క్రికెట్ ఆడుతూ గుండెపోటుతో సాఫ్ట్‌వేర్ ఉద్యోగి మృతి

రంగారెడ్డి జిల్లాలోని మహేశ్వరంలో తీవ్ర విషాదం చోటుచేసుకుంది. మహేశ్వరంలో గుండెపోటుతో ఓ సాఫ్ట్‌వేర్ ఉద్యోగి హఠాన్మరణం చెందాడు. బౌలింగ్ వేస్తుండగా వెన్నునొప్పి రావడంతో కారులో విశ్రాంతి తీసుకోవడం కోసం వెళ్లాడు. కారులో కూర్చోని సేద తీరుతుండగా ఒక్కసారిగా గుండెపోటుకు గురై అక్కడిక్కడే మరణించాడు. మణికంఠ మృతితో కుటుంబసభ్యులు కన్నీరుమున్నీరవుతున్నారు.

ఏపీలోని ప్రకాశం జిల్లా మద్దిపాడు మండలం మల్లవరం గ్రామానికి చెందిన మర్రిపూడి మణికంఠ(26) హైదరాబాద్‌లో గత కొంతకాలంగా సాఫ్ట్‌వేర్ ఉద్యోగం చేస్తున్నాడు. శనివారం ఆఫీస్‌కు సెలవు కావడంతో స్నేహితులతో కలిసి సరదాగా క్రికెట్ ఆడటం కోసం ఘట్టపల్లి శివారులో ఉన్న కేసీఆర్ క్రికెట్ స్టేడియానికి వెళ్లాడు. అయితే బౌలింగ్ చేస్తుండగా తీవ్ర వెన్నునొప్పి రావడంతో కారులో కూర్చోని రెస్ట్ తీసుకుంటున్నాడు. కొద్దిసేపటి తర్వాత మణికంఠను స్నేహితులు పిలవగా పలకలేదు. దీంతో కారు దగ్గరికి వెళ్లి చూడగా.. పడిపోయి ఉండటంతో వెంటనే దగ్గరలోని ఆస్పత్రికి స్నేహితులు తరలించారు.

అయితే మణికంఠ అప్పటికే చనిపోయినట్లు డాక్టర్లు నిర్ధారించారు. గుండెపోటుతోనే చనిపోయినట్లు వైద్యులు చెబుతున్నారు. మణికంఠ మరణంపై అతడి సోదరుడు పోలీసులకు ఫిర్యాదు చేశాడు. దీంతో పోలీసులు కేసు నమోదు చేసుకుని దర్యాప్తు చేపడుతున్నారు. మణికంఠ మృతదేహాన్ని పోస్టుమార్టం కోసం ఉస్మానియా హాస్పిటల్‌కు పోలీసులు తరలించారు. గుండెపోటుతోనే మణికంఠ చనిపోయి ఉంటాడని ఎస్‌ఐ నర్సయ్య చెబుతున్నారు. నగరంలోని ఓ ప్రైవేట్ కంపెనీలో సాఫ్ట్‌వేర్ జాబ్ చేస్తూ మణికంఠ కేపీహెచ్‌బీ కాలనీలోని ఓ హాస్టల్‌లో ఉంటున్నట్లు పోలీసులు గుర్తించారు. అలాగే మణికంఠ సోదరుడు వెంకటేష్ కూడా కేపీహెచ్‌బీ కాలనీలోనే నివాసం ఉంటూ సాఫ్ట్‌వేర్ కోర్సుల్లో ట్రైనింగ్ తీసుకుంటున్నట్లు తెలిపారు.

మణికంఠ మృతిపై అతడి సోదరుడు వెంకటేష్ మాాట్లాడుతూ.. సెలవు రోజుల్లో తామిద్దరం స్నేహితులతో కలిసి క్రికెట్ ఆడేందుకు స్టేడియానికి వెళతుంటామని తెలిపాడు. శనివారం క్రికెట్ ఆడేందుకు మణికంఠ స్టేడియానికి వెళ్లాడని, మధ్యాహ్నం సమయంలో మణికంఠ స్నేహితుడు యశ్వంత్ తనకు ఫోన్ చేశాడనన్నాడు. మణికంఠ బ్యాటింగ్ తర్వాత ఒక ఓవర్ బౌలింగ్ వేసి వెన్నునొప్పి కారణంగా కారు లోపలికి వెళ్లినట్లు చెప్పాడన్నాడు. కొద్దిసేపటి తర్వాత స్నేహితులు వెళ్లి చూడగా చనిపోయి ఉన్నట్లు మృతుడి సోదరుడు వెంకటేష్ చెబుతున్నాడు. మణికంఠ మృతితో అతడి కుటుంబంలో విషాదఛాయలు అలుముకున్నాయి. కాగా జిమ్ చేస్తూ, గేమ్స్ ఆడుతూ, డ్యాన్స్ చేస్తూ గుండెపోటుకు గురై యువకులు చనిపోతుండటం ఆందోళన కల్గిస్తోంది. దీనికి కారణాలు ఏంటనేది మాత్రం అంతుచిక్కడం లేదు.