మసీదుపై ఉగ్రదాడి.. 235 మందికి చేరిన మృతుల సంఖ్య

ఈజిప్టులోని సినాయ్‌ ద్వీపకల్పంలోని బిర్‌ అల్‌-అబెద్‌ పట్టణంలో ఉగ్రవాదులు శుక్రవారం సృష్టించిన నరమేధంలో మృతిచెందిన వారి సంఖ్య 235కి చేరింది. అల్‌-రౌదా మసీదులో ప్రార్థనలు జరుగుతున్న సమయంలో మసీదుపై విరుచుకుపడిన ఉగ్రమూకలు విచక్షణారహితంగా కాల్పులకి తెగబడి మసీదులో వున్న వారిలో 235కి పైగా మందికి పొట్టనపెట్టుకున్నారు. ఈ దాడిలో మరో 109 మందికి గాయాలయ్యాయి. తీవ్రంగా గాయపడిన వారిలో మరికొందరి పరిస్థితి విషమంగా వుండటంతో మృతుల సంఖ్య మరింత పెరిగే ప్రమాదం లేకపోలేదని అక్కడి భద్రతా బలగాలు తెలిపాయి.

శుక్రవారం మసీదులో సూఫీ ముస్లిం సోదరులు ప్రార్థనలు చేస్తున్న సమయంలో ఉగ్రవాదులు బాంబులు, తుపాకులతో ఊచకోతకు పాల్పడ్డారు. మసీదుకి దారితీసే రహదారులని వాహనాలతో బ్లాక్ చేసి మరీ ఈ దాడికి పాల్పడ్డారు. అనంతరం రంగంలోకి దిగిన ఈజిప్ట్ భద్రతా బలగాలు ఎయిర్ జెట్స్ సహాయంతో ఉగ్రవాదుల వాహనాల్ని ధ్వంసం చేశాయి. సూఫీ తెగకు చెందిన ముస్లిం సోదరులు భద్రతా బలగాలకు సహకరిస్తున్నారనే అనుమానంతోనే వారిపై ఈ దాడికి పాల్పడినట్లు పోలీసులు అనుమానిస్తున్నారు.

ఈ దాడికి బాధ్యత వహిస్తున్నట్టుగా ఉగ్రవాద సంస్థల నుంచి ఇంకా ఎటువంటి ప్రకటన వెలువడనప్పటికీ గతంలో జరిగిన దాడులని బట్టి చూస్తోంటే, ఇది ఐఎస్ఐఎస్ పనే అయ్యుంటుందని భద్రతా బలగాలు భావిస్తున్నాయి. ఇటీవల కాలంలో జరిగిన దాడుల్లో ఇదే అతి భయంకరమైన దాడిగా భద్రతా బలగాలు పేర్కొన్నాయి.

ఈజిప్టులో జరిగిన ఉగ్రదాడిని భారత ప్రధాని నరేంద్ర మోదీ, అమెరికా అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్, బ్రిటన్ విదేశాంగ శాఖ మంత్రి బోరిస్ జాన్సన్ వంటి వారు తీవ్రంగా ఖండించారు. ఉగ్రదాడిని పిరికిపందల చర్యగా పేర్కొన్న నేతలు.. మృతుల కుటుంబాలకి తమ ప్రగాఢ సంతాపం ప్రకటించారు. ప్రపంచంలో ఉగ్రవాదం ఏ రూపంలో వున్నా దానిని తుదముట్టించేందుకు భారత్ సహకరిస్తుందన్న ప్రధాని మోదీ.. ఈ కష్టకాలంలో ఈజిప్టు ప్రభుత్వానికి, ప్రజలకి భారత్ అండగా నిలుస్తుందని స్పష్టంచేశారు.