ట్రైనీ డాక్టర్‌పై బెంగాల్‌లో హత్యాచారం.. కేంద్రం సంచలన ఆదేశాలు

కోల్‌కతాలోని ఆర్‌జీ కర్ ఆస్పత్రిలో 31 ఏళ్ల జూనియర్ డాక్టర్‌పై జరిగిన అత్యాచారం, హత్య ఘటన దేశవ్యాప్తంగా సంచలనం సృష్టించిన నేపథ్యంలో.. దేశంలోని అన్ని ప్రభుత్వ ఆస్పత్రులకు కేంద్ర ప్రభుత్వం కీలక ఆదేశాలు జారీ చేసింది. ఏదైనా ఆస్పత్రిలో.. హింసాత్మక సంఘటనలు చోటు చేసుకుని.. అక్కడ పనిచేసే డాక్టర్లు, మెడికల్ సిబ్బంది, ఆరోగ్య కార్యకర్తలపై దాడులు జరిగితే.. 6 గంటల్లోగా ఫిర్యాదు నమోదు చేయాలని ఆదేశించింది. అయితే 6 గంటల్లోగా సంబంధిత ఘటనపై ఎలాంటి ఫిర్యాదు అందకపోతే సంబంధిత ఆస్పత్రి చీఫ్ బాధ్యత వహించాల్సి ఉంటుందని కేంద్రం స్పష్టం చేసింది. ఈ మేరకు కేంద్ర ఆరోగ్య మంత్రిత్వ శాఖ శుక్రవారం ఆదేశాలు జారీ చేసింది.

ఇటీవలి కాలంలో దేశంలోని వివిధ ప్రభుత్వ ఆస్పత్రుల్లో డాక్టర్లు, ఇతర ఆరోగ్య సిబ్బందిపై దాడులు తరచూ జరుగుతుండటం తీవ్ర చర్చనీయాంశంగా మారింది. ఇది తమ దృష్టికి వచ్చిందని.. రోగులకు సేవలు అందించే సమయంలో అనేక మంది ఆరోగ్య సిబ్బంది హింసకు గురవుతున్నారని తెలిపింది. ఇక మరికొందరు వైద్య సిబ్బందికి బెదిరింపులు వచ్చాయని.. ఈ హింసలో ఎక్కువ శాతం రోగులు, వారి కుటుంబ సభ్యుల ద్వారా ఎదుర్కొన్నవేనని కేంద్ర ఆరోగ్య మంత్రిత్వ శాఖ తన ఆదేశాల్లో తెలిపింది. వీటిని దృష్టిలో ఉంచుకొని ఆస్పత్రులకు ఆదేశాలు ఇచ్చినట్లు పేర్కొంది. ఇక ఆస్పత్రుల్లో విధుల్లో ఉన్న ఆరోగ్య కార్యకర్త, సిబ్బందిపై ఏదైనా హింస జరిగితే.. 6 గంటల్లోగా పోలీసులకు ఫిర్యాదు చేయాలని కేంద్రం స్పష్టం చేసింది. దీనికి ఆస్పత్రి చీఫ్ బాధ్యత వహిస్తారని వెల్లడించింది.

పశ్చిమ బెంగాల్ రాజధాని కోల్‌కతాలో ఉన్న ఆర్‌జీ కార్‌ మెడికల్ కాలేజీలో ట్రైనీ డాక్టర్‌పై అత్యాచార, హత్య ఘటన దేశవ్యాప్తంగా తీవ్ర దుమారం రేపుతోంది. ఈ ఘటనకు నిరసనగా డాక్టర్లు దేశవ్యాప్తంగా ఆందోళనలు కొనసాగిస్తున్నారు. ఈ క్రమంలోనే కోల్‌కతాలో చేపట్టిన ఆందోళనలు హింసాత్మకంగా మారగా.. బుధవారం అర్ధరాత్రి ఆర్‌జీ కార్‌ మెడికల్‌ కాజేజీలో కొందరు దుండగులు విధ్వంసం సృష్టించారు. ఈ ఘటనపై కలకత్తా హైకోర్టుతోపాటు, కేంద్ర ప్రభుత్వం కూడా సీరియస్‌ అయ్యింది.