హాట్ టాపిక్‌గా మారిన మెగాస్టార్ చిరంజీవి వ్యాఖ్యలు.. సజ్జల రియాక్షన్

మెగాస్టార్ చిరంజీవి ఏపీ రాజకీయాలపై చేసిన వ్యాఖ్యలు ప్రస్తుతం హాట్ టాపిక్‌గా మారాయి. చాన్నాళ్ల నుంచి రాజకీయాలకు దూరంగా ఉన్న మెగాస్టార్.. రాజకీయ వ్యాఖ్యలు సైతం చేయడం లేదు. తమ్ముడు పవన్ కళ్యాణ్ పార్టీ పెట్టి ఎన్నికల బరిలో నిలుస్తున్నా.. ఆయన పార్టీకి బహిరంగ మద్దతు ప్రకటించింది కూడా లేదు. ఒకటీ రెండు సందర్భాల్లో పవన్ గురించి పొగిడారో కానీ జనసేన పార్టీకి తాను మద్దతు ఇస్తున్నట్లు ఎప్పుడూ బహిరంగంగా చెప్పలేదు. కానీ ఈ మధ్యకాలంలో చిరంజీవి వైఖరి మారినట్లు కనిపిస్తోంది. మొన్నామధ్య విశ్వంభర సెట్లో తనను కలిసిన పవన్ కళ్యాణ్‌కు ఐదుకోట్లు విరాళంగా అందించారు చిరు. జనసేన పార్టీ కోసం ఐదుకోట్ల రూపాయలను విరాళంగా అందజేశారు.

ఇదిలా ఉండగానే.. ఏపీ రాజకీయాలపై మెగాస్టార్ చిరంజీవి శనివారం కీలక వ్యాఖ్యలు చేశారు. తనను కలిసేందుకు వచ్చిన అనకాపల్లి లోక్‌ సభ బీజేపీ అభ్యర్థి సీఎం రమేష్, పెందుర్తి జనసేన అభ్యర్థి పంచకర్ల రమేష్‌బాబుతో చిరు భేటీ అయ్యారు. ఆ తర్వాత మాట్లాడిన చిరంజీవి.. ఏపీలో పవన్‌కల్యాణ్‌, టీడీపీ అధినేత చంద్రబాబు, బీజేపీ కలిసి కూటమిగా ఏర్పడటం మంచి పరిణామం అంటూస్వాగతించారు. చాలా కాలం తర్వాత రాజకీయాలపై మాట్లాడుతున్నానన్న చిరంజీవి.. దీనికి పవన్ కళ్యాణే కారణమని చెప్పారు. ఏపీ అభివృద్ధి పథంలో ముందుకెళ్లాలనేదే తన కోరికగా చెప్పిన చిరంజీవి.. అందుకు మీరంతా నడుం బిగించి.. ఇలాంటి వారికి ఓటేయాలని పిలుపునిచ్చారు.

ఇక చిరంజీవి వ్యాఖ్యలపై అధికార వైసీపీ నుంచి విమర్శలు వస్తున్నాయి. చిరు వ్యాఖ్యల మీద స్పందించిన వైసీపీ రాష్ట్ర ప్రధాన కార్యదర్శి సజ్జల రామకృష్ణారెడ్డి.. ఎన్డీఏ కూటమికి చిరంజీవి మద్దతివ్వటంలో తనకు ఎలాంటి ఆశ్చర్యం కలగలేదన్నారు. ఎంతమంది వచ్చిన ఏపీలో జగన్ విజయాన్ని అడ్డుకోలేరని ధీమా వ్యక్తం చేశారు. ఏపీ రాజకీయ తెర మీద స్పష్టత ఉందనీ.. ఏపీ పొలిటికల్ తెర మీద జగన్ ఒక్కరూ ఒకవైపు ఉన్నారు.. మరోవైపు గుంటనక్కలు, తోడేళ్లు అందరూ ఉన్నారంటూ సజ్జల వ్యాఖ్యానించారు. వచ్చే ఎన్నికల్లో ఎంతమంది ఏకమై వచ్చినా వైసీపీ విజయాన్ని, వైఎస్ జగన్ సీఎంగా కావటాన్ని అడ్డుకోలేరని సజ్జల అన్నారు.