చిన్న పిల్లలకు గణేష్ చందా ఇచ్చి,,,మరోసారి ట్రెండ్ అవుతున్న మంత్రి మల్లారెడ్డి

తెలంగాణ రాజకీయాల్లో కార్మిక మంత్రి చామకూర మాల్లారెడ్డి చాలా ఫేమస్. ఆ విషయం అందరికి తెలిసిందే. తెలంగాణ రాజకీయాలే కాదు, సోషల్ మీడియాపై ఇంతో అంతో అవగాహన ఉన్న ప్రతి ఒక్కరికీ మంత్రి మల్లన్న సుపరిచితుడే. ఆయన మాట్లాడే మాట తీరు, డైలాగులు అలా ఉంటాయి మరి. మల్లన్న సోషల్ మీడియాలోనూ బాగా ట్రెండ్ అయ్యాడు కూడా. 'పాలమ్మిన్నా.. పూలమ్మినా.. బోర్ వెల్ నడిపించినా.. కష్టపడ్డా.. పైకి వచ్చిన' అంటూ తాను కష్టపడ్డ విధానం గురించి వివరిస్తూ తనదైన స్టైల్‌లో అందరినీ మోటివేట్ చేసే ప్రయత్నం చేస్తారు మల్లన్న. పార్టీ మీటింగ్ అయినా.. అసెంబ్లీ అయినా ఆయన మైక్ అందుకున్నారంటే అక్కడ నవ్వులు పూయాల్సిందే. తనదైన ఛలోక్తులతో అప్పటి వరకు సీరియస్‌గా ఉన్న వాతావరణాన్ని ఒక్కసారిగా కూల్ చేస్తూ ఉంటారు. మల్లన్న ఎక్కడ ఉంటే అక్కడ జోష్ ఉంటుందని అంటుంటారు.

ఇలా నిత్యం వార్తల్లో నిలిచే మంత్రి మల్లారెడ్డి మరోసారి వార్తల్లో నిలిచారు. చిన్న పిల్లలకు డబ్బులు పంచుతున్న ఓ వీడియో వైరల్‌గా మారింది. వివరాల్లోకి వెళితే.. బోడుప్పల్‌లోని వీరారెడ్డి కాలనీలో ఓ కార్యక్రమంలో పాల్గొనేందుకు మంత్రి మల్లారెడ్డి ఆదివారం వెళ్లారు. ఆయన్ను చూసిన కొందరు పిల్లలు మంత్రి మల్లారెడ్డి వద్దకు వెళ్లారు. 'రేపు వినాయక చవితి.. వినాయకుడిని పెడుతున్నాం.. చందా రాయండి సార్' అని చిన్నపిల్లలు ఆయన్ను చుట్టుమూట్టారు. వారు అడిగే విధానం చూసి మురిసిపోయిన మల్లారెడ్డి జేబులో నుంచి నోట్ల కట్టను తీశారు. తలా రూ. 500 చొప్పున చిన్న పిల్లలకు పంచిపెట్టారు. ఆ డబ్బును దేవునికి మాత్రమే ఖర్చు పెట్టాలని పిల్లలకు చెప్పాడు కూడా. దీంతో పుల్ ఖుషీ అయిన పిల్లలు జై మల్లన్న అంటూ స్లోగన్లు ఇచ్చారు. వారి నినాదాలు విని మంత్రి మల్లన్న కూడా మురిసిపోయారు. ప్రస్తుతం ఈ వీడియో సోషల్ మీడియాలో తెగ ట్రెండ్ అవుతుంది. మల్లన్న ఎక్కడ ఉంటే అక్కడ జోష్ ఉంటుందని పలువురు నెటిజన్లు అంటున్నారు. మల్లన్నది వెన్నలాంటి చిన్నపిల్లల మనస్థత్వమని.. భోళా శంకరుడని పలువురు కొనియాడుతున్నారు.