అనుమతి లేకుండా అంబానీ పెళ్లికి.. ఏపీకి చెందిన ఇద్దరు అరెస్ట్

రిలయన్స్ ఇండస్ట్రీస్ అధినేత ముకేష్ అంబానీ చిన్న కుమారుడు అనంత్ అంబానీ, రాధికా మర్చంట్‌ల వివాహం అత్యంత ఘనంగా జరిగిన సంగతి తెలిసిందే. ఈ వివాహ వేడుకకు ప్రపంచంలో పేరొందిన సెలబ్రిటీలు హాజరయ్యారు. సినీ, క్రీడా, రాజకీయ రంగాలకు చెందిన ఎంతో మంది అతిరథ మహారథులు ఈ వేడుకలో పాల్గొన్నారు. ముంబైలోని జియో కన్వెన్షన్ సెంటర్‌లో జరిగిన ఈ కార్యక్రమానికి ప్రధానమంత్రి నరేంద్ర మోదీతో పాటుగా అనేక మంది వీవీఐపీలు, వీఐపీలు హాజరయ్యారు. అయితే ఇంతమంది ప్రముఖుల నడుమ అత్యంత కట్టుదిట్టమైన భద్రత నడుమ జరిగిన వేడుకలకు.. అనుమతి లేకుండా ఓ ఇద్దరు ఈ కార్యక్రమానికి హాజరయ్యారు. ఓ యూట్యూబర్, అలాగే మరో వ్యక్తి కూడా ఆహ్వాన పత్రిక లేకున్నా కూడా ఈ వేడుకలకు హాజరయ్యారు. ఈ విషయాన్ని ముంబై పోలీసులు తెలిపారు.

అనంత్ అంబానీ రాధికా మర్చంట్ వివాహం కార్యక్రమానికి ఆహ్వానం లేకుండా హాజరైన ఇద్దరు యువకులను ముంబై పోలీసులు అదుపులోకి తీసుకున్నారు. వీరిని ఏపీకి చెందిన యూట్యూబర్‌ అల్లూరి వెంకటేష్, వ్యాపారవేత్తగా చెప్పుకునే షఫీ షేక్‌గా ముంబై పోలీసులు గుర్తించారు. వీరిపై వేర్వేరుగా కేసులు నమోదు చేసిన బాంద్రా కుర్లా కాంప్లెక్స్ పోలీసులు.. పోలీస్ స్టేషన్‌కు తీసుకువెళ్లారు. అనంతరం నోటీసులు ఇచ్చి పంపించివేశారు, వివాహ వేడుకకు ఆహ్వానం లేదని విచారణలో చెప్పినట్లు పోలీసులు తెలిపారు. వీరిపై చట్టపరంగా చర్యలు తీసుకుంటామని ముంబై పోలీసులు స్పష్టం చేశారు.

మరోవైపు జియో వరల్డ్ సెంటర్‌లో జరిగిన అనంత్ అంబానీ - రాధికా మర్చంట్ పెళ్లి వేడుకలకు ఏపీ నుంచి సీఎం చంద్రబాబు నాయుడు సతీమణితో కలిసి హాజరయ్యారు. చంద్రబాబు, నారా భువనేశ్వరితో పాటుగా ఏపీ డిప్యూటీ సీఎం పవన్ కళ్యాణ్, కేంద్ర మంత్రులు కింజరాపు రామ్మోహన్ నాయుడు, పెమ్మసాని చంద్రశేఖర్ హాజరయ్యారు. అలాగే టాలీవుడ్ సినీ సెలబ్రిటీలు మహేష్ బాబు, రామ్‌చరణ్ కుటుంబ సమేతంగా ఈ పెళ్లిలో పాల్గొన్నారు. అలాగే విక్టరీ వెంకటేష్, సూపర్ స్టార్ రజినీకాంత్, మహేంద్ర సింగ్ ధోనీ వంటి ప్రముఖులు కూడా ఈ పెళ్లిలో కనువిందు చేశారు.