ఈ వారం ఐపీఓల సందడి.. అందరి చూపు హ్యూందాయ్ పైనే.. 3 లిస్టింగులు, 9 సబ్‌స్క్రిప్షన్లు!

దేశీయ స్టాక్ మార్కెట్‌లో పబ్లిక్ ఇష్యూల జాతర కొనసాగుతోంది. ఈ వారం కూడా ఐపీఓ సందడి కొనసాగనుంది. మెయిన్‌బోర్డ్ నుంచి ఎస్ఎంఈ విభాగంలోనూ పలు కంపెనీల ఇనీషియల్ పబ్లిక్ ఆఫర్ కి వస్తున్నాయి. రూ. 10,985 కోట్లు సమీకరించే లక్ష్యంతో మొత్తం 9 కంపెనీలు పబ్లిక్ ఇష్యూకు వస్తున్నాయి. అలాగే హ్యూందాయ్ మోటార్ ఇండియా ఐపీఓతో పాటు మూడు కంపెనీలు ఈ వారం స్టాక్ మార్కెట్లలోకి లిస్టింగ్ కానున్నాయి. దేశంలోనే అతిపెద్ద ఐపీఓగా వస్తున్న సందర్భంగా హ్యూందాయ్ ఐపీఓపైనే అందరి చూపు ఉంది.

వారీ ఎనర్జీస్ ఐపీఓ..

సోలార్ ప్యానెల్ తయారీ కంపెనీ అయిన వారీ ఎనర్జీస్ పబ్లిక్ ఇష్యూకు వస్తోంది. ఈ ఐపీఓ విలువ రూ. 4,321 కోట్లుగా ఉంది. అక్టోబర్ 21వ తేదీన సబ్‌స్క్రప్షన్ మొదలై 23వ తేదీతో ముగుస్తుంది. యాంకర్ ఇన్వెస్టర్లకు అక్టోబర్ 18వ తేదీనే బిడ్డింగ్ మొదలు కానుంది. ఐపీఓ ప్రైస్ బ్యాండ్ రూ. 1427- 1503గా నిర్ణయించారు. 9 షేర్లను ఒక లాట్‌గా నిర్ణయించారు.

దీపక్ బిల్డర్స్ అండ్ ఇంజినీర్..

మెయిన్‌ బోర్డు నుంచి వస్తోన్న ఐపీఓల్లో దీపక్ బిల్డర్స్ అండ్ ఇంజినీర్ ఒకటి. ఈ ఐపీఓ విలువ రూ.250 కోట్లుగా ఉంది. అక్టోబర్ 21న సబ్‌స్క్రిప్షన్ మొదలై 23వ తేదీతో ముగుస్తుంది. ధరల శ్రేణి రూ.192-రూ.203గా నిర్ణయించారు.

గోదావరీ బయో ఫైనరీస్..

ఇథనాల్ కెమికల్స్ తయారు చేసే గోదావరీ బయో ఫైనరీస్ సంస్థ ఐపీఓ అక్టోబర్ 23వ తేదీన ప్రారంభం కానుంది. ఈ ఐపీఓ విలువ రూ. 555 కోట్లుగా ఉంది. ధరల శ్రేణి రూ.334-352 మధ్య నిర్ణయించారు. అక్టోబర్ 25వ తేదీ వరకు బిడ్లు దాఖలు చేసేందుకు అవకాశం ఉంది.

హ్యూందాయ్ సహా లిస్టింగులు ఇవే..

ఇప్పటికే సబ్‌స్క్రిప్షన్ పూర్తి చేసుకున్న హ్యూందాయ్ మోటార్ ఐపీఓ లిస్టింగ్‌పైనే అందరి చూపు ఉంది. ఈ కంపెనీ షేర్లు అక్టోబర్ 22వ తేదీన స్టాక్ మార్కెట్లలో లిస్టింగ్ కానున్నాయి. అలాగే ఎస్ఎంఈ విభాగంలో లక్ష్య పవర్ టెక్ ఐపీఓ అక్టోబర్ 23వ తేదీన ఫ్రెషరా ఆగ్రో ఎక్స్ పోర్ట్ అక్టోబర్ 24వ తేదీన లిస్ట్ కానున్నాయి.