మెగాస్టార్ చిరంజీవికి మోదీ బంపరాఫర్..?

మెగాస్టార్ చిరంజీవిని త్వరలోనే కొత్త పాత్రలో చూడబోతున్నా్మా.. త్వరలోనే ఆయన మళ్లీ పొలిటికల్ బాట పట్టనున్నారా.. అంటే సోషల్ మీడియాలో అవుననే సమాధానమే వస్తోంది. గత కొన్నేళ్లుగా రాజకీయాలకు దూరంగా ఉన్న చిరంజీవిని.. మళ్లీ రాజకీయ తెరపైకి తీసుకువచ్చే ప్రయత్నం జరుగుతోందని తెలిసింది. ఆంధ్రప్రదేశ్ ముఖ్యమంత్రిగా నారా చంద్రబాబు నాయుడు ప్రమాణ స్వీకారం ఇటీవల గన్నవరం ఎయిర్ పోర్టు సమీపంలోని కేసరపల్లిలో ఘనంగా జరిగింది. ఈ కార్యక్రమానికి ప్రధాని నరేంద్ర మోదీ హాజరయ్యారు. అలాగే వివిధ రంగాలకు చెందిన పలువురు ప్రముఖులు కూడా రాగా.. చిరు సైతం వెళ్లారు.

అయితే ఈ కార్యక్రమంలోనే మంత్రిగా ప్రమాణ స్వీకారం చేసిన జనసేన అధినేత పవన్ కళ్యాణ్.. ఆ తర్వాత మోదీని తన అన్నయ్య దగ్గరకు తీసుకెళ్లారు. దీంతో చిరంజీవి కూర్చున్న దగ్గరకే వచ్చిన ప్రధానమంత్రి నరేంద్ర మోదీ..ఆయనతో మాట్లాడారు. ఆ తర్వాత చిరంజీవి, పవన్ కళ్యాణ్‌లను ఆత్మీయంగా దగ్గరకు తీసుకున్నారు. అనంతరం వారితో కలిసి ప్రజలకు అభివాదం చేశారు. దీంతో చంద్రబాబు నాయుడు ప్రమాణ స్వీకారంలో ఇదో హైలెట్ సీన్‌గా మారిపోయింది. అయితే ప్రధానమంత్రి నరేంద్ర మోదీ మెగాస్టార్ చిరంజీవికి రాజ్యసభ సీటు ఆఫర్ చేశారంటూ సోషల్ మీడియాలో ప్రచారం నడుస్తోంది.

ఏపీలో టీడీపీ, జనసేన, బీజేపీ కూటమి గ్రాండ్ విక్టరీ కొట్టి ప్రభుత్వాన్ని ఏర్పాటు చేసింది. ఈ నేపథ్యంలోనే చిరంజీవిని రాజ్యసభకు పంపడం ద్వారా ఏపీలో మరింత మైలేజీని అందుకోవాలని బీజేపీ భావిస్తున్నట్లు సమాచారం. అందులో భాగంగానే చిరంజీవికి రాజ్యసభ సీటు ఆఫర్ చేశారనే వార్తలు వస్తున్నాయి. అయితే దీనిపై ఇటు బీజేపీ నుంచి కానీ.. అటు చిరంజీవి నుంచి కానీ ఎలాంటి క్లారిటీ లేదు. పాలిటిక్స్‌లోకి ఎంట్రీ ఇచ్చి.. అనుకున్నంత మేర రాణించలేకపోయిన చిరంజీవి.. మళ్లీ సినిమాల్లోకి వచ్చేశారు. రాజకీయాలకు దూరంగా ఉంటున్నారు. ఇలాంటి సమయంలో మరోసారి ఈ తరహా వార్తలు గుప్పుమనడం ఆసక్తికరంగా మారింది.

మరోవైపు 2009 ఎన్నికలకు ముందు ప్రజారాజ్యం పార్టీని స్థాపించిన మెగాస్టార్ చిరంజీవి.. అప్పటి ఎన్నికల్లో 18 సీట్లు కైవసం చేసుకున్నారు. ఆ తర్వాత జరిగిన పరిణామాల్లో చిరంజీవి తన ప్రజారాజ్యం పార్టీని కాంగ్రెస్ పార్టీలో విలీనం చేశారు. అటు రాజ్యసభకు ఎన్నికై కేంద్ర మంత్రిగానూ పనిచేశారు. అయితే ఈసారి బీజేపీ నుంచి చిరుకు రాజ్యసభ ఆఫర్ వచ్చినట్లు వార్తలు వస్తున్నాయి.