ప్రాణాలు పోయినా పొలాలకు మీటర్లు పెట్టం...ఇదే కేంద్రానికి చెప్పాను

కేంద్ర ప్రభుత్వ తీరుపై  ముఖ్యమంత్రి కేసీఆర్ మండిపడ్డారు. రైతుల పొలాలకు ఎట్టి పరిస్థితుల్లో మీటర్లు బిగించమని, ఇదే విషయాన్ని కేంద్రానికి కూడా తాను స్పష్టంగా చెప్పానని కేసీఆర్ స్పష్టంచేశారు. కేంద్ర ప్రభుత్వం సాగుచట్టాలు రద్దు చేసే వరకు పంజాబ్‌ రైతులు పోరాడారని ఆయన ప్రశంసించారు. దేశ చరిత్రలో పంజాబ్‌ రైతులు గొప్ప పోరాటాలు చేశారన్నారు. భగత్‌సింగ్‌లాంటి ఎందరో వీరులు పోరాటం చేశారని.. పంజాబ్‌ యువకులు సైన్యంలో చేరి దేశ రక్షణలో ఉన్నారన్నారు. స్వాతంత్ర్యం వచ్చి 75 ఏళ్లు పూర్తయినా దేశం పరిస్థితి మారలేదని.. రైతుల సమస్యలకు ఇంకా పరిష్కారం దొరకడం లేదన్నారు.

పంజాబ్ రైతులు చేసిన పోరాటం దేశానికే ఆదర్శమన్నారు. వారి పోరాట స్ఫూర్తికి సలాం చేస్తున్నాను అన్నారు. రైతుల పరిస్థితు చూసి బాధ కలుగుతుందని.. కళ్లలో నీళ్లు తిరుగుతాయన్నారు. రైతు ఉద్యమంలో చనిపోయిన వారి కుటుంబాలతో పాటు గాల్వాన్‌లోయలో జరిగిన ఘర్షణల్లో అమరులైన జవాన్ల కుటుంబాలకు ఢిల్లీ సీఎం కేజ్రీవాల్, పంజాబ్‌ సీఎం భగవంత్ మాన్‌లతో కలిసి కేసీఆర్‌ ఆర్థిక సాయం కింద చెక్కులు పంపిణీ చేశారు. ఛండీగర్‌లో ఈ కార్యక్రమం జరిగింది.

హరిత విప్లవంతో పంజాబ్‌ రైతులు దేశం ఆకలిని తీర్చారని.. సాగుచట్టాలు రద్దు చేయించి వ్యవసాయాన్ని కాపాడారని పొగడ్తలు కురిపించారు. కేంద్రం ఇప్పటికీ వ్యవసాయంపైఆంక్షలు విధిస్తోందని.. సాగుకు ఉచితంగా విద్యుత్‌ అందిస్తుంటే మీటర్లు పెట్టాలనడం సరికాదన్నారు. ఏదైనా ప్రశ్నిస్తుంటే దేశ ద్రోహులనే ముద్ర వేస్తున్నారని విమర్శించారు.

తెలంగాణ ఏర్పడక ముందు రోజుకు 10మంది రైతులు చనిపోయేవారని.. కరెంట్ కోతలు తీవ్రంగా ఉండేవన్నారు. తెలంగాణ ఏర్పాటయ్యాక 24 గంటల నాణ్యమైన కరెంట్ ఇస్తున్నామన్నారు. కానీ కేంద్రం మీటర్లుపెట్టాలని ఒత్తిడి తెస్తోందని.. తన ప్రాణాలు పోయినా మీటర్లు పెట్టబోనని కేంద్రానికి చెప్పానన్నారు. రైతుల కోసం చేసే ఏ మంచి పనైనా కేంద్రానికి నచ్చదన్నారు. రైతులు తమ ఆందోళనలు కొనసాగించాలని.. ఈ పోరాటానికి తమ మద్దతు ఉంటుందన్నారు.