ఢిల్లీ లిక్కర్ కేసులో కల్వకుంట్ల కవితకు మరో షాక్

ఢిల్లీ లిక్కర్ కేసులో బీఆర్ఎస్ ఎమ్మెల్సీ కల్వకుంట్ల కవితకు మరోసారి కోర్టు షాక్ ఇచ్చింది. ఈ కేసులో ఆరోపణలు ఎదుర్కొంటున్న కల్వకుంట్ల కవిత జ్యుడీషియల్ కస్టడీని ఢిల్లీ రౌస్ అవెన్యూ కోర్టు మరోసారి పొడగించింది. కవిత కస్టడీ నేటితో (జూన్ 21) ముగియడంతో వర్చువల్‌గా ఈడీ అధికారులు కోర్టు ముందు హాజరు పరిచారు. వాదనలు విన్న జడ్జి వచ్చే నెల 7 వరకు జ్యుడీషియల్ కస్టడీని పొడిగిస్తున్నట్లు ఉత్తర్వులు వెలువరించారు. ఇక ఇదే కేసులో అరెస్ట్ అయి తీహార్ జైలులో ఉన్న ఢిల్లీ ముఖ్యమంత్రి, ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్‌కు.. గురువారం ఢిల్లీ రౌస్ అవెన్యూ కోర్టు బెయిల్ మంజూరు చేయగా.. శుక్రవారం ఢిల్లీ హైకోర్టు ఆ బెయిల్‌పై స్టే విధించింది.

ఢిల్లీ మద్యం కుంభకోణం కేసు విచారణలో భాగంగా తీహార్ జైలు అధికారులు.. ఆమెను వీడియో కాన్ఫరెన్స్ ద్వారా ఢిల్లీ రౌస్ అవెన్యూ కోర్టు ముందు హాజరుపరిచారు. ఇక ఈ కేసులో కల్వకుంట్ల కవిత.. మనీలాండరింగ్‌కు పాల్పడ్డారన్న ఆరోపణలపై.. ఎన్‌ఫోర్స్‌మెంట్ డైరెక్టరేట్ అధికారులు.. మార్చి 15 వ తేదీన హైదరాబాద్‌లోని ఆమె నివాసంలో సోదాలు నిర్వహించారు. కొన్ని గంటల పాటు తనిఖీలు కొనసాగిన తర్వాత చివరికి.. కవితను ఈడీ అధికారులు అరెస్ట్ చేసి.. ఢిల్లీకి తరలించారు. కొన్ని రోజుల పాటు ఈడీ కస్టడీలో కల్వకుంట్ల కవితను ఉంచి విచారణ జరిపారు. ఆ తర్వాత ఢిల్లీ రౌస్ అవెన్యూ కోర్టు ఆదేశాలతో తీహార్ జైలులో జ్యుడీషియల్ కస్టడీకి తరలించారు.

ఆ తర్వాత ఈడీ కస్టడీ ముగిసిన తర్వాత సీబీఐ అధికారులు.. ఏప్రిల్ 11 వ తేదీన మళ్లీ కవితను అరెస్ట్ చేశారు. ఈ క్రమంలోనే అప్పటి నుంచి పలుమార్లు.. కవిత కస్టడీని పొడగించిన ఢిల్లీ రౌస్ అవెన్యూ కోర్టు.. తాజాగా మరోసారి అదే నిర్ణయం తీసుకుంది. జులై 7 వ తేదీ వరకు కస్టడీని పొడిగిస్తూ ఉత్తర్వులు ఇచ్చింది. ఇక ఇదే కేసులో అరెస్ట్ అయి తీహార్ జైలులో ఉన్న ఢిల్లీ సీఎం, ఆప్ కన్వీనర్ అరవింద్ కేజ్రీవాల్‌కు నిన్న రౌస్ అవెన్యూ కోర్టు బెయిల్ మంజూరు చేసింది. అయితే తాజాగా కోర్టు ఇచ్చిన బెయిల్ ఉత్తర్వులను ఈడీ అధికారులు ఢిల్లీ హైకోర్టులో సవాల్ చేయగా.. హైకోర్టు స్టే విధించింది.

మరోవైపు.. తీహార్ జైలులో ఉన్న బీఆర్ఎస్ ఎమ్మెల్సీ కల్వకుంట్ల కవితకు అవసరమైన వసతులు కల్పించాలని గతంలోనే ఢిల్లీ రౌస్‌ అవెన్యూ కోర్టు జైలు అధికారులను ఆదేశించింది. జపమాల, పుస్తకాలు, పెన్నులు, ఇతర వస్తువులతో పాటు ధ్యానం చేసుకునేందుకు అవకాశం కల్పించాలని సూచించింది, ఇంటి నుంచి ఆహారం, పరుపు, దుప్పట్లు తెచ్చుకునేందుకు, ఆభరణాలు ధరించేందుకు, బూట్లకు అనుమతించాలని ఆదేశాలు ఇచ్చింది.