మద్యం బాటిళ్లు పంచి ఓటర్ల రుణం తీర్చుకున్న బీజేపీ ఎంపీ

ఎన్నికల్లో గెలుపొందిన ప్రజాప్రతినిధులు తమ అనుచరులు, కార్యకర్తలు, తమను గెలిపించిన ప్రజల కోసం ఆత్మీయ సమావేశాలు నిర్వహించడం సర్వసాధారణం. కార్యకర్తలు, ప్రజలకు కృతజ్ఞతలు తెలియజేసి వారికి మంచి విందు భోజనం పెట్టిస్తారు. అయితే, కర్ణాటకకు చెందిన ఓ బీజేపీ ఎంపీ మాత్రం అక్కడితో ఆగలేదు. ఆత్మీయ సమావేశానికి వచ్చిన వారందరికీ ఉచితంగా మద్యం పంపిణీ చేశారు. ఆ ఎంపీ నిర్వాకం ప్రస్తుతం సోషల్ మీడియాలో చర్చనీయాంశంగా మారింది. ఇటీవల జరిగిన సార్వత్రిక ఎన్నికల్లో కర్ణాటకలోకి చిక్కబల్లాపూర్ స్థానం నుంచి మాజీ మంత్రి డాక్టర్ కె.సుధాకర్ గెలుపొందారు. బీజేపీ తరఫున పోటీచేసిన సుధాకర్.. కాంగ్రెస్ అభ్యర్థి ఎంఎస్ రక్షా రామయ్యపై 1.6 లక్షలకు పైగా ఓట్ల మెజారిటీ ఘన విజయం సాధించారు.ఈ నేపథ్యంలో తనకు భారీ విజయాన్ని అందించిన చిక్కబల్లాపూర్ ఓటర్లకు పార్టీ ఇవ్వాలని సుధాకర్ నిర్ణయించుకున్నారు. ఆదివారం బెంగళూరు శివారులో అభినందన సభను ఏర్పాటు చేశారు. ఈ సభకు ట్రక్కుల్లో లిక్కర్ బాటిళ్లను తీసుకొచ్చారు. ఆదివారం మధ్యాహ్నం 12.30 గంటలకు ఆత్మీయ సమావేశం ప్రారంభం కాగా.. భోజనానికి ముందు అందరికీ మద్యం పంపిణీ చేశారు. జనం క్యూలైన్‌లో నిలబడి బీరు, లిక్కర్ బాటిళ్లను అందుకున్నారు. ఈ లిక్కర్ పంపిణీ కార్యక్రమానికి పోలీసు బందోబస్తు కూడా ఏర్పాటుచేయడం గమనార్హం.

అభినందన సభలో బహిరంగంగా ఎంపీ సుధాకర్ అందరికీ లిక్కర్ పంపిణీ చేయడం ఇప్పుడు కర్ణాటక రాజకీయాల్లో తీవ్ర దుమారం రేపుతోంది. పోలీసుల సమక్షంలో మద్యం పంపిణీ చేయడం మరిన్ని విమర్శలకు తావిచ్చింది. బీజేపీ ఎంపీపై అధికార కాంగ్రెస్ పార్టీ మండి పడుతోంది. దీనిపై బీజేపీ జాతీయ అధ్యక్షుడు జేపీ నడ్డా సమాధానం చెప్పాలని కర్ణాటక డిప్యూటీ సీఎం డీకే శివకుమార్ డిమాండ్ చేశారు. అయితే, ఎంపీ సుధాకర్ ఏర్పాటుచేసిన ఈ సమావేశానికి అన్ని అనుమతులు ఉన్నాయని బెంగళూరు గ్రామీణ పోలీసులు చెప్పడం కొసమెరుపు. లిక్కర్ పంపిణీ చేయడానికి ఎక్సైజ్ డిపార్ట్‌మెంట్ నుంచి సుధాకర్ పర్మిషన్ తీసుకున్నారని పోలీసులు పేర్కొన్నారు. అలాగే, సభ నిర్వహణకు పోలీసు బందోబస్తు కావాలని కోరారని వివరించారు.