బస్సు కింద పడుకొని యువకుడి రీల్..టీజీఆర్టీసీ ఎండీ సజ్జనార్ సీరియస్ రియాక్షన్

సోషల్ మీడియాలో వైరల్ అయిపోయి రాత్రికి రాత్రే ఫేమస్ అయిపోదానికి యువత.. రకరకాల ప్రయత్నాలు చేస్తోంది. ఇందుకోసం యూట్యూబ్‌లో వీడియోలు, ఇన్‌స్టాలో రీల్స్ చేస్తున్నారు. కాగా.. ఆ వీడియోలు వైరల్ అయ్యేందుకు ప్రాణాలకు తెగించి మరీ.. రిస్కులు చేస్తున్నారు. ఈ నేపథ్యంలోనే.. కొన్ని రోజులుగా రకరకాల ఘటనలు వెలుగులోకి వస్తున్నాయి. ఇన్‌స్టాలో రీల్ కోసం.. ఓ అమ్మాయి కారుతో సహా కొండపై నుంచి లోయలో పడిపోగా, మరో యువకుడు ఉరేసుకున్నట్టు వీడియో తీసుకుంటుండగా ప్రమాదవశాత్తు ఉరి బిగుసుకుని ప్రాణాలు వదిలారు. మరో యువతి.. ఎత్తైన భవనం చివరన తన స్నేహితుని చేతు పట్టుకుని వేలాడుతూ వీడియో తీసుకుంది. ఈ వరుస ఘటనలు జరుగుతున్న నేపథ్యంలో.. మరో వీడియో చర్చనీయాంశంగా మారింది.

హైదరాబాద్‌లోని రోడ్డుపై వేగంగా వస్తున్న ఆర్టీసీ లోకల్ బస్సు ముందుకు ఓ యువకుడు అకస్మాత్తుగా వచ్చి.. ఆ బస్సు కింద పడుకుని.. ఆ బస్సు వెళ్లిపోయాక ఎంచక్కా లేచి.. షర్ట్‌కి అంటిన దుమ్ము దులుపుకుంటూ అక్కడి నుంచి వెళ్లిపోయిన వీడియో ఇప్పుడు సోషల్ మీడియాలో చక్కర్లు కొడుతోంది. ఈ ఘటన నెటిజన్లను ఆశ్చర్యానికి గురి చేస్తుండగా.. దీనిపై టీఎస్ ఆర్టీసీ ఎండీ సజ్జనార్ స్పందించారు. సోషల్‌ మీడియాలో తెగ వైరల్‌ అవుతోన్న ఈ వీడియో.. ఫేక్‌ అని సజ్జనార్ తేల్చేశారు. ఇది పూర్తిగా ఎడిటెడ్ వీడియో అని.. సోషల్‌ మీడియాలో పాపులర్‌ అయ్యేందుకు కొందరు ఆకతాయిలు ఇలా వీడియోలను ఎడిట్‌ చేసి వదులుతున్నారంటూ ట్వీట్ చేశారు.

ఇలాంటి వెకిలి చేష్టలతో ఆర్టీసీ ప్రతిష్టను దిగజార్చే ప్రయత్నం చేయడం మంచి పద్ధతి కాదని యువతను సజ్జనార్ హెచ్చరించారు. లైకులు, కామెంట్ల కోసం చేసే ఈ తరహా అనాలోచిత పనులను ఇతరులు అనుకరించే ప్రమాదం పొంచి ఉందని.. సరదా కోసం చేసే ఎడిటెడ్‌ వీడియోలు ఇతరులకు ప్రాణాపాయం కూడా కలిగిస్తాయని వివరించారు. ఇలాంటి ఘటనలను టీజీఎస్ఆర్టీసీ యాజమాన్యం సీరియస్‌గా తీసుకుంటోందని.. బాధ్యులపై చట్టప్రకారం చర్యలు తీసుకుంటారని సజ్జనార్ హెచ్చరించారు.

కాగా.. ఈ వీడియోలో బస్సు కింద పడుకున్న యువకుడు.. లేచి వెళ్లే సమయంలో చాలా జాలీగా వెళ్లినట్టుగా కనిపిస్తోంది. బస్సు వెనకే ఆటో వస్తుండగా.. ఆ యువకుడు దాని ముందు నుంచే వెళ్లినా.. ఎలాంటి బ్రేకు వేయకుండా సాఫీగా వెళ్లిపోవటం గమనించొచ్చు. ఆ పక్కనే బైకు కూడా అలాగే వెళ్తుండటం చూస్తుంటే.. పక్కాగా ఇది ఎడిటెడ్ వీడియో అని ఇట్టే తెలిసిపోతుందని నెటిజన్లు పోస్ట్ మార్టం చేస్తున్నారు.