చంద్రుడి చుట్టూ తిరుగుతున్న చంద్రయాన్-2 ఆర్బిటర్,,,,విక్రమ్ ల్యాండర్ ఫోటోలు తీసిన సార్ శాస్త్రీయ పరికరం

జాబిల్లి ఉపరితలంపై నిద్రపోతున్న చంద్రయాన్-3 విక్రమ్ ల్యాండర్‌ను నాలుగేళ్ల కిందట ఇస్రో ప్రయోగించిన చంద్రయాన్-2 ఆర్బిటర్  ఫోటోలు తీసింది. ఈ ఫోటోలను తాజాగా భారత అంతరిక్ష పరిశోధన సంస్థ శనివారం విడుదల చేసింది. ఇస్రో అధికారిక ఎక్స్ (ట్విట్టర్‌) లో ఈ ఫోటోలను షేర్ చేసిన ఇస్రో.. సెప్టెంబరు 6న చంద్రయాన్-2 ఆర్బిటర్ వీటిని తీసినట్టు పేర్కొంది. ‘చంద్రయాన్-2 ఆర్బిటర్‌కు చెందిన డ్యూయల్-ఫ్రీక్వెన్సీ సింథటిక్ అపెర్చూర్ రాడార్ చంద్రయాన్-3 విక్రమ్ ల్యాండర్‌ను సెప్టెంబరు 6న తీసిన ఫోటోలు ఇవి’ అని తెలిపింది సెప్టెంబరు 2019లో ఇస్రో ప్రయోగించిన చంద్రయాన్-2 చంద్రుడి దక్షిణ ధ్రువం ఉపరితలంపై ల్యాండింగ్ సమయంలో విఫలమైన విషయం తెలిసిందే. ల్యాండర్ విఫలమైనా.. ఆర్బిటర్ మాత్రం చంద్రుడి కక్ష్య చుట్టూ తిరుగుతూనే ఉంది. ఈ నేపథ్యంలో ఆగస్టు 23న చంద్రుడి ఉపరితలంపై ల్యాండింగ్ సమయంలో విక్రమ్‌తో ఈ ఆర్బిటర్‌ను విజయవంతంగా ఇస్రో అనుసంధానించింది.

ల్యాండర్ ఫోటోలు తీసిన పరికరం గురించి ఇస్రో మరింత వివరిస్తూ.. ‘SAR పరికరం ఇచ్చిన ఫ్రీక్వెన్సీ బ్యాండ్‌లో మైక్రోవేవ్‌లను ప్రసారం చేస్తుంది.. ఉపరితలం నుంచి ప్రతిబింబాన్ని అదే స్వీకరిస్తుంది. ఇది రాడార్ అయినందున సూర్యకాంతి అవసరం లేకుండా ఫోటోలు తీయగలదు.. ఇది లక్ష్యానికి సంబంధించిన దూరం, భౌతిక లక్షణాలు రెండింటినీ అందించగలదు.. అందువల్ల, భూమి, ఇతర ఖగోళ వస్తువుల రిమోట్ సెన్సింగ్ కోసం SAR ఉపయోగిస్తారు’ అని తెలిపింది. ఎల్, ఎస్ బ్యాండ్‌లలో మైక్రోవేవ్‌లను ఉపయోగించే చంద్రయాన్-2 ఆర్బిటర్‌లో DFSAR కీలకమైన శాస్త్రీయ పరికరమని ఇస్రో వెల్లడించింది. ‘ఈ అత్యాధునిక పరికరం ప్రస్తుతం ఏదైనా ప్లానెటరీ మిషన్‌లో అత్యుత్తమ రిజల్యూషన్ పోలారిమెట్రిక్ ఫోటోలను అందిస్తోంది" అని వివరించింది. ‘దీర్ఘమైన రాడార్ తరంగదైర్ఘ్యం DFSAR చంద్రుడి ఉపరితల లక్షణాలను కొన్ని మీటర్ల వరకు అన్వేషించడానికి వీలు కల్పిస్తుంది.. DFSAR గత నాలుగేళ్లుగా చంద్రుడి ధ్రువ ప్రాంతంంపై ప్రధానంగా దృష్టి సారించి ఉపరితలాన్ని ఫోటోలు తీయడం ద్వారా అధిక-నాణ్యత డేటాను అందిస్తోంది’ అని ఇస్రో పేర్కొంది.