ప్లీజ్, నా రెండు వేళ్లు నరికేయండి డాక్టర్.. ఆస్పత్రికి వచ్చిన వింత రోగి

ప్రస్తుత ప్రపంచంలో ఎన్నో రకాల కొత్త కొత్త వ్యాధులు పుట్టుకొస్తున్నాయి. కొన్ని రకాల రోగాలు.. లక్షల్లో, కోట్లల్లో ఒకరికి వచ్చే వ్యాధులు కూడా ఉన్నారు. ఇక కొన్ని వ్యాధులను గుర్తించేందుకు డాక్టర్లు కూడా కొన్నిసార్లు తలలు పట్టుకుంటారు. అయితే కెనడాలోని ఆస్పత్రికి వచ్చిన ఓ వ్యక్తి.. డాక్టర్లకు చేసిన విజ్ఞప్తితో వారు అవాక్కయ్యారు. ఎందుకంటే ఆ వ్యక్తి.. తన ఎడమ చేతికి ఉన్న రెండు వేళ్లను కత్తిరించాలని వారికి సూచించాడు. దీంతో వారు ఏం జరుగుతుందో తెలియక నోరెళ్లబెట్టారు. అయితే ఆ వ్యక్తి వేళ్లకు ఏదైనా జరిగిందా అంటే అదీ లేదు. అందరిలానే అతనికి చేతులు ఉన్నా వాటిని నరికేయాలని డాక్టర్లను వేడుకోవడంతో వారికి ఏం చేయాలో అర్థం కాలేదు.

కెనడాలోని క్యూబెక్ నగరంలో ఉండే ఓ 20 ఏళ్ల యువకుడు.. స్థానికంగా ఉన్న ఓ ఆస్పత్రికి వెళ్లాడు. తన ఎడమ చేతికి ఉన్న రెండు వేళ్లను కట్ చేయాలని వారికి సూచించాడు. అదేమని అడిగితే తనకు ఆ చేతికి ఉన్న ఆ రెండు వేళ్లు ఎక్స్‌ట్రా ఉన్నాయని అనిపిస్తోందని వాటి కారణంగా తనకు ఒత్తిడి కలుగుతోందని అందుకే వాటిని తొలగించాలని కోరాడు. తన ఎడమ చేతికి ఉన్న చివరి రెండు వేళ్లను ఆపరేషన్ చేసి తీసివేయాలని కోరాడు. దీంతో అది విన్న డాక్టర్లు.. ఆయనకు ఉన్నది మానసిక రోగం అని గుర్తించారు. ఈ విషయాన్ని ఆడిటీ సెంట్రల్ అనే వెబ్‌సైట్‌లో.. లావల్ యూనివర్సిటీలోని సైకియాట్రిస్ట్ డాక్టర్ నాడియా ఒక నివేదికను ప్రచురించారు.

ఆ యువకుడు చిన్నతనం నుంచి ఇలాంటి ఆలోచనలు చేస్తున్నట్లు గుర్తించారు. ఇదే అతనికి ఉన్న అసలు రోగమని తేల్చారు. ఆ వ్యక్తి తన శరీరంలోని ఎడమ చేతి చివరి రెండు వేళ్లు కనిపించకుండా పోయినట్లు భావిస్తున్నాడని పేర్కొన్నారు. తన రెండు వేళ్లు కుళ్లిపోతున్నాయని లేదా కాలిపోతున్నాయని భావించి రకరకాలుగా ప్రవర్తిస్తున్నాడని డాక్టర్ నాడియా వెల్లడించారు. ఇందులో మరో ట్విస్ట్ ఏంటంటే.. ఇంతటి తీవ్రమైన సమస్యను అనుభవిస్తున్న ఆ యువకుడు విషయాన్ని తన కుటుంబ సభ్యులకు కూడా చెప్పలేదని పేర్కొన్నారు.

అతడ్ని పూర్తిగా పర్యవేక్షించి చివరికి ఆ యువకుడికి బాడీ ఇంటెగ్రిటీ ఐడెంటిటీ డిజార్డర్-బీఐఐడీ అనే అత్యంత అరుదైన వ్యాధి సోకిందని డాక్టర్ నాడియా తెలిపారు. ఇలాంటి వ్యాధితో బాధపడుతున్న వారిలో తాము వికలాంగులుగా మారాలనే కోరిక బలంగా ఉంటుందని పేర్కొన్నారు. అయితే ఈ బాడీ ఇంటెగ్రిటీ ఐడెంటిటీ డిజార్డర్‌కు కారణమేంటో మాత్రం డాక్టర్లు ఖచ్చితంగా చెప్పలేకపోతున్నారు. మన శరీరంపై ఉండే అవగాహనను నియంత్రించే మనిషి మెదడులోని నిర్మాణపరమైన అసాధారణ పరిస్థితుల ఫలితంగా ఇది ఉండవచ్చని పరిశోధనలు చెబుతున్నాయి. ఇలాంటి వారు విపరీతమైన ఒత్తిడి లేదా ఆందోళనతో డిప్రెషన్‌లోకి వెళ్తుంటారని.. ఇలాంటి పరిస్థితులు సాధారణంగా బాల్యంలో, ప్రారంభ కౌమారదశలో మొదలవుతాయని వెల్లడించారు.