మాధురి భర్త ఎంట్రీ.. భార్య గురించి కీలక వ్యాఖ్యలు

రోజుకో మలుపు తిరుగుతున్న దువ్వాడ కుటుంబ కథా చిత్రం.. మంగళవారం మరో మలుపు తీసుకుంది. దువ్వాడ శ్రీనివాస్ కుటుంబ వివాదంలో కీలకంగా వినిపిస్తున్న పేరు దివ్వెల మాధురి. దివ్వెల మాధురి ఆత్మహత్యాయత్నంతో ఈ ఎపిసోడ్‌లో ఓ ట్విస్ట్ నెలకొనగా.. మంగళవారం మరో మలుపు తిరిగింది. దివ్వెల మాధురి భర్త.. మహేష్ చంద్రబోస్ సీన్‌లోకి ఎంట్రీ ఇచ్చారు. తన భార్య మాధురిపై తనకు పూర్తి నమ్మకం ఉందంటూ మహేష్ కీలక వ్యాఖ్యలు చేశారు. గత వారం రోజులుగా జరుగుతున్న పరిణామాలను గమనించిన తర్వాత మహేష్ ఈ వ్యాఖ్యలు చేయడం గమనార్హం. తనకు రాజకీయాలంటే ఇష్టం లేదన్న ఆయన.. తన భార్యకు పాలిటిక్స్ అంటే ఇంట్రెస్ట్ ఉన్నట్లు చెప్పారు. అందుకే రాజకీయాల్లోకి వెళ్తానంటే సపోర్ట్ చేసినట్లు చెప్పారు.

అయితే దివ్వెల మాధురి రాజకీయంగా ఎదుగుతోందనే కారణంతోనే తనపై ఇలాంటి ఆరోపణలు చేస్తున్నారంటూ ఓ టీవీ ఛానెల్‌కు ఇచ్చిన ఇంటర్వ్యూలో మహేష్ ఖండించారు. అలాగే తన కుటుంబానికి ఎలాంటి ఆర్థిక సమస్యలు లేవని మహేష్ చెప్పారు. " నేను మెరైన్ ఇంజినీర్. నాకు పది లక్షలు జీతం. జీతం మొత్తం మా ఆవిడకే పంపిస్తాను. ఆర్థికంగా కూడా సమస్యలు లేవు. ఇక మాధురి చక్కని డ్యాన్సర్. చివరకు మాధురి డ్యాన్స్ మీద కూడా ఆరోపణలు చేశారు. మాధురి నన్ను బాబు లాగా చూసుకుంది. మాధురి నాకు అమ్మలాంటిది. మా అమ్మ తర్వాత అమ్మలాంటిది. కుక్కలు మొరుగుతుంటాయి. నేను పట్టించుకోను. అనుమానించడానికి నేనేమీ శ్రీరాముణ్ని కాదు. ఎవరేమన్నా నా మాధురి నా మాధురే" అని మహేష్ చంద్రబోస్ అభిప్రాయపడ్డారు.

మాధురి కోసం రికమండేషన్.. ఎమ్మెల్సీ దువ్వాడ శ్రీనివాస్ ఆడియో వైరల్

అయితే భర్త రియాక్షన్ మీద మాధురి స్పందించారు. ఆస్పత్రి నుంచి డిశ్చార్జ్ అయిన మాధురి మీడియాతో మాట్లాడారు. " నా భర్త చాలా మద్దతుగా మాట్లాడారు. దువ్వాడ శ్రీను ఎప్పుడూ మద్దతుగా ఉంటారు. భవిష్యత్తు ఎవరితో అనేది నిర్ణయం తీసుకోవాల్సి ఉంది. దువ్వాడ శ్రీను ఇంటికి వెళ్తాను. త్వరలో పార్టీ కార్యక్రమాలకు హాజరవుతా" అంటూ మాధురి కీలక వ్యాఖ్యలు చేశారు. అలాగే దువ్వాడ వాణిపైనా మాధురి కీలక వ్యాఖ్యలు చేశారు. దువ్వాడ రాజకీయ భవిష్యత్‌కు నష్టం చేయాలనేదే వాణి ప్రయత్నమని మాధురి అన్నారు. దువ్వాడ వాణి ఆరోపణలతో తన కుటుంబసభ్యులు తనకు దూరమయ్యారని చెప్పారు. వాణి పోరాటంలో భర్తపై ప్రేమ కనిపించడం లేదన్న దివ్వెల మాధురి.. తనను, తన కుటుంబాన్ని బద్నాం చేయొద్దని కోరారు. వాణి డిమాండ్లతో తనకు సంబంధం లేదన్న మాధురి.. ప్రస్తుతం ఉంటున్న ఇంటిమీద తాను కూడా పెట్టుబడి పెట్టానన్నారు. తన వాటా తాను తీసుకుంటానని స్పష్టం చేశారు.

అయితే ఆరోపణలు వచ్చిన తర్వాత తొలిసారిగా మీడియా ముందుకు వచ్చిన మాధురి.. తన భర్త నుంచి దూరంగా ఉంటున్నట్లు చెప్పారు. ఈ నేపథ్యంలో దివ్వెల మాధురి భర్త సీన్ లోకి ఎంట్రీ ఇవ్వడం.. మాధురి కూడా భవిష్యత్తు ఎవరితో అనేది నిర్ణయం తీసుకుంటానని చెప్పడం ఆసక్తికరంగా మారింది.