సీనియర్లకు.. 9.5 శాతం రిటర్న్స్ ఇచ్చే 4 స్కీమ్స్ ఇవే!

ప్రపంచ వృద్ధుల దినోత్సవం సందర్భంగా సీనియర్ సిటిజన్లకు ఆర్థిక భరోసా కల్పించే కొన్ని పెట్టుబడి మార్గాల గురించి ఇప్పుడు మనం తెలుసుకుందాం. పదవీ విరమణ తర్వాత నెల నెలా రాబడి అందించే ఈ పథకాల ద్వారా వారి మలి జీవితం సాఫీగా సాగిపోతుందని చెప్పవచ్చు. వృద్ధాప్యంలో నెల నెలా పెన్షన్ మాదిరిగా స్థిరమైన రాబడి ఉంటే వారికి ఆర్థికంగా ఎలాంటి ఇబ్బందులు ఉండవు. మరి మీ ఇంట్లో సైతం సీనియర్ సిటిజన్లు ఉంటే వారి పేరుపై ఈ నాలుగు పథకాల్లో ఏదో ఒకదాంట్లో పెట్టుబడి పెట్టడం ప్రారంభించండి.

సీనియర్ సిటిజన్ బ్యాంక్ డిపాజిట్లు

ప్రస్తుతం దాదాపు అన్ని బ్యాంకులు సీనియర్ సిటిజన్ ఫిక్స్‌డ్ డిపాజిట్లపై అదనంగా 50 బేసిస్ పాయింట్ల వడ్డీ ఇస్తున్నాయి. ఫిక్స్‌డ్ డిపాజిట్లపై వచ్చే వడ్డీ ఆదాయాన్ని తమకు అనువైన విధంగా విడతల వారీగా తీసుకునేందుకు సైతం బ్యాంకులు అవకాశం కల్పిస్తాయి. నెలకోసారి, మూడు నెలలు, ఆరు నెలలు, వార్షికంగా వడ్డీ పొందవచ్చు. ఇతర సంప్రదాయ పథకాలతో పోలిస్తే బ్యాంకు డిపాజిట్లలో ఫ్లెక్సిబులిటీ ఉంటుంది. తమకు కావాల్సినప్పుడు తమ డబ్బులను తీసుకోవచ్చు. ఇందులో లాకిన్ పీరియడ్ అంటూ ఉండదు. అలాగే ఐదేళ్ల ట్యాక్స్ సేవింగ్స్ డిపాజిట్లు చేస్తే సెక్షన్ 80సీ కింద ట్యాక్స్ బెనిఫిట్స్ ఉంటాయి. ఇప్పుడు చాలా బ్యాంకులు 9.5 శాతం వరకు వడ్డీ రేట్లు కల్పిస్తున్నాయి.

సీనియర్ సిటిజన్ సేవింగ్ స్కీమ్ 

స్థిరమైన రాబడి కోరుకునే సీనియర్ సిటిజన్లు కేంద్ర ప్రభుత్వం అందిస్తున్న ఈ సీనియర్ సిటిజన్ సేవింగ్ స్కీమ్‌లో పెట్టుబడి పెట్టవచ్చు. ప్రతి మూడు నెలలకు ఒకసారి వడ్డీ చెల్లిస్తారు. ఒక ఆర్థిక సంవత్సరంగాలో మార్చి 31, జూన్ 30, సెప్టెంబర్ 30, డిసెంబర్ 31 తేదీల్లో వడ్డీ జమవుతుంది. ఇందులో 5 ఏళ్ల లాకిన్ పీరియడ్ ఉంటుంది. అయితే, ముందస్తుగా తీసుకుంటే పెనాల్టీ కట్టాలి. ఇందులో కనీసం రూ. 1000 నుంచి ఇన్వెస్ట్ చేయవచ్చు. గరిష్ఠంగా రూ.30 లక్షల వరకు పొదుపు చేయవచ్చు.

పోస్టాఫీస్ మంథ్లీ ఇన్‌కమ్ స్కీమ్ 

పోస్టాఫీసు నెలవారీ ఆదాయ పథకం మెచ్యూరిటీ సమయం 5 ఏళ్లుగా ఉంటుంది. ఇందులో ఒక వ్యక్తి గరిష్ఠంగా రూ. 9 లక్షల వరకు పెట్టుబడి పెట్టవచ్చు. జాయింట్ ఖాతా తీసుకుంటే గరిష్ఠంగా రూ.15 లక్షల వరకు పొదుపు చేయవచ్చు. నెల వారీగా వడ్డీ చెల్లిస్తారు. అయితే, ఇందులో ఎలాంట్ ట్యాక్స్ బెనిఫిట్స్ ఉండవని గుర్తుంచుకోవాలి. ఏడాది వరకు ప్రీమెచ్యూర్ చేయలేరు. మూడేళ్లలోపు ఖాతా మూసివేస్తే వడ్డీలో 2 శాతం కోత పడుతుంది. 3 ఏళ్ల నుంచి 5 ఏళ్లలోపు అయితే 1 శాతం కోత విధిస్తారు.

ఆర్‌బీఐ ఫ్లోటింగ్ రేట్ సేవింగ్స్ బాండ్లు

రిజర్వ్ బ్యాంక్ అందిస్తోన్న ఫ్లోటింగ్ రేట్ సేవింగ్స్ బాండ్ల వడ్డీ రేట్లు అనేవి నేషనల్ సేవింగ్స్ సర్టిఫికెట్ పథకానికి లింక్ అయి ఉంటాయి. ఆ స్కీమ్ కంటే ఆర్‌బీఐ బాండ్లకు అదనంగా 0.35 శాతం వడ్డీ ఎక్కువిస్తారు. నేషనల్ సేవింగ్స్ సర్టిఫికెట్ వడ్డీ రేట్లలో మార్పులు వస్తే ఆర్‌బీఐ బాండ్ల వడ్డీలోనూ మార్పు వస్తుంది. ఇందులో కనీస పెట్టుబడి రూ.1000గా ఉంది. గరిష్ఠంగా ఎంతైనా ఇన్వెస్ట్ చేయవచ్చు. ఏడాళ్ల మెచ్యూరిటీ పీరియడ్ ఉంటుంది. సీనియర్లు ప్రీమెచ్యూర్ విత్ డ్రా చేయవచ్చు. జనవరి 1, జులై 1 తేదీల్లో వడ్డీ చెల్లిస్తారు.