తిరుమలలో నవంబర్‌లో జరిగే విశేష ఉత్సవాలివే

తిరుమల శ్రీవారి దర్శనానికి వెళ్లే భక్తులకు ముఖ్య గమనిక. అక్టోబర్ 31న తిరుమలలో వీఐపీ బ్రేక్ దర్శనాలను టీటీడీ రద్దు చేసింది. అక్టోబర్ 31న దీపావళి పండుగను పురస్కరించుకుని తిరుమల శ్రీవారి ఆలయంలో దీపావళి ఆస్థానం నిర్వహించనున్నారు. ఈ నేపథ్యంలోనే వీఐపీ బ్రేక్ దర్శనాలను రద్దు చేసినట్లు టీటీడీ ఓ ప్రకటనలో పేర్కొంది. ఆస్థానం సందర్భంగా స్వయంగా ఆలయానికి వచ్చే ప్రోటోకాల్ ప్రముఖులు మినహా మిగతా వీఐపీ బ్రేక్ దర్శనాలను రద్దు చేసినట్లు తిరుమల తిరుపతి దేవస్థానం ప్రకటనలో వెల్లడించింది. ఈ నేపథ్యంలో అక్టోబర్ 30వ తేదీన సిఫార్సు లేఖలను స్వీకరించమని తెలిపింది. భక్తులు ఈ విషయాన్ని గమనించుకోవాలని టీటీడీ ప్రకటనలో పేర్కొంది.

మరోవైపు ప్రతి నెలా విడుదల చేసిన విధంగానే ఈసారి కూడా టీటీడీ వచ్చే నెలలో జరగబోయే విశేష ఉత్సవాల వివరాలను వెల్లడించింది. తర్వాత నెలలో తిరుమలలో జరిగే విశేష ఉత్సవాల గురించి టీటీడీ ముందు నెలలోనే భక్తులకు సమాచారం ఇస్తూ ఉంటుంది. ఈ క్రమంలోనే నవంబర్ నెలలో తిరుమల శ్రీవారి ఆలయంలో జరిగే విశేష ఉత్సవాల జాబితాను టీటీడీ ప్రకటించింది. తిరుమలలో నవంబరు 1న కేదారగౌరీ వ్రతం నిర్వహించనున్నారు. అలాగే నవంబరు 3న భగినీహస్త భోజనం, శ్రీ తిరుమలనంబి శాత్తుమొర నిర్వహిస్తారు.

 ఇక నవంబరు 5న నాగుల చవితి వేడుకలు జరుగుతాయి. అలాగే నాగుల చవితిని పురస్కరించుకుని పెద్ద శేష వాహనసేవ ఉంటుంది. నవంబరు 6వ తేదీన శ్రీ మనవాళ మహామునుల శాత్తుమొర, నవంబరు 8న వార్షిక పుష్పయాగానికి అంకురార్పణ నిర్వహిస్తారు. నవంబర్ 9వ తేదీన శ్రీవారి పుష్పయాగం, అత్రి మహర్షి వర్ష తిరునక్షత్రం, పిళ్లైలోకాచార్య వర్ష తిరు నక్షత్రం, పోయిగైయాళ్వార్ వర్ష తిరు నక్షత్రం, పూదత్తాళ్వార్ వర్ష తిరు నక్షత్రం, వేదాంత దేశికుల శాత్తుమొర నిర్వహిస్తారు. నవంబర్ 10న పేయాళ్వార్ వర్ష తిరు నక్షత్రం, 11న శ్రీ యాజ్ఞవల్క్య జయంతి, 12న ప్రబోధన ఏకాదశి ఉంటుంది.

తిరుమలలో నవంబరు 13న కైశిక ద్వాదశి ఆస్థానం, చాతుర్మాస్య వ్రత సమాప్తి ఉంటుంది. నవంబరు 15న కార్తీక పౌర్ణమి వేడుకలు నిర్వహిస్తారు. నవంబర్ 28న ధన్వంతరి జయంతి, 29న మాస శివరాత్రి వేడుకలు ఉంటాయని టీటీడీ ఓ ప్రకటనలో పేర్కొంది.