సహనం కోల్పోయిన వెస్టిండీస్ ఆల్ రౌండర్,,, వైరల్‌గా మారిన కార్లోస్ బ్రాత్‌వైట్ వీడియో

ఏ ఆటలో అయినా అంపైర్లు కొన్ని సార్లు అనుకోకుండా తప్పు నిర్ణయాలు తీసుకునే అవకాశం ఉంటుంది. ముఖ్యంగా క్రికెట్ వంటి ఆటగాళ్లు ఇది ఎక్కువగా జరుగుతుంది. ఔట్ కాకపోయినా.. ఔట్ అని ఇవ్వడం, క్యాచ్‌లు, ఎల్బీలు ఇలా ఎన్నోసార్లు అంపైర్లు పొరపాటు చేసే అవకాశం ఉంటుంది. అయితే ఇలా తమకు వ్యతిరేకంగా వచ్చే నిర్ణయాలపై కొన్ని సార్లు ఆటగాళ్లు ఆగ్రహానికి గురవుతారు. ఏకంగా మైదానంలోనే తమ కోపాన్ని ప్రదర్శిస్తారు. ఇది ఇదివరకే చాలా సార్లు జరిగింది. తాజాగా వెస్టిండీస్‌లో జరుగుతున్న ఓ టీ10 లీగ్ మ్యాచులోనూ ఇదే జరిగింది.

టోర్నీలో భాగంగా న్యూయార్క్ స్ట్రైకర్స్, గ్రాండ్ కేమన్ జాగ్వార్స్ జట్ల మధ్య మ్యాచ్ జరిగింది. న్యూయార్క్ స్ట్రైకర్స్ బ్యాటింగ్ చేస్తుండగా అంపైర్ ఒక తప్పు నిర్ణయం ఇచ్చాడు! ఈ మ్యాచులో జాగ్వార్స్ బౌలర్ జోషువా లిటిల్ 9వ ఓవర్ వేస్తున్నాడు. అయితే మూడో బంతిని భారీ షాట్ కొట్టేందుకు వెస్టిండీస్ ఆల్ రౌండర్, బిగ్ హిట్టర్ కార్లోస్ బ్రాత్‌వైట్ ప్రయత్నించాడు. కానీ బౌలర్ వేసిన బంతిని.. వికెట్ కీపర్ చేతిలో పడింది. బంతికి బ్యాటుకు తగిలిందని ఫీల్డర్లు అప్పీల్ చేశారు. అంపైర్ కూడా బంతి బ్యాటుకు తగిలిన తర్వాత వికెట్ కీపర్ చేతుల్లో పడిందని భావించాడు. దీంతో ఔట్‌గా ప్రకటించాడు. ఈ నిర్ణయం బ్రాత్‌వైట్‌కు ఆగ్రహం తెప్పించింది.

తాను ఆఔట్ కాలేదని.. బంతిని తన భుజానకి తాకిందని బ్రాత్‌వైట్ చెప్పే ప్రయత్నం చేశాడు. కానీ అంపైర్ తన నిర్ణయాన్ని మార్చుకోకపోవడంతో చేసేదే లేక నిరాశగా పెవిలియన్ వైపు నడిచాడు. అయితే డగౌట్‌కు వెళ్తూ.. బౌండరీ రోప్ వద్దకు చేరుకోగానే బ్రాత్‌వైట్ కోపం కట్టలు తెంచుకుంది. తలపై ఉన్న హెల్మెట్‌ను తీసి గాల్లోకి ఎగిరేసిన ఈ వెస్టిండీస్ ప్లేయర్.. బంతిని కొట్టినట్లు బలంగా కొట్టాడు. దీంతో హెల్మెట్ వెళ్లి బౌండరీ రోప్ అవతల పడింది. అయితే ఇదంతా చూస్తున్న బౌండరీ సమీపంలో ఉన్న న్యూయార్క్ జట్టు ప్లేయర్.. ఒక్కసారిగా భయాందోళనకు గురయ్యాడు. హెల్మెట్ తనపై ఎక్కడ పడుతుందో అని బెదిరిపోయాడు. బ్రాత్‌వైట్ కూడా ఇక్కడితో ఆగకుండా.. డగౌట్‌లోకి వెళ్లాక బ్యాటును విసిరిపడేశాడు. ఇందుకు సంబంధించిన వీడియో సోషల్ మీడియాలో వైరల్‌గా మారింది.

బ్రాత్‌వైట్ వ్యవహరించిన తీరుపై సోషల్ మీడియాలో విమర్శలు వస్తున్నాయి. ఆటలో ఇవన్నీ జరిగేవే అని.. ఇంతదానికే హెల్మెట్‌ను బ్యాటుతో కొట్టాలా అని ప్రశ్నిస్తున్నారు. సదరు టోర్నీ నిర్వహకులు అతడిపై చర్యలు తీసుకోవాలని కోరుతున్నారు. మరి నిర్వహకులు ఏం చర్యలు తీసుకుంటారో చూడాలి.