హైదరాబాద్‌లో బీఆర్ఎస్ మాజీ ఎమ్మెల్యే బాల్క సుమన్ అరెస్ట్

మంచిర్యాల జిల్లా బీఆర్ఎస్ పార్టీ అధ్యక్షుడు, మాజీ ఎమ్మెల్యే బాల్క సుమన్‌ను పోలీసులు అరెస్ట్ చేశారు. హైదరాబాద్‌‌లో మాజీ స్పీకర్, బాన్సువాడ ఎమ్మెల్యే పోచారం శ్రీనివాస్ రెడ్డిని సీఎం రేవంత్ రెడ్డి, మంత్రి పొంగులేటి శ్రీనివాస్ రెడ్డి కలిసి కాంగ్రెస్‌లోకి ఆహ్వానించగా.. ఆయన కాంగ్రెస్ పార్టీలో చేరిన విషయం తెలిసిందే. అంతకుముందే.. పోచారం శ్రీనివాస్ రెడ్డి కాంగ్రెస్‌లో చేరబోతున్నారన్న వార్తలు బయటికి రావటంతో.. ఆయన ఇంటి దగ్గర బాల్క సుమన్ నేతృత్వంలో బీఆర్ఎస్ శ్రేణులు ఆందోళనకు దిగారు. పోచారం ఇంట్లోకి బీఆర్ఎస్ నేతలు వెళ్లేందుకు ప్రయత్నించగా పోలీసులు అడ్డుకున్నారు. పోలీసులు అడ్డుకున్నప్పటికీ.. గేటు తోసుకుని వెళ్లేందుకు బాల్క సుమన్ ప్రయత్నించారు.

ఈ సమయంలో.. పోలీసులతో బాల్క సుమన్ వాగ్వాదానికి దిగారు. పోలీసులకు బీఆర్ఎస్ నేతలకు మధ్య తోపులాట జరగటంతో ఆ ప్రాంతంలో ఉద్రిక్త పరిస్థితులు నెలకొన్నాయి. బీఆర్ఎస్ నేతలను పోలీసులు అడ్డుకోవటంతో అక్కడే బైఠాయించి నిరసన వ్యక్తం చేశారు. ఎంత సేపటికీ వినకపోవడంతో బాల్క సుమన్ సహా పలువురు బీఆర్ఎస్ నేతలను పోలీసులు అరెస్ట్ చేశారు. మరోవైపు.. పోచారం శ్రీనివాస్ రెడ్డిని ఆయన నివాసంలో కలిసిన సీఎం రేవంత్ రెడ్డి.. కాంగ్రెస్ కండువా కప్పి పార్టీలోకి ఆహ్వానించారు. అనంతరం మాట్లాడిన పోచారం శ్రీనివాస్ రెడ్డి.. మీడియాలో మాట్లాడారు. తన రాజకీయ జీవితం కాంగ్రెస్ పార్టీతోనే మొదలైందని తెలిపిన పోచారం.. రైతుల సంక్షేమం కోసమే తాను తిరిగి కాంగ్రెస్ పార్టీలో చేరినట్టు చెప్పుకొచ్చారు. ఆరు నెలలుగా రేవంత్ రెడ్డి సర్కార్ చేస్తున్న మంచి పనులను తాను గమనిస్తున్నానని.. రైతుల పక్షపాతిగా వ్యవహరిస్తోందని చెప్పుకొచ్చారు. అందుకే తానే.. రేవంత్ రెడ్డి తన నివాసానికి ఆహ్వానించినట్టు తెలిపారు.

ఇదిలా ఉంటే.. పోచారం శ్రీనివాస్ రెడ్డికి కాంగ్రెస్ సీనియర్ నేతలకు ఇచ్చినట్టుగానే సముచిత స్థానం ఇస్తామని సీఎం రేవంత్ రెడ్డి ప్రకటించారు. బాన్సువాడ అభివృద్ధికి ప్రాధాన్యం ఇస్తామన్నారు. రైతుల సంక్షేమం కోసం.. తమకు అండగా ఉండాలని పోచారంను కోరినట్టు తెలిపారు. ప్రభుత్వ పాలనలో పోచారం శ్రీనివాస్ రెడ్డి అనుభవాన్ని ఉపయోగించుకుంటామని రేవంత్ రెడ్డి తెలిపారు. కాగా.. ఈసారి ప్రకటించనున్న మంత్రి వర్గంలో పోచారానికి మంత్రి పదవి ఇవ్వనున్నట్లు తెలుస్తోంది.