అందులో ఆశ్చర్యమేమీ లేదు.. "మెలోడీ" సెల్ఫీ వీడియోపై కంగనా రనౌత్ కామెంట్

ఇప్పుడు సోషల్ మీడియాలో ఎక్కడ చూసినా మెలోడీ ట్రెండ్ కనిపిస్తోంది. ఇంతకీ ఈ మెలోడీ అంటే ఏంటి అనుకుంటున్నారా. భారత ప్రధాని నరేంద్ర మోదీ, ఇటలీ ప్రధానమంత్రి జార్జియా మెలోనీని కలిపి.. నెటిజన్లు ముద్దుగా మెలోడీ అని పిలుచుకుంటూ ఉంటారు. జీ7 దేశాల శిఖరాగ్ర సదస్సులో భాగంగా ఇటీవల ఇటలీకి వెళ్లిన ప్రధాని మోదీ.. అక్కడ ప్రపంచ దేశాల అధినేతలను కలిసి.. వారితో వేర్వేరుగా ద్వైపాక్షిక భేటీలు నిర్వహించారు. ఈ క్రమంలోనే మోదీతో మెలోనీ తీసుకున్న సెల్ఫీ వీడియో సోషల్ మీడియాలో తెగ చక్కర్లు కొడుతుండగా.. ఆ వీడియోపై బాలీవుడ్ నటి, బీజేపీ ఎంపీ కంగనా రనౌత్ తనదైన శైలిలో స్పందించారు.

ఇక ఇటలీ ప్రధాని జార్జియా మెలోనీతో సమావేశమైన మోదీ.. ఈ సందర్భంగా మోదీతో.. మెలోనీ సెల్ఫీ తీసుకున్నారు. ఈ వీడియోలో "హాయ్‌ ఫ్రెండ్స్‌, ఫ్రమ్‌ మెలోడీ" అని మెలోనీ అనడంతో అది కాస్త సోషల్ మీడియాలో వైరల్ అయింది. దీంతో నెటిజన్లు మళ్లీ మెలోడీ అంటూ పోస్టులు పెట్టడం ప్రారంభించారు. మెలోడీ ఫొటోపై స్పందించిన కంగనా రనౌత్‌.. మహిళలకు నరేంద్ర మోదీ ఎప్పటికీ ఇలాగే మద్దతుగా ఉంటారని ప్రశంసలు కురిపించారు. మోదీని మెలోని అంతగా అభిమానించడంలో పెద్ద ఆశ్చర్యమేమీ లేదని కంగనా పేర్కొన్నారు.

మళ్లీ ట్రెండింగ్‌లో మెలోడీi.. మోడీతో వీడియో పోస్టు చేసిన మెలోనీ

మెలోని షేర్ చేసిన సెల్ఫీ వీడియోను ఇన్‌స్టాగ్రామ్‌లో షేర్ చేసిన కంగనా రనౌత్.. దానికి క్యాప్షన్ ఇచ్చారు. మహిళలకు మద్దతు ఇవ్వడం, వాళ్లకు అండగా ఉండడం ప్రధాని నరేంద్ర మోదీలో ఉన్న గొప్ప లక్షణాల్లో ఒకటి అని కంగన చెప్పారు. జీవితంలో మహిళలు ఎదగాలని మోదీ ఆకాంక్షిస్తారని తెలిపారు. ఇటలీ ప్రధాని మెలోని మోదీని అంతగా అభిమానించడంలో పెద్ద ఆశ్చర్యం ఏమీ లేదని.. అది మోదీలో ఉన్న గొప్ప లక్షణం అని కొనియాడారు.