ప్రపంచంలో దాదాపు 200 దేశాలు ఉన్నా.. అమెరికా అగ్రరాజ్యంగా కొనసాగుతోంది. ఇక అమెరికా అధ్యక్షుడికి ఉన్న సదుపాయాలు, సౌకర్యాలు, సెక్యూరిటీ ప్రపంచంలోని ఇతర ఏ దేశ అధ్యక్షుడికి కూడా ఉండవు. ఇక అమెరికా అధ్యక్షుడు జో బైడెన్ చుట్టూ హై క్లాస్ ట్రైనింగ్ తీసుకుని.. ఎలాంటి వారు వచ్చినా అధ్యక్షుడి వద్దకు రాకుండా అడ్డుకునేంత పటిష్ఠ బందోబస్తు ఉంటుంది. ఇక అమెరికా అధ్యక్షుడు ఎక్కడికైనా పర్యటనకు వెళ్లాలంటే.. ఆ సెక్యూరిటీ సిబ్బంది.. కొన్ని రోజుల ముందుగానే అక్కడ తిష్ఠ వేసి భద్రతా ఏర్పాట్లు చేస్తూ ఉంటారు. ఇక అమెరికా అధ్యక్షుడి సెక్యూరిటీని చూసేందుకు యూఎస్ సీక్రెట్ సర్వీస్ ఏజెంట్ చూస్తూ ఉంటుంది.
ప్రపంచంలోనే అత్యంత సుశిక్షిత భద్రతా సిబ్బంది అమెరికా అధ్యక్షుడి జో బైడెన్.. వద్ద విధులు నిర్వహిస్తున్నారు. అలాంటి అమెరికా అధ్యక్షుడి సిబ్బందినే కాలిఫోర్నియాలో దొంగలు దోచుకున్నారు. కాలిఫోర్నియాలో బైడెన్ అధికారిక పర్యటన సందర్భంగా.. లాస్ ఏంజెల్స్లో యూఎస్ సీక్రెట్ సర్వీస్ ఏజెంట్ను బెదిరించి దొంగలు దోచుకున్నారు. ఇటీవల అమెరికా అధ్యక్షుడు జో బైడెన్, మాజీ అధ్యక్షుడు బరాక్ ఒబామా కలిసి లాస్ఏంజెల్స్లో ఓ విరాళాల సేకరణ కార్యక్రమాన్ని నిర్వహించారు. ఆ కార్యక్రమం పూర్తి అయిన తర్వాత అక్కడి నుంచి తిరిగి వెళ్తున్న ఓ సీక్రెట్ సర్వీస్ ఏజెంట్ను టూస్టిన్ అనే ప్రాంతంలో ఓ దుండగుడు తుపాకీతో బెదిరించి అతని వద్ద ఉన్న బ్యాగ్ను ఎత్తుకెళ్లిపోయాడు.
ఆ దుండగుడు తన వద్ద నుంచి బ్యాగును ఎత్తుకెళ్లి పోతుండగా.. సీక్రెట్ సర్వీస్ ఏజెంట్ కాల్పులు జరిపాడు. కానీ ఈ ఘటనలో అక్కడ ఉన్నవారు ఎవరైనా గాయపడ్డారా అన్న విషయం తెలియలేదు. ఆ తర్వాత ఈ ఘటనపై టూస్టిన్ పోలీసులకు యూఎస్ సీక్రెట్ సర్వీస్ ఏజెంట్ అధికారులు సమాచారం అందించడంతో ఘటనా స్థలానికి చేరుకుని దర్యాప్తు చేపట్టారు. ఈ ఘటనపై స్పందించిన యూఎస్ సీక్రెట్ సర్వీస్ ప్రతినిధి ఆంటోనీ గుగ్లెమొనీ.. తమ సిబ్బందిలో ఒకరిని కాలిఫోర్నియాలో ఓ దుండగుడు దోపిడీ చేశాడని తెలిపారు. ఈ ఘటనలో ఆ ఏజెంట్ తన సర్వీస్ గన్తో ఫైరింగ్ కూడా చేసినట్లు వెల్లడించారు. ఆ దుండగుడి కోసం గాలింపు చేపట్టామని పేర్కొన్నారు. ఘటన జరిగిన ప్రదేశం నుంచి ఓ కారు వేగంగా వెళ్లినట్లు అధికారులు గుర్తించారు.