అష్టా చమ్మా ఆటలో గొడవ.. ఓ వ్యక్తిని దారుణంగా హత్య చేసిన స్నేహితులు

సరదాగా ఆడుకునే అష్టాచమ్మా మనిషి ప్రాణం తీస్తుందని ఎవరైనా ఊహించగలరా.. అప్పటి వరకూ తనతో కలిసి ఆడిన స్నేహితులే తన ప్రాణాలను బలి తీసుకుంటారని ఎవరైనా అంచనా వేయగలరా.. కానీ ఇలాంటి విషాదకర ఘటన రాజమండ్రిలో చోటుచేసుకుంది. అష్టాచమ్మలో తలెత్తిన వివాదం ఓ వ్యక్తి ప్రాణం తీసింది. ఓ కుటుంబానికి అంతులేని వేదనను మిగిల్చింది. మరో రెండు కుటుంబాలలోనూ ఆవేదన మిగల్చింది. ఈ ఘటన రాజమండ్రి రూరల్ పరిధిలో చోటుచేసుకుంది. ఘటనపై కేసు నమోదు చేసిన పోలీసులు దర్యాప్తు చేపట్టారు.

అసలు వివరాల్లోకి వెళ్తే.. మార్గాని నాగేశ్వరరావు, కైరం వీరబాబు, కైరం రమణ అనే ముగ్గురూ స్నేహితులు. ఇక కాలక్షేపం కోసం ముగ్గురు స్నేహితులు బుధవారం ఉదయం అష్టా చమ్మా ఆడటం మొదలెట్టారు. అయితే ఆట అన్నాక గెలుపు ఓటములు సహజం. గెలిచినప్పుడు పొంగిపోకూడదు. ఓడినప్పుడు కుంగిపోకూడదు. కానీ.. అష్టా చమ్మ ఆడుతున్న సమయంలో ముగ్గురి స్నేహితుల మధ్య చిన్నపాటి గొడవ తలెత్తింది. నాగేశ్వరరావు ఒకవైపు,. రమణ, వీరబాబు మరోవైపు విడిపోయి వాదులాడుకున్నారు. ముగ్గురి మధ్య వాగ్వాదం నడిచింది. అయితే ఈ క్రమంలోనే విచక్షణ కోల్పోయిన రమణ, వీరబాబు.. నాగేశ్వరరావుపై దాడి చేశారు. కత్తితో పొడిచి అక్కడి నుంచి పారిపోయారు.

ఈ ఘటనలో నాగేశ్వరరావు అక్కడిక్కడే ప్రాణాలు కోల్పోయారు. దీంతో అతని కుటుంబసభ్యులు గుండెలవిసేలా రోదిస్తున్నారు. స్థానికులు ఇచ్చిన సమాచారంతో ఘటనాస్థలికి చేరుకున్న పోలీసులు.. ఘటన జరిగిన తీరును అడిగి తెలుసుకున్నారు. మృతదేహాన్ని పోస్టుమార్టమ్ కోసం ఆస్పత్రికి తరలించారు. హత్య కేసు నమోదు చేసిన పోలీసులు.. పారిపోయిన రమణ, వీరబాబు కోసం గాలిస్తున్నారు. అయితే కాలక్షేపం కోసం ఆడే అష్టా చమ్మా మనిషి ఉసురు తీసుకుందని స్థానికులు ఆవేదన వ్యక్తం చేస్తున్నారు. ఆటలో భావోద్వేగాలు సహజమేనని. అయితే అంతమాత్రాన చంపే వరకూ వెళ్తారా అంటూ అభిప్రాయపడుతున్నారు. మొత్తానికి ఈ ఘటన స్థానికంగా సంచలనం రేపింది.