శుభకార్యంలో 25 వేలు డిమాండ్ చేసిన హిజ్రాలు.. ఇంటికి వచ్చి ఏంటీ దౌర్జన్యం? వీడియో వైరల్

సమాజంలో థర్డ్ జెండర్ మీద వివక్ష మెల్లగా పోతోంది. ఇప్పుడిప్పుడే వాళ్లను కూడా మనలో ఒకరిగా గుర్తిస్తున్నారు. ఆయా రంగాల్లో ప్రోత్సహిస్తూ భరోసానిస్తున్నారు. చాలా మంది.. పలు రంగాల్లో కష్టపడి రాణిస్తున్నారు కూడా. ఇది ఒకవైపు మాత్రమే. ఇంకోవైపు మాత్రం ఎప్పటిలాగే హిజ్రాలు రెచ్చిపోతున్నారు. ట్రైన్లు, రోడ్లపై డబ్బులు డిమాండ్ చేస్తూ.. ఇవ్వకపోతే వికృత చేష్టలకు పాల్పడుతూ.. జనాలను ఇబ్బందిపెడుతూనే ఉన్నారు. కొందరి ఆగడాలకు అంతే లేకుండా పోతోంది. ఈ ట్రైన్లు, రోడ్ల మీద డబ్బులు అడగటం ఒక ఎత్తైతే.. హైదరాబాద్‌లో ఎక్కడైనా శుభకార్యం చేయాలంటేనే జనాలు భయపడే పరిస్థితి వచ్చిందంటే పరిస్థితి ఎంత దారుణంగా ఉందో అర్థం చేసుకోవచ్చు.

ఎక్కడ పందిరి కనిపించినా.. చిన్న డెకరేషన్ కనిపించినా.. గ్యాంగులు దిగిపోతాయి. ఇంటి నిండా చుట్టాలు ఉన్న సమయంలో వచ్చి కుటుంబం సభ్యులను డబ్బులు డిమాండ్ చేస్తారు. అది కూడా ఏ పదో పరకో అయితే ఎలాంటి సమస్య లేదు. అతి చిన్న బర్త్ డే ఫంక్షన్ అయినా సరే.. మినిమం 10 వేల నుంచి మొదలుపెట్టి.. వాళ్ల నోటికి ఎంతొస్తే అంత డిమాండ్ చేస్తారు. ఇక పెళ్లిళ్లు, గృహప్రవేశాలు అయితే మాత్రం వాళ్ల నోటికి మొక్కాల్సిందే. ఒకవేళ వాళ్లు అడిగింది ఇవ్వకపోతే మాత్రం వికృత చేష్టలకు పాల్పడతారు. ఇచ్చేవరకు వదిలిపెట్టకుండా తిట్లు శాపనార్థాలతో.. ఆగమాగం చేస్తారు. బంధువుల ముందు వాళ్లు రచ్చ చేస్తుంటే పరువుపోతుందనో లేదా ఫంక్షన్ డిస్టర్బ్ అవుతుందన్న భయంతోనో వాళ్లు అడిగినంత సమర్పించుకుని.. వాళ్ల పీడ వదిలించుకుంటున్నారు.

ఈ క్రమంలోనే.. హైదరాబాద్‌లో జరిగిన ఓ ఘటనకు సంబంధించిన వీడియో సోల్ మీడియాలో వైరల్ అవుతోంది. నగరంలోని ఓ ప్రాంతంలో పెళ్లి వేడుక జరుగుతున్న ఇంటికి.. ముగ్గరు హిజ్రాలు వచ్చి నానా హంగామా సృష్టించారు. ఏకంగా.. 25 వేల రూపాయలు ఇవ్వాలంటూ డిమాండ్ చేశారు. ఎంతో కొంత తీసుకోవాలంటూ ఇంటివాళ్లు బతిమాలుతుంటే.. వాళ్లు మాత్రం కచ్చితంగా ఇవ్వాల్సిందేంటూ.. ఏదో బాకీ పడ్డట్టుగా గట్టిగా డిమాండ్ చేయటం అక్కడున్నవారిని షాక్‌కు గురి చేసింది. అంతేకాదు.. బంధువుల ముందు కుటుంబ సభ్యులతో అసభ్యంగా మాట్లాడుతూ.. రచ్చ రచ్చ చేశారు.

అయితే.. ఈ తతంగం మొత్తం అక్కడే ఉన్న ఓ వ్యక్తి వీడియో తీసి సోషల్ మీడియాలో పోస్ట్ చేశారు. తన ఫ్యామిలీ ఫంక్షన్‌లో హిజ్రాలు నానా హంగామా చేశారు. అదేదో రుణపడి ఉన్నట్టుగా 25 వేలు డిమాండ్ చేశారంటూ.. హైదరాబాద్ పోలీసులకు ట్యాగ్ చేస్తూ.. వీడియోను పోస్ట్ చేశారు. ఈ వీడియోపై స్పందించిన పోలీసులు.. ఆ ఏరియా వివరాలు ఇవ్వాలని.. ఇలాంటివి జరిగినప్పడు వెంటనే 100 కి కాల్ చేయాలని పోలీసులు సూచించారు.