ఏలూరు జిల్లాలో వైసీపీకి వరుస షాకులు.. ఈసారి గట్టి దెబ్బ

ఏపీ ఎన్నికల్లో ఘోర పరాజయం తర్వాత వైసీపీ వరుస షాకులు తగులుతున్నాయి. కొంతమంది ముఖ్య నేతలు తమ పదవులకు రాజీనామాలు చేస్తుంటే.. ద్వితీయ శ్రేణి నాయకులు పక్కచూపులు చూస్తున్నారు. ముఖ్యంగా మున్సిపాలిటీలు, కార్పొరేషన్‌లలో గెలుపొందిన కౌన్సిలర్లు, కార్పొరేటర్లు.. అధికార పార్టీలోకి ప్లేటు ఫిరాయిస్తున్నారు. తాజాగా ఏలూరు జిల్లాలో వైఎస్సార్‌ కాంగ్రెస్ పార్టీకి మరో షాక్ తగిలింది. ఇటీవలే మాజీ డిప్యూటీ సీఎం ఆళ్ల నాని వైసీపీకి రాజీనామా చేశారు. ఏలూరు జిల్లా వైసీపీ అధ్యక్ష పదవితో పాటుగా వైసీపీ పార్టీ ప్రాథమిక సభ్యత్వానికి కూడా రాజీనామా చేస్తున్నట్లు ప్రకటించారు. అయితే ఇంకా ఆ షాక్ నుంచి తేరుకోకముందే.. మరోసారి ఏలూరులో వైసీపీకి గట్టిదెబ్బ తగిలింది.

ఏలూరు మేయర్ నూర్జహాన్ టీడీపీలో చేరారు. మేయర్ నూర్జహాన్, ఆమె భర్త పెదబాబు వైసీపీని వీడి తెలుగుదేశం పార్టీ కండువా కప్పుకున్నారు. ఉండవల్లిలోని నివాసంలో మంత్రి నారా లోకేష్ సమక్షంలో నూర్జహాన్, ఆమె భర్త టీడీపీ తీర్థం పుచుకున్నారు. ఏలూరు ఎమ్మెల్యే బడేటి రాధాకృష్ణ నేతృత్వంలో వీరితో పాటుగా ఈయూడీఏ మాజీ ఛైర్మన్‌, ప్రస్తుతం ఏలూరు వైసీపీ పట్టణ అధ్యక్షుడు బి.శ్రీనివాస్‌, ఏఎంసీ మాజీ ఛైర్మన్‌ ఎం.మైబాబు సహా పలువురు ముఖ్యనేతలు టీడీపీలో చేరారు. దీంతో ఏలూరు నియోజకవర్గంలో వైసీపీకి గట్టిదెబ్బ తగిలిందని రాజకీయ విశ్లేషకులు భావిస్తున్నారు.

మరోవైపు పార్టీ మారిన సందర్భంగా ఏలూరు మేయర్ నూర్జహాన్ కీలక వ్యాఖ్యలు చేశారు. ప్రత్యేక పరిస్థితుల్లోనే పార్టీ మారాల్సి వస్తోందన్నారు. వైసీపీలో అభివృద్ధి చేయలేకపోయామన్న మేయర్.. అందుకే టీడీపీలో చేరినట్లు చెప్పారు. ఇక త్వరలోనే 40 మంది కార్పొరేటర్లు టీడీపీలో చేరతారని తెలిపారు. మరోవైపు ఎన్నికల్లో ఓడిపోయిన తర్వాత ఆళ్ల నాని వైసీపీ కార్యకర్తలను వదిలేశారని స్థానిక ఎమ్మెల్యే బడేటి రాధాకృష్ణ విమర్శించారు. కార్యకర్తలను వదిలేసి రాజీనామా చేసి పోయారంటూ సెటైర్లు వేశారు. అభివృద్ధిలో భాగస్వామ్యం అయ్యేందుకు ముందుకు వచ్చేవారికి టీడీపీలో ఎప్పటికీ స్వాగతం ఉంటుందని తెలిపారు. అయితే మొన్నటి వరకూ ఏలూరు వైసీపీ ఇంఛార్జిగా ఉన్న ఆళ్ల నాని పార్టీని వీడటం,, ఆ తర్వాత పట్టణ అధ్యక్షుడు కూడా గుడ్ బై చెప్పడంతో ఏలూరు వైసీపీ శ్రేణులు నైరాశ్యంలో ఉన్నాయి.