫ్ట్‌లు పంపిణీ చేశారు. శ్రావణ మాసం చివరి శుక్రవారం పిఠాపురంలోని శక్తిపీఠం శ్రీ పురూహూతిక అమ్మవారి ఆలయంలో సంప్రదాయబద్ధంగా వరలక్ష్మీ వ్రత పూజలు నిర్వహించారు. వ్రతంలో పాల్గొన్న ఆడపడుచులకు స్థానిక శాసనసభ్యులు, డిప్యూటీ సీఎం పవన్ కళ్యాణ్ సొంత ఖర్చులతో పంపిన పసుపు, కుంకుమ, చీరలు అందజేశారు. పవన్ తరఫున ఆయన వదిన, జనసేన పార్టీ రాష్ట్ర ప్రధాన కార్యదర్శి నాగబాబు సతీమణి శ్రీమతి పద్మజ, ఎమ్మెల్సీ పిడుగు హరిప్రసాద్ పంపిణీ చేశారు. వరలక్ష్మీ వ్రతంలో పాల్గొన్న ఆడపడుచులందరికీ పసుపు, కుంకుమ, చీరలు కానుకగా అందజేశారు. కొణిదెల పద్మజ ప్రతి ఒక్కరినీ ఆప్యాయంగా పలకరిస్తూ, బొట్టు పెట్టి మరీ సారె అందించారు.

పురూహూతిక అమ్మవారి సామూహిక వరలక్ష్మీ వ్రతం నిర్వహించారు. పిఠాపురం ఆడపడుచులతో కలసి పద్మజ వరలక్ష్మీ వ్రతం ఆచరించారు. వేద పండితులు మంత్రోచ్ఛరణలతో ఘనంగా వరలక్ష్మీ వ్రతాన్ని నిర్వహించారు. సామూహిక వరలక్ష్మీ వ్రతాల నేపధ్యంలో ఉదయం 5 గంటల నుంచే పురూహూతిక అమ్మవారి ఆలయం వద్ద భక్తులు బారులు తీరారు. వందలాదిగా తరలివచ్చి భక్తి శ్రద్దలతో వ్రతం ఆచరించారు. భక్తుల రద్దీ ఎక్కువగా ఉండటంతో మూడు బ్యాచులుగా వ్రతాలు నిర్వహించే విధంగా ఆలయ అధికారులు ఏర్పాట్లు చేశారు. ఆలయ ఈవో భవాని ఏర్పాట్లను పర్యవేక్షించారు.

అంతకు ముందు పద్మజ పురూహూతిక అమ్మవారిని, శ్రీ కుక్కుటేశ్వర స్వామిని దర్శించుకుని ప్రత్యేక పూజలు నిర్వహించారు. ఆలయంలో తలపెట్టిన సామూహిక వరలక్ష్మి వ్రత పూజలకు అమ్మవారి ఆశీస్సులు స్వీకరించారు. వ్రతం ఆచరించే ఆడపడుచులందరికీ అమ్మవారి కృపాకటాక్షాలు కలగాలని ఆకాంక్షించారు. ఈ కార్యక్రమంలో జనసేన పార్టీ పిఠాపురం నియోజకవర్గ ఇంఛార్జ్ మర్రెడ్డి శ్రీనివాస్, జనసేన పార్టీ నేతలు, కార్యకర్తలు పాల్గొన్నారు. డిప్యూటీ సీఎం పవన్ కళ్యాణ్.. తాను ప్రాతినిధ్యం వహిస్తున్న పిఠాపురం నియోజకవర్గంలో యువత కోసం ఇటీవల జాబ్ మేళా కూడా నిర్వహించారు. ఈ జాబ్ మేళాలో 700మందికిపైగా ఉద్యోగాలకు ఎంపిక కాగా.. వారికి నియామకపత్రాలు అందజేశారు.