అన్నవరం, సింహాచలంలో సామూహిక వరలక్ష్మీ వ్రతాలు

ఉత్తరాంధ్రవాసుల ఆరాధ్య దైవం సింహాచలం అప్పన్న ఆలయంలో ఆగస్ట్ 30వ తేదీ సామూహిక వరలక్ష్మీ వ్రతాలు నిర్వహించనున్నారు. శ్రావణ శుక్రవారాన్ని పురస్కరించుకుని ఆగస్ట్ 30వ తేదీ ఉదయం తొమ్మిది గంటల నుంచి సామూహిక వరలక్ష్మీ వ్రతాలను నిర్వహిస్తున్నట్లు ఆలయ నిర్వాహకులు తెలిపారు. ఇక ఈ వరలక్ష్మీ వ్రతానికి ప్రవేశం పూర్తిగా ఉచితమని ఆలయ అధికారులు తెలిపారు. అలాగే వరలక్ష్మీ వ్రతంలో పాల్గొనే మహిళలకు దేవస్థానమే పూర్తి ఉచితంగా పూజా సామాగ్రిని, ప్రతిమ, ప్రసాదం, జాకెట్ అందిస్తుందని తెలిపారు. అలాగే కొండ పైకి ఉచితంగా ప్రయాణ సౌకర్యం కూడా ఏర్పాటు చేశారు. సామూహిక వరలక్ష్మీ వ్రతం పూర్తైన తర్వాత అప్పన్న దర్శనం కూడా ఉచితంగా కల్పించనున్నారు.

అన్నవరంలోనూ సామూహిక వరలక్ష్మి వ్రతాలు

మరోవైపు శ్రావణ శుక్రవారాన్ని పురస్కరించుకుని అన్నవరంలోనూ సామూహిక వరలక్ష్మి వ్రతాలు నిర్వహించనున్నారు. ఆగస్ట్ 30వ తేదీ వీర వెంకట సత్యనారాయణస్వామి సన్నిధిలో ఈ వరలక్ష్మి వ్రతాలను నిర్వహించనున్నారు. ఈ విషయాన్ని దేవస్థానం అధికారులు తెలిపారు. ఆగస్ట్ 30వ తేదీ ఉదయం 8 గంటలకు స్వామివారి సత్య కల్యాణ మంటపంలో సామూహిక వరలక్ష్మి వ్రతాలు నిర్వహిస్తారు. పది గంటలకు రెండో విడతగా మరో బ్యాచ్ వరలక్ష్మి వ్రతంలో పాల్గొంటుందని అధికారులు వెల్లడించారు. అయితే వరలక్ష్మి వ్రతానికి హాజరయ్యే మహిళలు పూలు, పండ్లు, టెంకాయలు వారే తెచ్చుకోవాలని సూచించారు. మిగతా పూజాసామాగ్రిని, ప్రతిమ, జాకెట్, గాజులు దేవస్థానం అందిస్తుందని వివరించారు. వ్రతం పూర్తైన తర్వాత స్వామివారి దర్శనం, ఉచిత భోజన సౌకర్యం ఉంటుందని వివరించారు.

మరోవైపు విజయవాడలోనూ సామూహిక వరలక్ష్మి వ్రతాలు ఘనంగా జరిగాయి. ఇంద్రకీలాద్రిపై వెలసిన కనకదుర్గ దేవస్థానంలో ఆగస్ట్ 23వ తేదీన సామూహిక వరలక్ష్మి వ్రతం నిర్వహించారు. ఈ కార్యక్రమంలో సుమారు 500 మంది మహిళలు పాల్గొన్నారు. వీరందరికీ దేవస్థానం అధికారులే ఉచితంగా పూజాసామాగ్రిని అందించారు. అలాగే వ్రతం తర్వాత అమ్మవారి దర్శనం కల్పించారు. మరోవైపు శ్రావణ శుక్రవారం సందర్భంగా ఉదయం నుంచే భక్తులు దర్శనానికి పోటెత్తారు. కుంకుమార్చన సహా ఇతర ఆర్జిత సేవల్లో అధిక సంఖ్యలో పాల్గొన్నారు.