జంట జలాశయాలకు భారీ వరద.. హైదరాబాద్ వాసులకు జీహెచ్ఎంసీ హెచ్చరికలు

గతకొన్ని రోజులుగా తెలంగాణలో వర్షాలు దంచికొడుతున్నాయి. దీంతో వాగులు, వంకలు పొంగి పొర్లుతున్నాయి. జలాశయాలు, ప్రాజెక్టులు జలకళను సంతరించుకున్నాయి. చెరువులు పూర్తిస్థాయి సామర్థ్యానికి చేరుకున్నాయి. ఇక ఎగువన కురుస్తున్న భారీ వర్షాలకు హైదరాబాద్ జంట జలాశయాలకు వరద పోటెత్తుతోంది. ఉస్మాన్‌సాగర్‌, హిమాయత్‌ సాగర్‌ ప్రాజెక్టులు పూర్తిస్థాయి నీటిమట్టానికి చేరుకున్నాయి.. దీంతో జలమండలి అధికారులు అలెర్ట్ అయ్యారు. ముందుజాగ్రత్త చర్యల్లో భాగంగా ఉస్మాన్‌సాగర్‌ 2 గేట్లను అడుగుమేర ఎత్తి నీటిని దిగువకు విడుదల చేస్తున్నారు. మెుత్తం 226 క్యూసెక్కుల నీటిని మూసీ నదిలోకి వదలుతున్నారు. ఉస్మాన్‌సాగర్‌ పూర్తి నీటిమట్టం 1790 అడుగులు. ప్రస్తుత ఆ ప్రాజెక్టులో నీటిమట్టం 1787.95 అడుగులకు చేరింది.

ఇక హిమాయత్‌ సాగర్‌ ప్రాజెక్టు కూడా పూర్తి స్థాయిలో నిండింది. దీంతో ఒక గేటు అడుగు మేర ఎత్తి నీటిని దిగువకు విడుదల చేస్తున్నారు. 340 క్యూసెక్కుల నీటిని మూసీ నదిలోకి విడుదల చేస్తున్నారు. హిమాయత్‌ సాగర్‌ పూర్తి నీటిమట్టం 1763.50 అడుగులు. ప్రస్తుత ఈ ప్రాజెక్టులో నీటిమట్టం 1761.10 అడుగులకు చేరిందని జల మండలి అధికారులు తెలిపారు. జంట జలాశయాలకు వరద నీరు విడుదల చేస్తుండటంతో జీహెచ్ఎంసీ అధికారులు నగరవాసులను అప్రమత్తం చేశారు. ముఖ్యంగా మూసీ పరివాహక ప్రాంత ప్రజల ప్రజలు అలర్ట్‌గా ఉండాలన్నా్రు. భారీ వర్షాలు వస్తే మూసీ ఉద్ధృతంగా ప్రవహించే ఛాన్స్ ఉంది కాబట్టి జాగ్రత్తగా ఉండాలన్నారు.

హైదరాబాద్‌కు నేడూ వర్ష సూచనతెలంగాణను వర్షాలు వీడటం లేదు. గత వారం రోజులుగా రాష్ట్రంలో వర్షాలు కురుస్తూనే ఉన్నాయి. తాజాగా హైదరాబాద్ వాతావరణ శాఖ అధికారులు రెయిన్ అలర్ట్ జారీ చేశారు. నేటి నుంచి మూడ్రోజుల పాటు రాష్ట్రంలో వర్షాలు కురుస్తాయని చెప్పారు. బంగాళాఖాతంలో ఏర్పడిన అల్పపీడనం వాయుగుండంగా మారే ఛాన్స్ ఉందని దాని ప్రభావంతో రాష్ట్రమంతటా విస్తారంగా వర్షాలు కురుస్తాయని చెప్పారు. ఈ మేరకు పలు జిల్లాలకు ఆరెంజ్, ఎల్లో అలర్ట్ జారీ చేశారు. హైదరాబాద్‌లోనూ వర్షం కురిసే ఛాన్స్ ఉందని చెప్పారు. పగలు ఆకాశం మేఘావృతమై ఉంటుందని.. సాయంత్రం లేదా రాత్రికి వర్షం కురిసే అవకాశం ఉందని చెప్పారు. ఈ మేరకు ప్రజలు అప్రమత్తంగా ఉండాలన్నారు. అత్యవసరం అయితేేనే ఇళ్ల నుంచి బయటకు రావాలని సూచించారు.