తెలంగాణలో మహిళా సంఘాలకు మంచి రోజులు.. 'మహిళా శక్తి క్యాంటీన్లు' ప్రారంభం

సంచలన నిర్ణయాలతో రేవంత్ రెడ్డి సర్కార్ తన మార్క్ చూపిస్తోంది. ఈ క్రమంలోనే.. రాష్ట్రంలోని మహిళల సంక్షేమం, అభివృద్ధిపై కాంగ్రెస్ ప్రభుత్వం ప్రత్యేక దృష్టి సారిస్తోంది. ఈ క్రమంలోనే.. రకరకాల పథకాలను రేవంత్ రెడ్డి ప్రభుత్వం అమలు చేస్తోంది. ఇప్పటికే మహాలక్ష్మి పథకం ద్వారా ఉచిత బస్సు ప్రయాణం, 500 రూపాయలకే గ్యాస్ సిలిండర్ ఇస్తుండగా.. గృహజ్యోతి పథకం కింద 200 యూనిట్ల మేర కరెంట్ ఫ్రీ ఇస్తున్నారు. కాగా.. రాష్ట్రంలోని మహిళా సంఘాలను ఆర్థికంగా బలోపేతం చేసేందుకు.. తాజాగా మహిళా శక్తి క్యాంటీన్లను కూడా ఏర్పాటు చేయాలన్న సంచలన నిర్ణయం తీసుకుంది రేవంత్ రెడ్డి సర్కార్.

ఈ నిర్ణయంపై ఇప్పటికే కసరత్తు పూర్తి చేసిన సర్కారు.. శుక్రవారం రోజు (జూన్ 21న) తెలంగాణ సచివాలయంలో రెండు మహిళా శక్తి క్యాంటీన్లకు ప్రారంభించింది కూడా. పంచాయతీ రాజ్, మహిళా శిశు సంక్షేమ శాఖ మంత్రి సీతక్కతో పాటు సీఎస్ శాంతికుమారి ఈ మహిళా శక్తి క్యాంటీన్లను ప్రారంభించారు.

మహిళా శక్తి క్యాంటీన్లు ఒక బ్రాండ్‌గా ఎదగాలని, దేశానికే ఆదర్శంగా నిలవాలని మంత్రి సీతక్క, సీఎస్ శాంతి కుమారి ఆకాంక్షించారు. ప్రతి ఇంటి అమ్మచేతి వంటలా మహిళా శక్తి క్యాంటిన్లు నాణ్యతకు మారుపేరుగా నిలవాలని పల్లె రుచులు, ఇప్ప పువ్వు లడ్డులు, నన్నారి వంటి సాంప్రదాయ ఆహార పానీయాలను పట్టణాలకు పరిచయం చేయాలని అన్నారు. రానున్న రెండేళ్లలో రాష్ట్రంలో 151 మహిళా శక్తి క్యాంటిన్లు ఏర్పాటు చేయాలనే ముఖ్యమంత్రి రేవంత్ రెడ్డి సంకల్పం నెరవేర్చే దిశగా ముందుకు సాగుతున్నామన్నారు.

స్థానికంగా లభ్యమయ్యే వనరులు, వస్తువుల ఆధారంగా.. ప్రజల అవసరాలకు తగ్గట్టుగా మహిళా శక్తి బిజినెస్ మోడల్స్ రూపొందించి రానున్న ఐదేళ్లలో మహిళ సంఘాలకు బ్యాంకు రుణాలు అందిస్తామని సీతక్క పేర్కొన్నారు. రాష్ట్రంలో మహిళా స్వయంసహాయక సంఘాల ఆధ్వర్యంలో ఏర్పాటు చేసేందుకు ఇప్పటికే ప్రభుత్వం పలు బిజినెస్ మోడల్స్ ను గుర్తించిందన్నారు. వాటిలో ప్రధానమైన ఆధార్ కేంద్రాలు, మీ– సేవ సెంటర్లు, పౌల్ట్రీ, డెయిరీ వ్యాపారాలు, క్యాంటీన్లు, స్టార్టప్ కంపెనీలకు ప్రభుత్వం అన్నిరకాల ప్రోత్సాహకాలు అందించడంతో పాటు, వడ్డీలేని రుణ సౌకర్యం కూడా కల్పిస్తుందన్నారు.

రాష్ట్రంలో మహిళా సంఘాలను ఆర్థికంగా బలోపేతం చేయాలన్న సీఎం రేవంత్ రెడ్డి ఆదేశాల మేరకు అన్ని ప్రధాన కార్యాలయాలు, కలెక్టరేట్లు, పర్యాటక ప్రాంతాలు, దేవాలయాలు, బస్టాండ్‌లు, పారిశ్రామిక ప్రాంతాల్లో మహిళా సంఘాల నిర్వహణలో ప్రత్యేకంగా క్యాంటీన్లను ఏర్పాటు చేయనున్నట్టు సీఎస్ శాంతి కుమారి ఇప్పటికే ప్రకటించారు.

రానున్న రెండేళ్లలో కనీసం 150 క్యాంటీన్లను ఏర్పాటు చేయాలని రేవంత్ రెడ్డి సర్కారు లక్ష్యంగా పెట్టుకుంది. ఈ క్యాంటీన్‎ల నిర్వహణను గ్రామాల్లోని మహిళా సంఘాలకు అప్పగించనున్నారు. క్యాంటీన్ నిర్వహణపై మహిళా సంఘాలకు ప్రత్యేక శిక్షణ కూడా ఇవ్వనున్నారు. ఈ క్యాంటీన్లతో మహిళా సంఘాలకు ఆర్థిక బలోపేతానికి మంచి రోజులు వచ్చినట్టు ఆనందం వ్యక్తం చేస్తున్నారు.