బైకులు, కార్లను ఇంటి ముందు పార్క్ చేస్తున్నారా..పాములు నక్కి ఉండవచ్చు. కాస్త చూసుకొని వాహనం స్టార్ట్ చేయండి
national | Suryaa Desk | Published : Wed, Apr 26, 2023, 10:06 PM
బైకులు, కార్లను సాధారణంగా రాత్రివేళల్లో ఆరుబయట ఎక్కడ పడితే అక్కడ పార్క్ చేస్తుంటాం. అలాంటి వారు ఈ వీడియో చూశాక కాస్త జాగ్రత్త పడాల్సిందే. ఇంటి ముందు పార్క్ చేసిన బైక్‌ను తెల్లవారుజామున స్టార్ట్ చేసేందుకు వెళ్లిన యజమానికి బుస్ బుస్‌మంటూ శబ్దం వినిపించింది. తీక్షణగా చూడగా.. బైకర్‌కు పీడకల లాంటి దృశ్యం కనిపించింది. హెడ్‌లైట్ క్యాబినెట్‌లో భారీ సర్పం కనిపించింది. ఒడిశాలోని మయూర్‌భంజ్ జిల్లాలో ఈ ఘటన చోటుచేసుకుంది. ఇందుకు సంబంధించిన వీడియో సోషల్ మీడియాలో వైరల్ అవుతోంది.
బైక్‌లో దాక్కున్న పామును చూపిన యజమాని.. దాన్ని పక్కకు తోలేందుకు ప్రయత్నించాడు. ఆ ప్రయత్నాలు విఫలమవ్వడంతో స్నేక్ క్యాచర్‌కు ఫోన్ చేసి సమాచారం అందించాడు. హెడ్‌ల్యాంప్ క్యాబిన్ నుంచి ఆ పామును బయటకు తీసేందుకు స్నేక్ క్యాచర్ కూడా చాలాసేపు శ్రమపడాల్సి వచ్చింది. కాసేపటి తర్వాత ఆ పామును సురక్షితంగా బయటకు తీశాడు. అనంతరం దాన్ని అటవీ ప్రాంతంలో సురక్షితంగా వదిలేశారు.
రాత్రిపూట బైకులు, కార్లను ఆరుబయట ఉంచే వ్యక్తులు.. తమ బైక్‌లు, కార్లను స్టార్ట్ చేయడానికి ముందు ఎందుకు జాగ్రత్తగా ఉండాలో ఈ వీడియో తెలియజేస్తోంది. చురుగ్గా కదిలే పాములు తరచూ జనావాసాల్లోకి వస్తుంటాయి. వాహనాల్లో, బూట్లలో నక్కే అవకాశం ఉంది. వర్షాలు కురిసినప్పుడు మరింత అప్రమత్తంగా ఉండాలి.
|
|