వారందరికీ లోన్లు మొత్తం మాఫీ.. బ్యాంకు కీలక నిర్ణయం

కేరళలోని వయనాడ్‌లో ఇటీవల సంభవించిన ప్రకృతి బీభత్సం వందలాది మంది ప్రాణాలను బలి తీసుకుంది. ఇక మరో వంద మందికి పైగా జనం ఆచూకీ ఇప్పటికీ కనిపించడం లేదు. మరోవైపు.. వేలాది మంది ఇళ్లు, ఆస్తులు, సర్వస్వం కోల్పోయి.. నడిరోడ్డుపైకి వచ్చేశారు. ఈ క్రమంలోనే స్థానికంగా ఉన్న ఓ బ్యాంకు.. వయనాడ్ వరద బాధితులకు భారీ ఊరట కల్పించింది. వయనాడ్ కొండ చరియలు విరిగిపడిన ఘటనలో ఇళ్లు, ఆస్తులు కోల్పోయిన వారికి అండగా నిలిచింది. వారికి ఉన్న లోన్లు మొత్తం మాఫీ చేస్తామని తాజాగా ప్రకటించింది. దీంతో ఇప్పటికే ప్రకృతి విలయం ధాటికి అల్లాడిపోతున్న వయనాడ్ వాసులకు కొంత సాంత్వన లభించినట్లయింది.

కేరళలో చోటు చేసుకున్న ప్రకృతి విలయం నేపథ్యంలో జిల్లా సహకార బ్యాంకుల సమాఖ్య కేరళ బ్యాంక్ కీలక నిర్ణయం తీసుకుంది. జూలై 30 వ తేదీన వయనాడ్‌లో జరిగిన విధ్వంసకర ఘటనలో నష్టపోయిన వారి రుణాలను మాఫీ చేస్తామని సోమవారం విడుదల చేసిన ఒక ప్రకటనలో వెల్లడించింది. జిల్లాలో సంభవించిన విపత్తును దృష్టిలో ఉంచుకుని చూరల్‌మల బ్రాంచ్‌లో రుణాలు తీసుకుని చనిపోయిన వారితోపాటు, లోన్లు తీసుకునేందుకు సెక్యూరిటీలుగా తాకట్టు పెట్టిన ఇళ్లు, ఆస్తులు కోల్పోయిన వారి రుణాలను మాఫీ చేయాలని కేరళ బ్యాంక్ యాజమాన్యం నిర్ణయించింది. ఈ మేరకు అధికారిక ప్రకటన విడుదల చేసింది. ఇక ఈ మొత్తం లోన్ల విలువ రూ.30 కోట్ల వరకు ఉంటుందని బ్యాంకు అధికారులు అంచనా వేశారు. అయితే ఈ లోన్లు మొత్తాన్ని మాఫీ చేయాలని నిర్ణయించారు.

  అయితే ఈ రుణమాఫీలో అన్ని రకాల లోన్లు ఉంటాయని కేరళ బ్యాంక్ ప్రకటించింది. అగ్రికల్చరల్ లోన్లు, వెహికల్ లోన్లు, హోమ్ లోన్లు.. ఇలా అన్నింటినీ మాఫీ చేస్తామని బ్యాంకు అధికారులు తాజాగా వెల్లడించారు. ఇక వయనాడ్ బాధితుల కోసం విరాళాలు అందించేందుకు.. సెలబ్రిటీలు, సంస్థలు, బిజినెస్‌మెన్‌లు ముందుకు వస్తూనే ఉన్నారు. ఇక ఇప్పటికే కేరళ ముఖ్యమంత్రి సహాయనిధికి కేరళ బ్యాంక్ రూ. 50 లక్షల విరాళం అందించింది. దీంతోపాటు కేరళ బ్యాంకు ఉద్యోగులు కూడా తమ వంతు సాయం చేశారు. కేరళ బ్యాంకు ఉద్యోగులు స్వచ్ఛందంగా తమ 5 రోజుల జీతాన్ని సీఎండీఆర్ఎఫ్‌కి ఇవ్వాలని నిర్ణయం తీసుకున్నారు.